СП во ракомет за мажи - Хрватска 2009

Првата фаза од Светското првенство во Хрватска денеска ќе ја достигне својата кулминација со мечевите од последното коло по групи. Тука ќе се распределуваат билетите и за Задар и за Пореч, а нашите најдобри ракометари беа во игра и за едно и за друго во пресрет на вчерашниот дуел со Германија. Без разлика, денешниот натпревар со Русија (15.30 ч.) е од исклучителна важност.
Се уште под импресии од неверојатниот триумф против Полска, на избраниците на Илија Темелковски сега им скокна угледот во очите на ракометниот свет. Во Ц-групата сега не се зборува само за Германија, Полска и за Русија, туку и за нив.
- Историјата е на страната на Русите, атмосферата и борбеноста на нашата. Сепак, по победата над Полска не смееме да се залетуваме. Ние сме тие кои изненадивме и тешко е да се повтори тоа против друга таква селекција, зашто сега сите ни обрнуваат поголемо внимание - вели Стевче Алушовски, не сакајќи да прави паралела со тимот на кој сензационално му одзедовме бод на Европското првенство пред 11 години, откако на полувремето губевме со девет гола разлика.
- Тоа беше еден од најдобрите тимови на сите времиња. Русија денес не е тоа што беше. На претходното ЕП не успеа да ја мине ниту групата. Играат цврста одбрана на чело со голманот Костигов и опасно напаѓаат преку десниот бек Игропуло и крилата.
Во пресрет на СП, Русите, конечно, се разделија со легендарниот селектор Владимир Максимов и му дадоа шанса на неговиот помошник и во репрезентацијата и во тимот на Чеховски медведи, Николај Чигарев.
- Тој само продолжи каде што застана Максимов. Не направи промени ниту во играчкиот кадар, ниту во системот на игра - вели селекторот Илија Темелковски.
Денеска на програмата: А-група: Аргентина-Австралија (15 ч.), Словачка-Романија (17), Франција-Унгарија (19); Б: Кувајт-Куба (16.30), Шпанија-Кореја (18.30), Хрватска-Шведска (20.30); Ц: Германија-Полска (17.30), Тунис-Алжир (19.30); Д: Србија-С. Арабија (16.15), Египет-Бразил (18.15), Данска-Норвешка (20.15).