ДЕНЕСКА ОД 17:30 ЧАСОТ МАКЕДОНИЈА ГО ИГРА ЧЕТВРТИОТ МЕЧ НА МУНДИЈАЛОТ КОЈ МОЖЕ ДА ЗНАЧИ И ПЛАСМАН ВО СЛЕДНАТА РУНДА

На ред е светскиот првак

Победите над Алжир и Полска се минато, па веќе денеска следува предизвикот кој го носи актуелниот шампион од пред две години, Германија, што е шанса за триумф над уште една голема селекција.

Од Вараждин,
Дејан Михајловски

Фото
Јоже Олевски

По одлично сработената задача во првите три средби, денеска Македонија ќе има можност да одговори на уште еден предизвик кој го носи составот на Германија, кој и натаму е актуелен Светски шампион.
Откако беше совладана Полска денеска на ред е и Германија со што би се додал уште еден фаворит за медал на списокот на тимот од кој никој не очекуваше вакви резултати пред СП.
"Н$ очекува тежок натпревар. По играта против Полска јасно е дека Македонија мораме да ја гледаме поинаку. Се виде дека не смееме никого да потценуваме и дека мораме да дадеме максимум на средбата која ни претстои. Македонија има квалитен состав, а ние сакаме денеска да ја завршиме целата работа околу пласманот во следната рунда. Затоа ќе дадеме с$ од себе за да дојдеме до посакуваниот пласман и да се најдеме во втората фаза уште пред средбата со Полска која се игра утре", вели селекторот на Германија, Хајнер Бранд, пред денешниот дуел.

Одличните резултати на Македонија сега ќе ги натераат сите противници со голема доза на внимателност да влегуваат на средбите против нашите репрезентативци. Веќе е јасно дека подготовките ќе бидат далеку посериозни, а токму денешниот ден ќе биде шанса за да се види како Германците ќе влезат на средбата и каква ќе биде нивната противигра.
Без разлика на тоа македонските репрезентативци се подготвени да одиграат уште еден меч на високо ниво и уште еднаш да покажат како се бранат боите во дресот со националниот грб.
"Сработивме одлична работа во првите три кола, а победата против Полска беше само голем плус за нас. Сега никако не смееме да го кренеме носот туку мораме да направиме с$ што е во наша можност да одиграме уште подобро на следните средби. Ние веќе направивме сензација, но не смееме да застанеме тука. Сакаме да бидеме најголемо изненадување на шампионатот, но мораме да одиграме добро и против Германија денеска. Овој дел е наша голема шанса за да докажеме дека можеме да играме и понатаму еднакво добро. Едноставно мораме и денеска и утре против Русија да направиме добар резултат доколку сакаме да се пласираме во следната рунда на Светското првенство", коментираше Кире Лазаров пред денешното одмерување на силите против Германија.
Што се однесува до тактичкиот дел тоа е задача на Темелковски, Шундовски и Бошковски кои секој ден работат според план и прават детални анализи за ривалите. Секој ден се подготвува нова игра, а каква ќе биде стратегијата за Германија ќе се види на теренот откако денеска ќе стартува мечот.
"Да се победи светскиот вицепрвак не е доволна само среќа и желба. Потребен е и квалитет, а ние докажавме дека го имаме. Сепак, тоа сега ќе мораме да го потврдиме и против шампионот од 2007 година, а јас сметам дека ќе имаме што да покажеме", коментираше Темелковски по мечот со Полска.
Сите работи се поставени така денеска да забележиме што е можно подобар резултат. Секој ќе го сработи она за кое е задолжен бидејќи е јасно дека на овој шампионат сите веќе н$ гледаат со други "очи". Токму поради тоа вечерва од Вараждин ќе се чека нов одличен резултат.
Никој не ни помислува на тоа што велат математиките, а ги има многу. Постои комбинација во која Македонија би заминала во следната рунда со само една победа и тоа против Русија, но тоа нема да значи ништо и премногу е ризично да се оствари.
Најлесно ќе биде доколку уште денеска се оствари уште една победа, а утре со уште една се затвори одличниот настап во првата рунда. Тоа е математиката на која сите размислуваат и која сите ја очекуваат бидејќи само така можеме да пренесеме четири бода во следната рунда.
Шансите се големи и постојат и понатаму, но мораме сето тоа да го спроведеме на дело. Друга комбинација во момент и не би требало да интересира никого. Македонија почна да победува и мора да продолжи така бидејќи во моментов срцата на 16 ракометари во Вараждин и на сите други што се овде бијат заедно со срцата на сите Македонци ширум светот. Дефинитивно Македонија покажа досега дека знае како да ги привлече симпатиите на сите, па дури и на организаторот кој секогаш дава огромна поддршка. Денеска ќе има и огромна поддршка од трибините, а за мотив плус пред средбата се слушаат песните од Тоше. Сите заедно денеска ќе знаат уште еднаш да стигнат до посакуваниот резултат. Со победа над светскиот првак сето ова уште досега сработено ќе биде рамно на медал.

