КОШАРКА - новости

DA! DA! DA!

Утре имаме последна шанса за Евробаскет 2009

Машката кошаркарска селекција на Македонија има последна шанса против Естонија, утре , да си ја врати својата и самодовербата на домашната спортска јавност, пред расплетот во квалификациите за Европското првенство во Полска идната година.

Коментарите за неочекуваниот пораз во Коимбра, продолжуваат, португалскиот комплекс сеуште боли.

Менталитетот е најчест збор употребуван за полесно да се разбере неуспехот на избраниците на Јовица Арсиќ против истата селекција што во овој циклус на почетокот на септември, ја декласиравме со 37 коша разлика во Скопје.

Но на 24 часа до финалниот двобој со Естонија време е да се остави зад себе непријатната епизода и со победа над Естонија да се разубави полската виза и враќањето во елитното евро друштво.

Никако да ги избегнеме фамозните калкулации, иако е јасно дека со триумф над Естонците и теоретски ќе бидеме дел од континенталниот шампионат.

Втори сме во групата и една од трите селекции кои и од оваа позиција одат директно во Полска, откако за нас одработија некои други.

А можеме да бидеме и први, и привилегирани во ждребот, но и тоа сега зависи од други. Калкулациите за пораз им ги оставаме на најголемите песимисти. Оптимистите кои ќе бидат во салата „Борис Трајковски“ од 20 и 15, знаат дека во Талин славевме против Естонија со 90:78.

Кошаркарската Федерација на Македонија објави дека билетите за натпреварот против Естонија во Скопје, закажан за сабота, ќе бидат пуштени во продажба во петок, во билетарницата на салата “Борис Трајковски“, и тоа од 10 часот наутро. Билети ќе се продаваат во билетарницата и во сабота.

http://www.basketball.org.mk/novost.asp?id=2591

Кошаркарите денеска против Португалија

Македонската кошарка тропна и ја отвори портата што води во европската елита. Но, прагот треба да го мине во Коимбра.

Португалија е наш вечерашен противник во квалификациите за шампионатот во полска во 2009-та.

Црвено - жолтиот баскет е пред две слободни фрлања кои значат Европско првенство. Првото е на португалски паркет, второто на домашен в сабота против Естонија.

Две победи ќе не однесат на собирот на најдобрите и тука е големата шанса пред која стојат и со две раце треба да ја зграпчат македонските кошаркари.

Решаваме сами, со максимално остварување во двете преостанати средби ќе бидеме први во групата и сигурни патници за Полска. Најтешкото го одработивме, останува само рутинскиот дел.

Секако, со секогаш потребната скромност и претпазливост, без оглед што ги прегазивме Португалците во салата „Борис Трајковски“.

Вечерва отвораме нова приказна, но и во неа очекуваме среќен крај, значи Македонија да се врати на Европските првенства по пауза од десет години.

конечно ВИСТИНСКОТО ЗНАМЕ 

Имаме одлично "време на минување"

Половина од патот за Полска е одработен, што би се рекло изоден.

Н$ чека уште половина, онаа втората, од етапата која води на ЕП.

По онаа првата имаме добро, може да се каже и одлично "време на минување". Сме на скор од две победи и еден пораз, повеќе-помалку очекуван.

Да, можеше да биде и подобар, односно стопроцентен нашиот ефект по трите одиграни натпревари да не ни се случија нереализираните "пенали".

Но тие полека паднаа во заборав откако ја исправивме таа грешка со добрата, на моменти и одлична игра во Талин, особено во второто полувреме.

Но и вака не е лошо, ќе кажеме дека развојот на ситуацијата, не само во нашата "Б" група, оди во наша корист, се развива според нашите желби.

Но тоа е само половина од работната задача во овие квалификации кои од јавноста се одамна оценети како шанса на генерацијата.

А токму еден од оние кои се дел од оваа генерација а е со најмал работен (временски) стаж е Џеремаја Мејси.

По нешто месец и кусур откако е дел од "црвено-жолтиот" состав, нашиот голем адут размислува онака како што тоа може само еден голем професионалец.

Популарниот "Мејс" и против Естонија ги докажа сите свои квалитети. Можеби не прикажа целосна стабилност (имаше и некои избрзани, нерезонски шутеви), но нашето силно крило погодуваше кога треба. Го имаше кога тоа ни беше потребно, посебно во нападот. На крајот излезе и прв стрелец со 20 реализации, и прв скокач со 10 остварени скока (три офанзивни).

