Вести

 

Лацио во паника, Пандев заминува...

Само неколку дена по римското дерби и по голот во мрежата на Рома следи нова офанзива низ медиумите во Италија кои се преплавени со шпекулациите за иднината на Горан Пандев. Македонецот си оди од Лацио, а клубот е во паника. Пандев се уште не го продолжил договорот со римјаните а сезоната завршува. Лацио нема финансиска моќ да ја добие битката со гигантите кои се борат за потписот на Пандев. Струмичанецот е на слатки маки, а доаѓа времето кога треба да се стави крај на сите дилеми. Нервозен е Клаудио Лотито, првиот човек на Лацио, кој конечно призна дека за Пандев има понуди од големи клубови како Баерн Минхен и Ливерпул.

"До 30 април треба да ги решите сите дилеми со Пандев и Зарате. Имавме многу состаноци и преговори. Мислам дека со двајцата ќе ја завршиме работата. Тие се иднината на клубот. Пандев има понуди од клубови кои во моментов имаат посилна финансиска моќ (Баерн М. и Ливерпул), но тој сака да остане во Рим. Ние на неговите менаџери веќе му понудивме нов петгодишен договор со тоа што првата сезона ќе игра за плата од 1.500.000 евра, а потоа цифрата ќе се зголемува", панично кометира Лотито за весникот "Ил Темпо".

Е ова е нешто ново!!! Ова се вика паника затоа што барем досега Лотито многу се ценкаше кога станува збор за Пандев, чиј услов беше да има годишна плата од 2.000.000 евра место досегашните 600.000 евра по сезона. Лотито долго споменуваше цифри од 800.000 евра па и 1,2 милиони а еве го сега и со понуда од 1,5 милиони евра. Стравува дека Пандев си оди, а стравува и дека Лацио нема добро да наплати за слободата на Македонецот. Во јуни менаџерите на нашиот најдобар фудбалер можат да го активираат правилото 17 на ФИФА според кое Пандев ќе може да си го откупи договорот за сума од околу 3.000.000 евра, што е лошо за Лацио кој многупати одбиваше за Пандев и цифри од 12.000.000 до 18.000.000 евра.

Она што го дознавме е дека покрај Баерн и Атлетико стигнала и нова понуда за Пандев од Ливерпул. Се обновуваат преговорите со англискиот клуб кој ќе се обиде да им ги расипе сметките на Германците и Шпанците.

Саботното дерби во Рим го следел и Свен Горан Ериксон. Тој летово би можел во Баерн Минхен или Челзи. Во неговиот нотес веќе подолго време стои името на Пандев кој би можел да замине во клубот каде за нов шеф ќе биде назначен токму поранешниот селектор на Англија.

А Пандев и неговите менаџери ја добиваат битката околу тактизирањето и околу преговорите со Лацио. Летото се ближи, а со тоа се ближи и денот на разделбата меѓу Пандев и Лацио. Сепак, времето ќе покаже. Последните најави кажуваат дека фудбалерот и неговиот менаџерски тим се фокусирани кон трансфер во нова средина. За разлика од претходните преодни рокови, сега имаме појасна слика. Сега Пандев може да си замине без да го праша Лацио!!! А секој ден има нови клубови кои се на листата кои имаат желба во своите редови да го видат Пандев. Покрај трите поинуди се споменуваат уште Интер, Фиорентина, Зенит, Валенсија... Сите тие се со подобар рејтинг од Лацио и нудат повеќе од 2.000.000 евра годишна плата за нашиот фудбалер.

Победа мора во понизок ранг!!!

Мега скандалот во Европа поврзан со откритието на УЕФА дека натпреварите на Победа и Пјуник во 2004 година биле наместени и изречените санкции против сторителите на тешкото дело е топ тема на сите меридијани. Прилепчани 8 години без настапи на евро-сцената, а Александар Забрчанец и Николче Здравевски заработија доживотни суспензии. Внатрешната контрола на УЕФА докажа дека натпреварите биле наместени, а Победа немаше аргументи да излезе на крај на обвинението. Како единствен медиум од Македонија ја имавме таа можност и бевме на местото на "злосторот" и местото каде се водеше судскиот процес против Победа. Македонскиот тим ја доби максималната казна, а истото важи и за Забрчанец и Здравевски.

Голем срам за фудбалот во Македонија, но и за државата. Дали случајот ќе застане тука!?

Победа има право на жалба и не е за верување дека истата би донела намалување на казните со оглед на тоа дека УЕФА има цврсти докази дека средбата е наместена. Три клучни сведоци, експертиза на луѓе од обложувалниците, изјави на службени лица и видеозаписи.

Сепак,чуднисе реакциите на ФФМ. Никој од нив не очекуваше ваков шок затоа што сите ги слушаа лажните приказни на претседателот Хаџи-Рстески. Прилеп е вмешан во мега скандалот со наместени натпревари,а ФФМ но и државните власти во земјава мора да ја продолжат истрагата.

А што велат фудбалските закони во ФФМ!?

