ДНЕВНО-ПОЛИТИЧКИ настани, вести и актуелности

Сопрено финансирањето за Коридор 10

Македонија сега треба да бара други извори на средства за да го гради автопатот „Александар Македонски“.

Ова доаѓа по грчките притисоци во Брисел да се сопре финансирањето на овој коридор поради неговото преименување.

Грчките закани денеска во Скопје ги најави претставник на Европската комисија, не сакајќи да навлегува во политичките моменти на спорот.

„Тоа беше одлука на македонската Влада и таа одлука предизвика одредени последици во однос на финансирањето, одредени средства кои беа предвидени за овој коридор, ќе треба да се најдат други извори“, рече Џонатан Шил

Преговорите меѓу ЕУ и земјите од Западен Балкан за воспоставување на транспортна заедница започнаа во јуни минатата година.

Договорот ќе помогне регионот сообраќајно да се интегрира со Европа и да ги усогласи правилата за безбедност, заштита на животната средина и услугите.

Според Европската комисија, нема пречки Македонија да биде дел од овој систем.

Сите неосигурени лица во земјава за неколку месеци ќе добијат сини картони со право на избор на матичен лекар и рецепти за лековите од позитивната листа. Ова е суштина на предлог-измената на Законот за здравствено осигурување што Владата ќе ја упати во собраниска процедура. Во Министерството за здравство очекуваат оваа новина да почне да важи од јуни годинава.

- Иако допрва ќе ја проценуваме бројката на неосигурени лица, претпоставуваме дека станува збор за околу 35.000 лица, кои од јуни ќе почнат да го користат основниот пакет здравствени услуги. Нема веќе да се чека некое од овие лица да се разболи од дијабетес, бубрежно или заразно заболување, па тогаш да добие бесплатна здравствена услуга. Со овој модел се засилува превентивата, бидејќи и неосигурените лица ќе добијат матичен лекар и право на рецепти - објаснува Борче Наумовски, член на работната група за основниот пакет во Министерството за здравство.
Тој додава дека, на пример, сини картони ќе им следуваат на лица постари од 64 години кои имаат имот, но не може да го обработуваат, но и на сите лица што по ниту една основа не можат да бидат здравствено осигурани, ниту преку Агенција за вработување ниту преку вработен сопруг или сопруга. 

Но, надлежните во Министерството не ја објаснуваат разликата во бројот на неосигурените лица. Од Министерството за финансии неодамна излегоа со далеку поголема бројка од 90.000 лица неосигурени лица, додека од Агенцијата за вработување велат дека 75.000 лица се пријавуваат само за сини картони.

Во Фондот за здравство во минатата година вкупно 6.682 лица од целата земја го добиле правото да се лекуваат бесплатно, откако било утвредно дека немаат ниту една основа на осигурување.

Тие морале да пополнат образец и да приложат низа документи, од уверение за семејно-материјална положба и други, за да се стекнат со право на сини картони. Слично ќе биде и сега, а Фондот допрва ќе треба да определи критериуми според кои неосигурените лица на три или шест месеци ќе добиваат сини картони.

Државата за здравствено осигурување на овие лица ќе одделува по 721 денар месечно или пет милиони евра годишно, но нема да троши дополнителни средства. Парите за оваа намена ќе бидат само пренасочени од 15-те превентивни програми, преку кои и досега неосигурените лица можеа да користат бесплатни услуги. Од буџетот ќе бидат додадени дополнителни 76 милиони денари годишно и тоа од продажбата на цигарите.

- За да се спроведе здравствена заштита на овие лица, ќе треба да се зголемат и буџетите на болниците и на клиниките, а ќе треба да се вработат и матични лекари, бидејќи ќе има нови 35.000 пациенти за кои тие ќе треба да се грижат - нагласуваат од Министерството за здравство. На прашањето што е со бесплатното лекување на лицата кои се вработени, а за кои работодавачите не плаќаат придонес, па тие немаат ни сини картони, во Министерството велат дека за нив нема да важи оваа новина, бидејќи тие веќе имаат основ на осигурување.

Ист пакет здравствени услуги ќе важи и за вработените што плаќаат здравствен придонес и за неосигурените лица.
- Ниедна услуга што досега ја добиваа осигурениците нема да биде скусена од основниот пакет. Точно е дека при креирањето на основниот пакет имаше дилеми дали да има два пакета - еден за неосигурени лица и еден за вработените и лицата што плаќаат здравствен придонес. Но, со оглед на начелото на подеднаков пристап до здравствена заштита на сите граѓани, министерот за здравство, Бујар Османи, реши да има еден пакет за сите граѓани - објаснува Наумовски. Дознаваме дека се подготвува и дополнително здравствено осигурување, но тоа ќе биде обелоденето за неколку месеци.

----------------------------------------------------------------------------------------

Уште една позитивна предизборна одлука, со оглед дека мерката ќе се применува од јуни, а веста се објавува на почеток на изборната кампања

Ако само пред избори им текнува да донесуваат вакви мерки, ќе мора да се радуваме почесто да има избори во државата