Вести

ЈОНУЗ СО СПИСОКОТ НА НАДЕЖИТЕ ЗА ДУЕЛОТ СО ЕСТОНИЈА

Трета среќа со Славковски

Младиот напаѓач од италијанскиот првак Интер дал гаранција дека сигурно ќе допатува и ќе го има дебито за Македонија




Третиот официјален обид Горан Славковски да го облече дресот на репрезентацијата на Македонија се чини ќе роди со успех. Големиот фудбалски талент од редовите на италијанскиот првак Интер, се наоѓа на списокот од 18 млади играчи за претстојниот натпревар со Естонија на 20 август во Талин, во рамките на 5. квалификациска група за ЕП 2009.
Овој пат дебито на Славковски во црвено-жолтиот дрес е сигурна работа, зашто селекторот Мирсад Јонуз добил гаранција од него дека со сигурно ќе ја прифати поканата.
Претходно Славковски во повеќе наврати најавуваше оти сака да игра за Македонија, но тоа досега не се остваруваше. Селекторот Јонуз прв пат официјално го покани за тестовите со Црна Гора и Албанија во март, но Славковски отсуството го оправда со стомачен вирус. Младиот напаѓач, кој во Интер го најавуваа како "втор Ибрахимовиќ" доби покана и од селекторот Сречко Катанец да учествува во подготовките за тимот на најдобрата репрезентација за квалификациската средба со Израел од ЕП 2008, но и тогаш Швеѓанецот со македонско потекло го оправда недоаѓањето со повреда, што тогаш беше потврдено и од клупскиот лекар на "нероазурите".
Сега нема никака пречка Славковски да го оствари долгонајавуваното и очекува деби за Македонија, бидејќи е здрав, а завршени се и сите формалности околу неговите патни исправи.
На списокот од Јонуз, покрај Славковски се наоѓаат уште: Кристијан Наумовски и Трајче Ников (голмани), Даниел Георгиевски, Ардијан Цуцули, Владимир Деспотовски, Даниел Мојсов, Глигор Глигоров, Душан Симовски (одбрана), Арменд Алими, Александар Ангеловски, Сашко Пандев, Севдаиљ Селмани, Арџент Гафури, Агим Ибраими (среден ред), Зоран Златковски, Самир Фазли и Иван Тричковски (напад). Собирот на репрезентатците е на 14 август во Струмица, каде ќе имаат тридневни подготовки. Поради клупски обврски задоцнување најавија Тричковски (Ц.звезда), Златковски (Славија, Софија) и Селмани (Баер, Леверкузен).
- Ни остануваат уште две средби од овој квалификациски циклус. Нашата енергија ќе биде насочена што подобро да се подготвиме и да ја победиме Естонија. За тоа ќе треба добро да се подготвиме и на психолошки план, а желбите да ги преточиме во игра. Имаме обврска да освоиме што е можно повеќе бодови и да се искачиме на второто место што ќе ни донесе шанса да го задржиме во последната средба со Норвешка, вели Мирсад Јонуз за сајтот на ФФМ.
Македонија моментно е 4-та на табелата со 8 бода од 6 средби, два помалку од Швајцарија и Норвешка, која има и средба помалку. Холандија е неприкосновена, прва со 15 бода (6 средби), а Естонија е последна.
Македонија со евентуална победа над Естонија, над која славеше во Скопје (1:0), и над Норвешка, која би требало да киксне на гости против Швацарија или Холандија, може да се надева на 2. место што на четирите екипи со најдобар скор им носи место во баражот, покрај 10-те победници во групите.

Оди каде сакаш, само не во Реал!

Алекс Фергусон му кажал на Кристијано Роналдо дека ова лето може да замине во кој сака клуб од Европа, дури и во Барселона, само не во Реал Мадрид. Ваквата порака Португалецот ја добил минатиот месец во Лисабон кога првпат се сретнал со Фергусон по завршувањето на сезоната. Во исто време, според Марка, Барселона исто така се залагала да го добие Роналдо во своите редови, а Ферги му рекол на својот фудбалер дека може да се пресели на Ноу Камп за половина од парите што во тој период ги нудеше Реал Мадрид.

