Почина Малколм Мекларен  

Малколм Мекларен, менаџерот на легендарната панк група Секс Пистолс, почина во Швајцарија во 64. година од животот.

„Почина во болницата во Швајцарија каде се лечеше од рак,“ изјави неговата девојка Јанг Ким, јави Ројтерс.

Сестраниот Мекларен беше основач и на други бендови, како Bow Wow Wow, напиша опера, а во 2000-та година ја разгледуваше и можноста да стане градоначалник на Лондон.

Мекларен, инаку син на шкотски инженер е роден во Лондон и беше прв кој во својот бутик во 1971 година продаваше панкерска облека, три години пред појавата на панкот.

Во 1975 година стана менаџер на њујоршкиот бенд „Њујорк Долс“, а по враќањето во Лондон беше клучна фигура во основањето на “Секс Пистолс“.

Иако траеше само две години, овој бенд остави една од најдлабоките траги во историјата на рокенролот.

Мекларен снимаше и свои материјали, а најпознат е неговиот хит од осумдесеттите "Double dutch".

Malcolm McLaren - Double Dutch