Судбина на жената низ вековите

Ирачките сили за безбедност на 21 јануари ја уапсиле главната организаторка и обучувачка на жени-самоубијци во Ирак, 50-годишната Самира Ахмад Џасин, позната под прекарот Ум ал Муминин или „мајка на верниците“, која најверојатно обучила преку 80 жени-самоубијци. Бројот на напади од жени-самоубијци во Ирак минатата година порасна на 32, од осум во 2007 година.
Според неофицијални извори од истрагата, од повеќе од 80 жени-самоубијци кои Џасин ги обучила во изминатата година и половина, 28 веќе се разнеле под нејзин директен надзор. Џасин натаму тврди дека сунитските радикални бунтовници намерно силуваат девојки и потоа ги испраќале кај неа да ги убеди да се разнесат, како единствен начин да се ослободат од срамот. Во ултраконзервативната област Дијала, североисточно од Багдад, силуваните девојки се целосно отфрлени, и од семејствата и од околината, и честопати немаат друг избор освен да се самоубијат. Џасин била регрутирана од организацијата Ансар ал Суна, една од ретките преостанати радикални организации за кои се верува дека е поврзана со Ал каеда. Според нејзината изјава, таа била присилена на соработка под закана дека ќе и ја разнесат куќата, заедно со четирите ќерки и двата сина. Џасин во Дијала, која е едно од последните упоришта на радикалните сунити во Ирак, добила продавница во која продавала традиционални женски носии, што и овозможило да биде во контакт со поголемиот дел од жените во областа и лесно да ги пронаоѓа своите жртви. Според портпаролот на ирачката армија, генерал-мајор Касим ал Мусави, тие имаат снимено на камера две од нејзините признанија, од кои едното се однесува на девојката која Џасин ја обучувала две недели, а потоа лично ја одвела во локалната полициска станица, каде што се разнела. Употребата на жените како бомбаши-самоубијци зема замав во последните неколку години. Бунтовниците ја сфатија предноста на широката традиционална носија на ирачките жени, под која лесно можат да се скријат појасите со експлозив. Тие, исто така, ја злоупотребуваат и локалната култура, која на мажите им забранува да претресуваат жени. Од тие причини, ирачките сили за безбедност се трудат да регрутираат што е можно повеќе жени. На регионалните избори минатата недела, властите регрутираа учителки и државни службенички при претресот на жените-гласачи.

Појавата се шири и надвор од Ирак

Жени-самоубијци не се честа појава надвор од Ирак, но, сепак, ги има. Неколку Палестинки изминативе две години изведоа самоубиствени напади во име на повеќе радикални исламистички организации, меѓу кои и Хамас и Исламскиот џихад.
И во палестинските територии роднините имаат право да бараат остри казни, па дури и смрт, доколку девојките или жените ја посрамотат честа на семејството.