Веронауката падна на Уставен Суд

Берлин и' рече „не“ на веронауката во училиштата

Плакат на приврзаниците на веронауката

Веронауката беше укината во училиштата во Берлин во 2006 година, по „убиството поради чест“ на една млада муслиманка

Тамара Грнчароска

Градот на атеизмот, како што го нарекуваат Берлин, во неделата негативно одговори на референдумот за враќање на веронаука во училиштата и ги задржа како обврзувачки часовите по етика. Со тоа, градот Берлин и уште две други сојузни германски држави остануваат исклучок каде на учениците не им е дозволена можноста за бирање меѓу етика или веронаука, за разлика од остатокот на Германија.

Референдумот во Берлин не успеа по две основи. Првата е што одѕивот беше низок, само 29 проценти од регистрираните гласачи, а втората е дека и од тие 51,5 проценти беа против повторното воведување на веронауката како опција во училиштата. Според германските закони, потребно е, освен мнозинство гласови, најмалку 25 проценти од регистрираните гласачи да кажат „да“ за некој предлог да се усвои, што во случајот на веронауката изнесува само 14 проценти.

Веронаука беше укината во училиштата во Берлин во 2006 година, по „убиството поради чест“ на една млада муслиманка од страна на нејзините браќа незадоволни од нејзиниот западен стил на живеење. Тоа ги поттикна властите на повеќемилионскиот град да донесат одлука етиката како предмет кој учи на заеднички вредности да стане задолжителен предмет, укинувајќи ја веронауката која според нив ги дели учениците по верска основа.

Градот кој се гордее со својата мултиетичност и мултиконфесионалност, во кој 40 проценти од децата потекнуваат од имигрантски семејства, беше потресен од убиството поради што левичарските градски власти решија дека децата треба поцврсто да се учат на разликите меѓу она што е добро и лошо.

Оттогаш во Берлин, но и во цела Германија, се водеше жестока расправа за „за“ или „против“ веронауката, која резултираше со собирање 265.000 потписи од страна на приврзаниците на веронауката кои се нарекуваат „Про-рели“ за референдумот кој се одржа во неделата под мотото „Слобода на избор меѓу етика и религија“.

Нивните аргументи „за“ се базираа на тоа дека луѓето со силни верски убедувања ја почитуваат верата без оглед на нејзината форма, прифаќајќи ги сите луѓе „такви какви што се“. Еден од нивните аргументи беше и можноста религијата да се воведе во училиштата каде што наставници на германски јазик, набљудувани од државата, ќе предаваат за исламот. Меѓу поддржувачите на „Про-рели“ беше и конзервативната германска канцеларка Ангела Меркел, но и нејзиниот социјалдемократски министер за надворешни работи, Франк Валтер Штанмаер.

Противниците, пак, сметаа дека класовите по етика се места каде што „различните традиции можат да научат да живеат заедно“ и оти делењето по религиозна основа може да го поткопа социјалниот мир. Аргумент повеќе на нивна страна беше и податокот дека по воведувањето на часовите по етика како обврзувачки драстично се намалил бројот на деца кои дополнително оделе на часови по религија.

Но, во основа, и кај едните и кај другите се работи за прашањето на муслиманите, кои бројат дури и половина од учениците во одредени делови од градот, и нивното вклопување во берлинското општество. Во Берлин живее најголемата муслиманска, претежно турска, заедница во Германија со 220.000 луѓе.