Сето тоа е доволен показател колку биле влошени односите меѓу Реал Мадрид и Манчестер Јунајтед во минатиот период откако англискиот и европски првак го обвини "Кралскиот клуб" дека сака да му го "украде" најдобриот играч, а дури и испрати жалба до УЕФА. Од друга страна, Роналдо категорично му кажал на својот тренер дека Реал Мадрид е единствениот клуб каде би сакал да ја продолжи кариерата и дека ако не оди таму ќе остане на Сантијаго Бернабе барем на уште една сезона. Освен тоа, Роналдо им рекол на своите пријатели во Реал дека ако идното лето не му биде дозволено регуларно да се пресели во редовите на шпанскиот првак, самиот ќе го реализира трансферот.

Според други извори, Реал со Роналдо го направил истиот трик како со Луис Фиго во 2000 година кога Португалецот ја напушташе Барселона. Наводно, Фиго тогаш имал преддоговор со Реал и ако сакал да го раскине ќе морал на мадридскиот клуб да му исплати отштета во висина од тогашни 30 милиони марки или неговиот агент ќе завршел во затвор. Токму затоа сега Реал најави дека ќа бара отштета од Роналдо за нереализираниот трансфер, и тоа во висина од 17 милиони фунти.

Приказната за Роналдо излезе од контрола

Спортскиот директор на Реал Мадрид, Предраг Мијатовиќ, призна дека трансферот на Кристијано Роналдо никогаш не бил толку блиску до реализација како што наведуваа медиумите и од Англија и од Шпанија.

"Се разбира дека бевме заинтересирани, но само медиумите го доведоа трансферот пред реализација, а реално не беше толку блиску. Таа приказна околу него доби големи димензии, па дојде до ситуација која беше тешко да се контролира. А реалноста е многу јасна: Роналдо е најдобар светски фудбалер под договор со моќниот и силен Манчестер Јунајтед и ако тие не сакаат да го продадат, од работата нема ништо", рече Мијатовиќ.

НЕ СТИВНУВААТ ПРОБЛЕМИТЕ ШТО ГИ ПРЕДИЗВИКА ОЛИМПИЈАДАТА

Шалке го тужи ЦБФ

Фудбалската федерација на Бразил (ЦБФ) е огорчена од одлуката на Шалке да го казни Рафиња затоа што тој не се појавил во понеделникот во тренинг-кампот на бундеслигашот, туку останал со својата репрезентација на Олимпијадата во Пекинг. На еден ден пред фудбалскиот турнир на Игрите, Меѓународниот спорт за арбитража донесе одлука според која клубовите имаат право да ги вратат своите фудбалери што настапуваат во Пекинг, па Шалке одлучи да го повика Рафиња за натпреварот против Атлетико Мадрид во третото квалификациско коло од Лигата на шампионите. Освен тоа, Шалке одлучи да испрати жалба до ФИФА против ЦБФ во која бара по секоја цена Рафиња да биде ослободен од обврските и вратен во Германија.

"Се надеваме дека со решението на ЦАС оваа дилема е решена. Всушност, Фудбалската федерација на Бразил не ни остави друг избор", изјави генералниот менаџер на Шалке, Андреас Мелер.

Примерот на Шалке го следеше и Хамбургер, кој испрати официјално барање до Фудбалската федерација на Белгија да биде пуштен Винсент Компани во најкраток можен рок.

Тупан: Никогаш повеќе!!!

* "Јас не сум проститутка за да пополнувам место кога селекторот има проблеми. Чекав шанса и не ја добив па затоа додека се овие паразити на функции јас нема да играм за националниот тим", коментира фудбалерот на Славија од Софија

"Немам ништо против Среќко Катанец", беше првиот коментар на фудбалерот Славчо Георгиевски по неговата реакција и најава дека повеќе нема да се јавува на повик во националниот тим.