Според член 71 од дисциплинскиот правилник треба да се очекува одлука на ФФМ според која Победа од Прилеп ќе биде казнета со префрлување во понизок ранг. Тоа го пишува во правилникот на ФФМ каде местенката на Победа фатена од УЕФА мора и треба да се окарактеризира како: "Негативна појава од поголеми размери и значења". Факт е дека поголем срам од овој немало во мак-фудбалот,а истото важи и за големината на скандалот. Цел свет ни се смее и не покажува како местачи на натпревари и тоа не домашни туку меѓународни.

Но дали ФФМ ќе се обиде да тргне во спроведување на законот кон своето милениче? Клубот на Харалампие Хаџи-Ристески (екс претседател на Победа), треба да биде префрлен во понизок ранг, да биде казнет со 5.000 евра, а УЕФА веќе доживотно ги отстрани оние кои биле вмешани во местенката. Така е напишано и тоа е закон!!!

Она што чуди е одредениот став на некои функционери во ФФМ кои по донесувањето на одлуката на УЕФА низ медиумите се пофалија дека тие нема да покренуваат никаква дополнителна постапка против Победа. Па зарем е тоа возможно? Ќе ги почитувале само одлуките на УЕФА. Зарем не сфатија за сериозноста на случајот и дека во секоја нормална држава по луѓето, клубовите или фудбалските работници кои учествуваат во местенки следат дополнителни казнени мерки. Требаше некој друг да и каже на ФФМ дека тука во земјава се мести на големо, за интерес, за обложувалници... Ако е тоа така зошто постои дисциплински правилник, па и зошто постои ФФМ ако некој друг и ги брка работите и ги решава скандалите.

Овој силен "земјотрес" кој го урна до темел мак-фудбалот мора да има поголеми казнени мерки. Без разлика на тоа што станува збор за Победа. ФФМ мора да го спроведе законот. Тој е ист за сите и не треба да се фаворизираат клубовите. Доста со таа политика, со таа фудбалска власт... Само поради тоа што Харалампие и Победа мислеа дека ова е обид некој да ја освои власта во ФФМ се случи ова што се случи. Луѓето немаа абер дека скандалот е сериозен и дека некој надвор врши истрага и дека истиот тој не паѓа на "евра", на приказни... Внатрешната контрола не бира клубови, имиња... Не ја ни интересира дали Петко или Харалампие е прв човек на ФФМ. Ја фатија местенката и ги изрекоа казните. Што правиме сега!? Што ако "утре" има нов удар, нов "земјотрес"... До кога Хаџи-Ристески ќе жртвува се околу себе и ниту во еден момент нема да признае дека не го бива. Самиот се фати во замката затоа што никој не го поврза со овој скандал а самиот низ медиумите почна да се "вади". Прилепчани за пари и нанесоа тежок срам на Македонија. Браво и до кога!?

Пандев еден месец во "аут"

Фатален "судар" на Горан Пандев во саботата со голманот на Џенова. Се играше 38. минута од натпреварот кога нашиот најдобар фудбалер во обид да ја затресе мрежата на домаќините налета на голманот Рубињо, кој го "разнесе" фудбалерот на Лацио. По само неколку секунди игра Пандев побара замена и не можеше да го продолжи натпреварот.

"Вчерашните снимки покажаа дека мора да мирувам дваесетина дена", коментира Пандев од Рим неколку часа по веста од лекарите дека повредата не е наивна и дека паузата е неизбежна.

Ова е шок за тренерот Делио Роси, кој без својот најдобар стрелец во оваа сезона му оди на реваншот од 1/2 финалето во Купот на Италија против Јувентус. Пандев се очекува да се врати на терените кон средината на мај и ќе ги пропушти неколкуте важни натпревари на Лацио во финишот од сезоната.

"Заморот си го стори своето. Имав исцрпувачка сезона и многу натпревари. На почетокот на годинава имав проблеми со палецот, а еве сега и со мускулот. Лекарите ми соопштија дека од ударот имам искинато некои мускулни влакна. Сега пред мене е период од 3-4 недели на рехабилитација и терапии. Нови резултати ќе има за 10 дена кога ќе имам и подетални информации кога точно би можел да бидам фит", појаснува Пандев, кој никогаш досега во кариерата немал подолга пауза од еден месец.

Ваквите вести од Рим се лоши за Лацио, но и добри за нашиот национален тим. Во најлош случај Пандев би се вратил за еден месеци и со тоа ќе биде фит за настапот на дуелите со Норвешка и Исланд на почетокот на јуни во Скопје.

"До јуни би бил сигурно фит. Сега веќе и нема потреба од операција на палецот кој помина со терапии. Лекарите предвидуваат дека ќе можам да играм кон средината на мај", потенцира Пандев, кој како гледач ќе ги следи настапите на својот куп во наредните неколку првенствени и куп средби.

Пандев со вкупно 16 голови во оваа сезона е најдобар стрелец оваа сезона во Лацио. Постигна 9 погодоци во Серија А и 7 во Купот на Италија.

