Веронауката падна на Уставен Суд

На часовите по веронаука на учениците им се предаваат основните верски знаења и целата програма воопшто не е спорна затоа што беше одобрена од Министерството за образование, истакна Љупчо Смилев, вероучител кој вчера заедно со колегите и претставници на неколку невладини организиции мирно протестираат пред Уставниот суд.
- Самиот збор веронаука кажува дека тоа е наука за верата. Сите луѓе на овој свет веруваат во нешто, некој верува во хумани општествени вредности и слично, но најмногу од се луѓето веруваат во Бога - изјави Илија Орачки наставник по веронаука во неколку скопски училишта, напоменувајќи дека тие како вероучители веруваат дека правото на избор е загарантирано, а веронауката беше изборен предмет во основните училишта во Македонија.
- Ние не протестираме, ние искажуваме поддршка за изучување на веронауката - рече Орачки.
Вероучителите посочија дека денес во 13 часот пред уставниот суд во Скопје ќе се одржи масовен протест и побараа поддршка од сите граѓани во Македонија за изучување на веронауката во училиштата.

Вероучителите не ја коментираа одлуката на Уставниот суд, која што беше донесена во средата минатата недела и со која беше укинат членот 26 од Законот за основно образование, со што беше укината веронауката како предмет во училиштата. Тие најавија дека очекуваат поддршка и од колегите од муслиманската вероисповед да се приклучат на протестот.

Протести против укинувањето на членот 26 од Законот за основно образование имаше и во Охрид и Велес, од каде вероучителите најавија поддршка за денешниот централен протест во Скопје.
Од владејачката партија, велат дека Уставниот суд го занемарува правото на избор.
- Во законот за средно образование, стои дека вероунауката е изборен предмет. Со укинувањето на веронауката, уставните судии директно го нарушуваат правото на слободен избор. Забораваат дека тие се платени со пари на граѓаните - велат од ВМРО-ДПМНЕ, напоменувајќи дека е симптоматично што Уставниот суд спие додека СДСМ е на власт. Од партијата истакнуваат дека во четириесет европски земји се изучува веронауката, а во 20 од нив таа е задолжителен наставен предмет.

Можни се измени во Уставот?!
По одлуката на Уставниот суд за бришење на членот 26 од Законот за основно образование, можно е да се очекува и иницијатива за измена на одредени членови во Уставот на Република Македонија. Од владејачката партија, се уште размислуваат дали би се поддржала промената на Уставот, се до моментот не биде објавена одлуката на Уставниот суд во Службен весник.
Во ДУИ прифаќаат промена на Уставот. Со ова би се реализирала и идејата на ДУИ Уставниот суд да одлучува според Бадентеровото мнозинство, откако уставните судии, укинаат неколку одредби од Законот за знамињата.