"Додека владее овој режим во ФФМ и додека 'паразитите' се дел од стручниот штаб на Катанец јас не сакам да бидам дел од националниот тим. Мислам дека заслужив шанса за настап која не ја добив. Не сакам да бидам како проститутка и секогаш да чекам некој да отпадне поради повреда или картони и тогаш да ме повикаат да пополнувам место", додава популарниот Тупан, кој летово од кинескиот клуб Женжанг Личенг се врати во Славија Софија. Фудбалерот од средниот ред е револтиран на односот на некои луѓе во стручниот штаб на Катанец.

"Селекторот мислам дека има погрешни информации за случувањата со фудбалерите. Некои луѓе упорно форсираат одредени играчи кои постојано се во националниот тим. Резултатите ги нема, а нема и нови фудбалери на позициите каде со години се појавуваат слабости. Би ги прашал само за што служат тест средбите!? Истата слика се повторува со години и години и затоа од циклус во циклус сме с$ послаби и послаби. Не ни треба селектор па ни стручен штаб за 5 место од 7 селекции во друштво со Андора и Естонија. Секој може да го направи тој пласман", додава Георгиевски, кој веќе 7-8 месеци беше на поширокиот список во составот на Катанец. Причина за ваквата реакција на Георгиевски е тоа што неговото име не беше на списокот за претстојниот дуел со Луксембург.



"Можеби сум еден од ретките фудбалери кои се пробиваат во својата кариера без настапи во националниот тим. Мој приоритет во иднина ќе биде настапот за Славија, а потоа се надевам на нов трансфер. Важно е тоа што јас лично сум задоволен од моите игри, а истото важи и за тренерот и луѓето во Славија. За жал, некои луѓе сето тоа упорно го занемаруваат. На тие 'стручни' лапачи нека им служи на чест. Би им порачал да се погледнат во огледало и да се видат какви биле пред 4-5 години, а на што личат сега. И самите ќе забележат дека се здебелиле затоа што се претвориле во паразити. Некогаш и од многу лапање боли глава, но се надевам дека многу брзо ќе се расчисти овој хаос во фудбалот во Македонија. На сите страни ни се смеат за тоа што се случува кај нас и лично мене ми е незгодно од таквата лоша слика која ја има во светот за нашиот фудбал. Можеби многу брзо работите ќе си дојдат на свој колосек", говори во завршниот коментар Славчо Георгиевски, фудбалерот кој никогаш не ја доби вистинската шанса во националниот состав.

Не мора да биде Славчо

"Не сакам да бидам погрешни разбран. Ако со години сите анализи кажуваат дека наш најголем проблем е играта во средниот ред тогаш зошто на таа позиција не се пробаат некои други фудбалери. Не мора да биде Славчо Георгиевски. Слушам дека одлично во Литванија играат Божиновски и Милошевски. Неџипи!? Еве се сетија на Демири...Сите селекции бараат решенија за болните точки а кај нас ништо не се менува", коментира популарниот Тупан.

Не личиме на репрезентација

"Дремеме по аеродроми, чекаме по амбасади, патуваме со редовни линии... Репрезентација ли е тоа!? Претставуваме држава а се однесуваме како аматери и како загубени патници низ европските метрополи. Срамота!!! Некои луѓе треба да се освестат и да размислат околу третманот на националниот тим и третманот кон играчите кои не го заслужуваат тоа. За жал некој друг профитира од сето тоа што му се случува на националниот тим кој веќе подолго време не знае што е тоа чартер лет а срамот се случи на последното патување за Штутгарт од каде се враќавме како распадната банда а не како фудбалери кои ги бранат боите на Македонија", вели Славчо Георгиевски.

Уште еден бунт

Славчо Герогиевски со овие најави сигурно влегува на црната листа во националниот тим и списокот на Среќко Катанец. А таму не е сам. Таму имаме и други фудбалери и тоа не било кој туку еден Александар Митрески од бундеслигашот Келн, па Роберт Попов од францускиот Оксер, Ндерим Неџипи од белгискиот Лирс.