Denesen "Makedonski Sport"

"Разочаран сум"

Оваа е историската изјава на Харалампие по објавувањето на казните во врска со Победа а ги изрече УЕФА.
Мора да му се честита на Хари за вака опширната изјава и отфрлањето на ваквата казна од УЕФА. Како да се работи за некој клуб од Казахстан, а не за клубот од каде дојде на чело на ФФМ.
Јасно е дека претседателот на ФФМ повторно ќе глуми дека е "невин како јагне" ама сега нема на кого да се жали затоа што и Платини уште истиот ден ја поздрави одлуката на Дисциплинската комисија. Можеби Харалампие сака да ги поштеди луѓето од многу објаснување, а богами има многу причини за кои треба да објасни зошто е разочаран. За да не ги дави луѓето со глупави објаснувања дека е невин еве ќе му поставиме три прашања на кои ако даде одговор многу фудбалски фанови ќе го сфатат неговото разочарување, а УЕФА сигурно ќе му даде полна поддршка "да се справи со криминалот". За почеток:
1. Дали со претседателот на Победа е во роднинска врска?
2. Кој беше директор на Победа кога е натпреварот местен?
3. Дали финансиски ја поддржуваше  Победа кога е одигран мечот со Пјуник? и
4. Дали претходните три прашања имаат врска со него или "није одавде"?
Три мали прашања со многу едноставни одговори кои директно завршуваат на домашната  адреса на Хари, а ги знае целата македонска јавност.
Навистина е разочарувачки  да се појавиш во јавност и да тврдиш дека новинарите од Македонија кои биле во Нион се главни виновници за скандалот на Победа, а да ги заборавиш  трите заштитени сведоци на УЕФА кои сведочеле за натпреварот.
Не оди таа работа, фудбалските работници бараат одговори иако веќе ги знаат..
Нема потреба од глумење " жртвено јагне", нема потреба од велигденски ручеци на Тиквешко езеро, нема потреба Спирковски да толкува Дисциплински правилник, Зејди е тука, само треба да се спроведуваат пишаните документи кои јасно кажуваат: минус бодови и префрлање во понизок ранг на натпревари.
Глумењето  лудило негативно ќе се одрази на македонскиот фудбал затоа што на овие три прашања и УЕФА ги знае одговорите. Друштвото од тиквешкиот ручек го нема решението на проблемот, секое понатамошно заташкување на небулозите кои ги правите води кон едно, Принудна управа од УЕФА. Сигурно Ви личи чудно и смешно но очигледно е дека не ја разбравте сериозноста на работите и не сакате да ја прифатите реалноста, а тоа е дека УЕФА Ви гази на опашката.

Сампдорија издржа против Интер и ќе игра со Лацио

23.04.2009.

Во финалето од италијанскиот Куп ќе играат фудбалерите на нашиот репрезентативец Горан Пандев, Лацио и Сампдорија, а во полуфиналето останаа два италијански гиганта: Јувентус и Интер.       Интер имаше тежок испит на Сан Сиро бидејќи мораше да лови заостаток од 3:0 од првиот натпревар против Сампдорија, но успеа на крај да победи со минимални 1:0. Беше на добар пат до целта кога во 27-та минута со прекрасен погодок во водство го донесе најдобриот стрелец Златан Ибрахимовиќ.      Од врвот на шеснаесетникот, од десната страна, Ибрахимовиќ ја зафати топката со десната нога и ја испрати во мрежата, но покасно се констатира дека тоа беше воедно и единствениот погодок на натпреварот.      Веќе во наредната акција Швеѓанецот беше во нова прилика, а многупати до крајот на мечот гостинскиот состав беше доведен во искушенија, но исто толку пати се извлекуваше од сите проблеми и успеа да ги сочува големите 3:0 од првиот натпревар.  Италијански Куп, полуфинале: Интер - Сампдорија 1:0 (Ибрахимовиќ 27) прв натпревар 0:3 одиграно во среда: Јувентус - Лацио 1:2 (Дел Пиеро 64 - Зарате 38, Коларов 52) прв натпревар: 1:2

Лацио го откупува Зарате

Римски Лацио ќе го откупи договорот со Мауро Зарате, еден од најдобрите напаѓачи во Италија и еден од најзаслужните фудбалери што Лацио оваа сезона ќе игра во големото финале од Купот на Италија. Тоа го потврди и претседателот Клаудио Лотито, кој најави дека наскоро ќе замине во Катар да го потпише договорот со Ал Саад за задржување на Аргентинецот.

"Оваа недела планирам да заминам на преговори за потпишување перманентен договор со Зарате. Се надевам дека преговорите ќе завршат успешно и конечно Зарате ќе може да се сконцентрира на игрите за нашиот клуб. Знаев дека тој ќе биде од исклучителна важност за нас, а со своите добри игри дури ги надмина моите очекувања", изјави Лотито.

Информациите говорат дека Ал Саад бара околу 25 милиони евра за да се откаже од услугите на својот напаѓач. Зарате оваа сезона запиша 12 погодоци вклучувајќи ги трите гола на последните три натпревари за својот тим.