Министерство за образование

Најодговорно тврдам дека Министерството за образование ги користи сите начини соодветно да одговори на сите предизвици со цел да се промовира и унапреди воспитно-образовниот процес на сите нивоа, истакна министерот за образование Перо Стојановски во одговорот на интерпелацијата за неговата работа, поднесена од опоцизијата.
- Фактите говорат дека за краток период се започнати крупни и големи промени за чие заживување е потребно време. Реализацијата на започнатите проекти паралелно се одвива во повеќе области и тоа во делот на развојноста во образованието, вложување во човечките ресурси, подобрување на инфраструктурата, зајакнување на соработката со локалната самоуправа и на сите три нивоа на образование, основно, средно и високо. Со реформите се создаваат генерации со европски квалификации - рече Стојановски.

Министерот истакна дека во изминатите две години, вложувањето во образованието било приоритет за разлика од претходниот период, напоменувајќи дека воопшто не е лесен процесот за воведување промени во образованието, кон кои отпорот е голем.
- Најтешко се менуваат предрасудите, невистините, недостатокот на мотивација и апатијата предизвикана од недостаток на иницијативи. Овие состојби лежат во основата на отпорот за промена. И тие претставуваат најсериозни бариери за остварување на целите. Целите произлегуваат од визијата за образование, а тоа е образование спремно да одговори на предизвиците на 21 век. Отпорот ќе биде дотолку поголем и поизразен доколку луѓето не се научени на промени и доколку многу долго не биле соочени со промена. А, немањето предизвик во промена беше карактеристика на изминатите 17 години. Ако барате виновник за тоа што немаше ниту една промена, обична, стратешка, реформска во изминатиот период, јас таа вина нема да ја прифатам. Таа не е моја.

Но, најодговорно ја прифаќам улогата да бидам еден од најповиканите носители на промените на овие состојби, со целиот ризик и предизвик што соочувањето го носи со себе - истакна Стојановски.

Министерот ги објасни целите на проектите во образованието со воведувањето на деветолетката, англиски јазик во прво одделение, спроведување државна матура, бесплатни учебници, сместување и превоз за одредени категории ученици, отворање факултети во повеќе градови во државата, инвестирање во човечките ресурси, екстерното оценување, ... Стојановски посочи дека се зголемени платите на вработените во образованието и оти ќе се реализира и нивното барање за повисоки износи на надоместите за храна и превоз.

Пратеничката на СДСМ Славица Грковска-Лошкова во образложението на интерпелацијата го критикуваше однесувањето на министерот за образование во текот на штрајкот организиран од СОНК и оцени дека во таа дејност во изминатите две години имало се, освен сериозен концепт.
Според Грковска-Лошкова, со своето работење министерот Стојановски овозможувал воспоставување политичка контрола на државните универзитети.

Според Владо Бучковски, министерот треба да си замине од функцијата бидејќи направил серија грешки. Голем пропуст на Стојановски, смета Бучковски, е што дозволил вклучување на ректорите на државните универзитети во изборот на кандидатат за претседател на државата од ВМРО-ДПМНЕ.

... i kolku Vecer da se trudi da gi prenese vo blaga forma govorite i da gi interpretira na svoj nacin... edno e jasno...Pero Stojanovski... so aferite za honorarite, so pritisocite vrz prosvetarite za vreme na shtrajkot, so aferite so ucebnicite, so aferite so dogovorite na dogovorcite...kompjuterite...i shto li ne kje bide zapamten kako KJE minister...