АМС поставува видео бим на плоштад

По одличните резултати направени во минатите денови денеска средбата против Германија ќе може да се следи и на видеобим кој ќе биде поставен на плоштадот Македонија во Скопје. Сите оние кои ќе сакаат на ваков начин да ја искажат својата поддршка на македонската селекција ќе може од 17:30 да навиваат за македонските репрезентативци.

Ќе дојдат уште навивачи во Вараждин

Средбата со Полска беше причина уште многу навивачи од Македонија да го најават своето доаѓање во Вараждин. Веќе има барања за билети бидејќи од Македонија ќе пристигнат уште навивачи за денешната и утрешната средба. Сето тоа ќе биде само уште еден плус за нова голема поддршка за Македонија.
"Оние кои имаат можности нека дојдат во Вараждин за да н$ бодрат бидејќи заедно сме посилни. Публиката е нашиот осми играч, а ние ќе направиме с$ уште еднаш да се оддолжиме на вистински начин", коментираше Лазаров.

Одмор и еден тренинг на вчерашното "мени"

Во текот на вчерашниот ден сите репрезентации имаа можност да присуствуваат на прошетка која ја организираше домаќинот. Македонските репрезентативци, сепак, решија да одморат по одличниот настап со Полска кој беше и исцрпувачки. Покрај одморот синоќа од 17 часот одржаа и тренинг на кој само ја доработија тактиката за делот против Германија.

ПО ПРВИТЕ ТРИ КОЛА НА СВЕТСКОТО ПРВЕНСТВО

Лазаров лидер на стрелците

Капитенот на македонската репрезентација и најдобар стрелец од ланската ЛШ, Кире Лазаров, по одигрувањето на првите три кола е прв голгетер на Мундијалот. Со вкупно 31 погодок од кои 13 беа на мечот против Полска, Лазаров се најде далеку пред другите ракометари.

Одличната игра на стартот на шампионатот е крунисана со висока позиција кај стрелците, што секако е одличен податок за Лазаров, кој чекаше долго време како и другите за да можат да ги покажат квалитетите на дуели со најсилните светски селекции.
Иако на средбите сите се обидуваа да се одбранат од нашите ракометари, сепак, тие успеаја да покажат дека знаат како да одиграат и да бидат најдобри кога е најпотребно.
Кире почна одлично уште на првата средба која ја загубивме против Тунис. Високиот процент на реализација од дури 65 посто исто така е за одбележување и за пофалба бидејќи со тоа само може да се види дека и шутерски нашите репрезентативци се одлично подготвени.
Лазаров најмногу погодоци постигна на последната средба, кога Македонија играше против Полска. Овој дуел заврши со 13 погодоци од него, што само покажува дека и покрај тоа што во еден период се играше "фластер" на него тој успеваше да погоди кога е најпотребно.
Претходно на дуелите со Тунис и Алжир беше исто така најефикасен, а на тие средби успеа да постигне по девет гола.
Меѓу најдобрите 30 стрелци на Мундијалот се наоѓа и организаторот на играта Наумче Мојсовски, кој досега има 14 погодоци. Мојсо беше оној кој успеваше да помага секогаш кога Лазаров немаше позиција и затоа тој е оној што се најде меѓу првите 30 стрелци на првенството, а ќе има шанса во текот на следните денови да дојде до уште подобар пласман.
Другите македонски репрезентативци останува на следните средби да се изборат за место погоре на листата на стрелците.

ЛИСТА НА СТРЕЛЦИ
1. Кире Лазаров (Мкд) 31
2. Иван Чупиќ (Хрв) 25
3. Момир Илиќ (Срб) 22
4. Хуан Гарсиа (Шпа) 21
5. Хусеин Хусеин (Еги) 19
6. Томи Флечер (Аус) 18
6. Јонас Калман (Шве) 18
6. Ерленд Мамелунд (Нор) 18
9. Ларс Кристиансен (Дан) 17
9. Жером Фернандез (Фра) 17
9. Паскал Хенс (Гер) 17
9. Икер Ромеро (Шпа) 17
27. Наум Мојсовски (Мкд) 14

Кире втор асистент

Покрај тоа што е лидер меѓу стрелците, Кире Лазаров е и втор асистент на шампионатот. Тој досега направи вкупно 14 успешни додавања и има само едно помалку од Мамелунд од Норвешка.
Мојсовски овде има подобра позиција и се наоѓа на 12. место, а има вкупно девет асистенции досега.

Сто посто од седум метри

Кире Лазаров е прв и во уште една категорија на Мундијалот. Тој досега има сто посто реализација на седмерците. Единствен е што успеал да погоди деветпати од девет удари. Има уште неколку со сто посто реализација, но тие имаат помалку шутеви.