ВИЗЕН РЕЖИМ - либерализација и укинување

Министерот за надворешни работи Антонио Милошоски попладнево во Брисел на негова иницијатива, а со цел да се искористи позитивниот момент по успешното завршување на изборниот процес во Македонија, ќе се сретне со еврокомесарот за проширување Оли Рен.

На првата средба по завршувањето на претседателските и локалните избори, јави известувачот на МИА од Брисел, ќе стане збор за препораките од Европската комисија за подготвеност за почеток на преговори за полноправно членство во Унијата и визната либерализација за македонските граѓани по исполнувањето на критериумите.

Министерот Милошоски најави дека до крајот на јуни годинава ќе го покани еврокомесарот Рен да дојде во Македонија за лично да се увери за напредокот што го има постигнато земјава.

„На средбата ќе го информирам еврокомесарот Рен за одредниците, особено за достигнувањата во борбата против корупцијата, реформата на администрацијата и полицијата, зголемената ефикасност на правосудниот систем, мерките кои се преземаат за ублажување на последиците од економската криза, како и за политичкиот дијалог и учеството на опозицијата во евроинтегративниот процес преку Парламентарниот совет за евроинтеграција“, изјави министерот Милошоски.

Тој посочи дека очекува на средбата Рен да ги претстави оценките за постигнатиот напредок на Македонија кои Европската комисија ќе ги објави во Извештајот во октомври годинава.

Во тек е средбата на министерот Милошоски со Роберт Купер, генерален директор за надворешно-економски односи и политичко воени прашања во Генералниот секретаријат на Советот на ЕУ, по што ќе биде средбата со еврокомесарот Рен.

Еврокомесарот за проширување пред два дена на прес-конференција во Брисел најави дека очекува Европската комисија до истекот на чешкото претседателство со ЕУ да препорача Србија да биде поместена на белата шенген листа со цел процесот на визна либерализација да биде завршен до крајот на годинава. Тој денеска е домаќин и на средбата со министрите за надворешни работи на Словенија и Хрватска за да се обиде да го реши граничниот спор меѓу двете земји, кој го блокира напредокот на Загреб за присоединување кон Унијата.