ДНЕВНО-ПОЛИТИЧКИ настани, вести и актуелности

Кесите во трговијата од први мај ќе мора да бидат подебели. Министерството за животна средина, по налог на Владата, ја промени наредбата за забрана за употреба на најлонските кеси со што дебелината на петкилограмските кеси се зголемува од 14 на 21 микрон. Со спроведувањето на оваа наредба граѓаните ќе добиваат кеси кои се поквалитетни и кои може да се употребуваат повеќекратно и подолго, истакнуваат од Министерството за животна средина. Со тоа се планира уште поголемо намалување на употребата на кесите, која само во јануари бележи тренд на намалување кај трговците од 40 до 82 проценти во однос на ноември 2008 година. Министерот Неџати Јакупи вели дека ќе се прави и ново упатство со кое ќе се предвиди кесите да се прават од биоразградлив материјал, но истото нема да биде задолжително за производителите на кеси. Малите кеси, како и досега, ќе се употребуваат само при мерењето и пакувањето на зеленчукот, овошјето, месото и брашното и тие не треба да се наплатуваат. Но, како што објаснуваат од Министерството, дуќаните може да ги наплатуваат и за тоа да не бидат казнети од инспекциските служби. - Хартиените кеси нема да бидат задолжителни за трговците, при што купувачот самиот ќе треба да одлучи дали ќе купува во продавница каде што му даваат хартиена кеса која нема да му ја наплатат или во продавница каде што му даваат најлонска кеса за која му бараат минимум два денара - велат од Министерството за животна средина. Казни, како и досега, ќе се предвидуваат само за тие дуќанџии што прават злоупотреби со законот и за пакување користат кеси чија носивост е помала од пет килограми. Но и покрај огромната злоупотребливост на законот, досега се поведени само 11 прекршочни постапки.