Веронауката падна на Уставен Суд

Владата не ја почитува целосно одлуката на Уставниот суд за укинување на верското образование во основните училишта, велат експертите по уставно право. Министерството за образование објави дека ќе биде прекината наставата по веронаука, но предметот запознавање со религиите останува како дел од наставата, со тоа што учениците што го одбрале тој предмет ќе имаат една оценка повеќе на крајот од учебната година, за разлика од учениците што досега изучуваа веронаука. Токму продолжувањето на наставата по предметот запознавање со религиите е спорно за експертите по уставно право, кои тврдат дека одлуката на Уставниот суд не е испочитувана до крај. - Одлуката е објавена во „Службен весник“ и таа треба да се спроведе во целост. Нема тука толкување како мисли Министерството или како мисли некој друг. Судската одлука е јасна и се однесува на сите предмети кои се внесени во програмата со измените на Законот за основно образование. Одредбата се укинува, а со тоа и предметите веронаука и запознавање со религии - вели Осман Кадриу, професор на Универзитетот ФОН. Таквиот став го делат и другите правни експерти кои ги консултиравме. Според нив, ако тој предмет се занимава со историски факти, тогаш не постои проблем, но кога во него, на пример, Исус се опишува како човек со посебна моќ дадена од Бога, а за тоа нема научни докази, тука има религиозна димензија, а токму на тоа и се однесува одлуката на Уставниот суд. - Тоа се верувања кои не се засновани на факти. Министерството за образование ќе мора да објасни во кој акт, дали во наставни планови, програми, правилник за определување предмети или во Законот за основно образование е предвиден предмет запознавање со религии, односно каде е наведена содржината на тој предмет - вели поранешен судија во Уставниот суд. Непочитувањето на одлуката на Уставниот суд е регулирано во член 377, став 3 од Кривичниот законик на Република Македонија и за тоа следуваат и затворски казни за сите што не ја спроведуваат одлуката. Секој граѓанин кој мисли дека оваа одлука не се почитува, може да се обрати до Обвинителство, кое е должно да ги испита наводите. Тоа може да го стори секој граѓанин, па и самиот Уставен суд. Обвинителството го разгледува случајот и до судот поднесува обвинение против тој што не ја извршил одлуката. Од Министерството за образование велат дека тие ја почитуваат одлуката на Уставниот суд, а во продолжувањето на наставата по предметот запознавање со религиите нема ништо спорно. - Запознавање со религиите не е верско образование туку предметот го предаваат социолози, историчари и филозофи. Оттаму не гледам дека има непочитување на одлуката на судот - вели министерот за образование Перо Стојановски. И директорката на Бирото за развој на образованието, Весна Хорватовиќ, тврди дека наставната програма на запознавање со религиите не се третира како веронаука и не е спорна во никој поглед, бидејќи овој предмет го предаваат дипломирани филозофи и социолози. - Тоа нема врска со веронаука бидејќи е од историско-филозофски и социолошки аспект. А, за реализирање на овој предмет, идната година Министерството дополнително ќе информира. Досега никој не реагирал до нас. Доколку има каква било реакција, ние ќе одговориме - вели Хорватовиќ.