Мејси не сака да се враќа многу на овој натпревар. Новиот член на Реал Мадрид е веќе свртен кон наредниот, оној в сабота со Летонија во Скопје.

Следниот натпревар е секогаш најважен, затоа и треба да го заборавиме овој во Талин. Естонија е добар тим, но ние бевме подобри од нив, би рекол поспособни да победиме. Сега е едноставно, треба да се вратиме дома, да потренираме уште некое време и да бидеме подготвени за следниот натпревар. За она што н$ очекува против Летонија. Репрезентација која н$ задолжи пред десетина дена. Сигурен сум дека на домашен терен нема да ја испуштиме шансата за реванш. Впрочем, ги испуштивме во Рига, нема да го повториме тоа во Скопје"- порача уште од Талин Македонецот со американски пасош, и тоа само десетина минути по успешно завршната задача, да се освои главниот естонски град.

ПЕРО АНТИЌ ДОЈДЕ НА СВОЕТО

Уште ништо не сме освоиле

Перо Антиќ го продолжи трендот на добри игри и во Талин. По Португалија, нашиот крилен центар делуваше уште посигурно, особено во фазата на нападот.

Погоди неколку шута од надвор, имаше и едно сјајно забивање, колку да ја "растури", да ја "рашири" противничката одбрана.

"Силно ја посакувавме оваа победа во Талин. Не само поради тоа што ни се случи лани, кога н$ изненадија. Овој пат не можеше да се случи такво нешто затоа што одигравме доста паметно, зрело, со голема доза на верба во сопствените можности, кои се сигурно поголеми"- вели Антиќ.

Победа која во голема мера ни ги зголемува шансите за "премин" на ЕП во Полска?

"Не треба сега да се залетуваме и да велиме дека сме ја завршиле работата. Па уште ништо не сме освоиле. Да, победивме на гостински терен, и може да се каже дека сме завршиле 90% од работата. Но далеку од тоа дека тука е крајот и дека треба да почнеме да се радуваме. Ништо не сме направиле во Талин ако в сабота не ја победиме Летонија пред наша публика во Скопје. Со нивна огромна помош, споена со нашите квалитети, ќе тргнеме во реванш против Летонците. И во Рига покажавме дека сме подобри од нив, сега ќе го докажеме тоа каде што треба, пред своите фанови кои ги повикувам в сабота навечер да ја исполната салата "Борис Трајковски" и сите заедно да се радуваме на уште еден триумф со кој уште повеќе ќе се приближиме кон Полска" - порачува Антиќ.

Четврток - "неработен" ден

Задоволен од прикажаната игра, секако и триумфот во Талин, кој на крајот може да се покаже и како решавачки во конечниот ерпилог во групата"Б", селекторот Јовица Арсиќ го прогласи четврток за "неработен ден".

Разбирлива одлука на селекторот особено ако се знае дека добар дел од репрезентативците по враќањето во Скопје, чувствуваа голем замор од напорите во изминатите 24. часа.

Затоа од денеска се ќе "оди по старо". Утринскиот тренинг е предвиден за 11, а попладневниот за 18. часот.

Сем тоа, од денеска се очекува на националниот тим да му се приклучат и Дарко Соколов и Марјан Ѓуров кои не беа во комбинација за натпреварот со Естонија.

ТАНЕЛ ТЕИН (БЕК НА ЕСТОНИЈА):

Во сe беа подобри од нас!

"Кога ќе ја погледам статистиката, не можам да видам ниту една работа во која сме подобри од противникот. Ова е прв натпревар по кој имам едно такво чувство, кога едноставно нема начин да победиш. Едноставно кажано, вечерва беа подобри од нас".

ИЛАР КЕРДЕ (СЕЛЕКТОР НА ЕСТОНИЈА):

Не е крај на светот

"На овој натпревар покажавме дека сме способни да се одбраниме од нивната бековска линија. Но, нивната челна линија беше несопирлива.

Но, за мене ова не е крај на светот. Имаме уште еден натпревар в сабота каде ќе ни треба голема борба за да победиме".

КОЛКУ Е МАЛ СВЕТОТ ?

Со Летонците во ист авион за Скопје

И тоа може да се случи. Лути противници во квалификациите да се најдат во ист авион.

Тоа им се случи на нашите кошаркари, кога на аеродромот во Прага во просторот предвиден за "чекирање" на авиобилетите се сретнаа со колегите од репрезентацијата на Летонија.

Заедно со саботниот противник патуваа во Скопје, каде, видно заморни (рано заминување од Талин за Прага), "црвено-жолтите" пристигнаа околу 13.30 часот.