Црвено - црни новости

ТИМ - МЕНАЏЕРОТ НА ВАРДАР, РАТКО ДОСТАНИЌ, ЕДВАЈ ЧЕКА ДА ПОЧНЕ ДЕРБИТО СО ПЕЛИСТЕР

Нема проблем, ја преземаме улогата на фаворит!!!

*"Проблем беше оваа тринеделна пауза, сите со нетрпение го чекаме дуелот со вечниот ривал, јасно е дека сме фаворити и не бегаме од таа улога", потенцира Достаниќ

Конечно по тринеделна пауза, в сабота, на "Градски" во Скопје најголемиот фаворит за титулата во овој шампионат ќе одигра натпревар. Втор откако стартуваше оваа сезона. Досегашниот биланс е еден меч, три бода и гол разлика 3:0. Победа падна во Скопје на 3 август. Сега на ред е вториот пелагониски прволигаш, Пелистер од Битола.

"Сите ние во Вардар, а посебно јас како прв човек во стручниот штаб едвај посакувам да дојде сабота и вечното дерби со Пелистер. Ова тринеделна пауза навистина ни направи проблем. Се обидовме преку неколку пријателски и контролни средби да го задржиме натпреварувачкиот ритам, но, сепак, официјални мечеви се нешто сосема друго. Затоа велам дека со нетрпение го чекаме саботно вечно дерби со Пелистер", посочува тим - менаџерот на Вардар, Ратко Достаниќ.

Во домашната фудбалска јавност на неколку дена пред овој натпревар како ретко кога Вардар се посочува како апсолутен фаворит. Доказ дека е така е и коефициентот во обложувалниците за победа на домашните кој изнесува 1.35.

"Искрено воопшто не ме интересираат тие коефициенти и слични глупости поврзани со обложувалниците. Мене ме интересира како Вардар ќе одигра. Што се однесува, пак, до улогата на фаворит, ќе повторам она што го кажав на првата прес - конференција како тренер на Вардар. А тоа е дека сум свесен дека Вардар во овој шампионат на секој меч ќе ја има улогата на фаворит. Затоа потенцирам дека нема проблем да ја прифатиме оваа улога и на овој и на сите останати натпревари. Тоа можеби е своевиден притисок за нашите фудбалери, но се знае што значи Вардар и тие мораат по секоја цена да играат со таков притисок", заврши Достаниќ.



Вардар да има што повеќе репрезентативци

Достаниќ не гледа никаков проблем што дури тројца од неговиот тим престојуваат во Луксембург, тоа се Томе Пачовски, Мирослав Вајс и Артим Положани.

"Најважно е сите тројца да одиграат квалитетно, да се вратат здрави и без повреди. Има два дена да се 'вратат' во нормала, зошто тие се искусни професионалци и нема да има никаков проблем да се аклимитизираат пред дербито. Инаку, камо среќа бројот на репрезентативци од Вардар да биде што поголем. Кога најтрофејниот клуб во Македонија ќе има 7-8 репрезентативци тогаш Вардар ќе биде голем клуб, ние се стремиме кон тоа да го оствариме", дополни Достаниќ.

Од Битола се најавуваат 500 "чкембари"

Од канцеларијата на Вардар информација дека и гостинот од Битола ќе има свои навивачи. Според спортскиот директор на "црвено - црните", Саше Милошевски, од таборот на Пелистер се најавувало бројка од 500 навивачи кои в сабота ќе пристигнат во Скопје и ќе го бодрат својот тим на ова наше вечно дерби. Се разбира дека далеку погоголем ќе биде бројот на домашните навивачи кои ќе му дадат поддршка на својот Вардар во надеж дека ќе ја забележи и втората победа. Значи покрај битката на теренот се очекува и навивачки "дуел" меѓу "Комитите" и "Чкембарите".

Билетот ќе чини 60 денари

Продолжува акцијата на Вардар со цел на натпреварите кога е домаќин да привлече што поголем број гледачи. Да ја врати публиката на "Градски". Ако на првиот меч со Победа влезот беше слободен и имаше околу 4.000 гледачи, в сабота на дербито со Пелистер билетот ќе чини симболични 60 денари. Со тој билет секој гледач ќе добие гратис знаменце со лого и боите на клубот, како и освежувач за автомобил.