Ето сега е по меракот на Гвардиола

Позната е барем блиската иднина на репрезентативецот на Камерун и голгетер на Барселона, Самуел Ето. Новиот тренер на каталонскиот гигант, Пепе Гвардиола јавно потврди дека црномурестиот напаѓач и во новата сезона ќе настапува на Ноу Камп.
- Пред да ме прашате сакам да ви кажам дека Ето и во новата сезона ќе биде дел од Барселона. Знам дека на неколку пати повторив дека не е во моите планови, но тие изјави беа дадени пред стартот на подготовките. И сами знаете дека може да дојде до измена на планот пред официјалниот старт. Демонстрираше невидена желба за време на подготовките, беше голгетерски расположен и решив да го задржам. Јас имам за задача да го извадам максимумот од сите фудбалери. Од кога ќе го направам тоа одлучувам кој ќе биде во првиот, а кој во вториот тим, изјави Гвардиола.
Освен дека смета на Ето, тренерот на Барса, потврди дека нема шанси да се раздели од репрезентативецот на Франција, Тиери Анри.
- Имам потреба од двајцата. Исто така сум задоволен од играта што ја покажа Анри за време на подготовките. Знам дека постоеше опција да се разделиме со него, но тука јас сум тренер и јас одлучувам кој ќе остане, а кој не. Презадоволен сум од неговата форма и убеден сум дека повторно ќе ги тресе противничките мрежи, изјави Гвардиола.

ДЕНЕСКА ПОЧНУВА 46. ИЗДАНИЕ НА БУНДЕС-ЛИГАТА

Кој најблиску до Баерн?

Традиционално, со натпреварот на актуелниот шампион, во овој случај Баерн Минхен, вечерва почнува 46. издание на германското првенство, Бундес-лигата. Многу работи навестуваат дека ќе гледаме слична сезона како минатата со оглед на случувањата во летниот период. Како и најчесто во последната деценија, повторно најголем фаворит за шампионската титула е нејзиниот актуелен бранител Баерн Минхен иако традционалните ривали во последните сезони не се согласуваат со мислењето на најголемиот број љубители на фудбалот во земјата.

Дури 16 од 18 тренери во Бундес-лигата во моментов го гледаат Баерн како нов првак на Германија. Со тоа се согласуваат и тренерите на Вердер, Шалке, и Хамбургер, но не Криштоф Даум од Келн и Феликс Магат од Волфсбург кои веруваат токму во ланските најблиски конк*ренти на баварскиот клуб.

Освен што како и секогаш е фаворит за титулата, во Баерн оваа сезона пожнува нова ера - ерата без Оливер Кан на голот и на Јирген Клинсман, но не како играч, туку како тренер. Поранешниот прославен германски репрезентативец минатиот месец го замени Отмар Хицфелд на клупата на Баерн и уште веднаш почна да го чувствува притисокот што го носи оваа функција. Сфати дека се освен двојна круна и пласман најмалку во полуфиналето од Лигата на шампионите идната сезона е неуспех. За разлика од лани кога потроши над 100 милиони евра, Баерн ова лето не даде ниту цент за ангажирање нови фудбалери. Ги донесе Тим Боровски од Вердер и Ханс-Јерг Бут од Бенфика, но двајцата беа слободни играчи и не мораше да плаќа за нив. Тоа и се очекуваше бидејќи клубот во претходната сезона ги немаше вообичаените приходи од Лигата на шампионите, но и лани направи доволно силен состав кој годинава ќе има уште адут на своја страна: една сезона играње заедно. Навивачите во моментов се плашат само од стартот на сезоната. Рибери и Тони се повредени, а тоа се главните фудбалери на клубот, истото се однесува и за Демикелис, Сањол и голманот Бут. Кога тие ќе се вратат во тимот, Баерн ќе биде страв и трепет за сите во Бундес-лигата.

Како и лани, главни конк*ренти на Баерн ќе му бидат Вердер и Шалке со таа разлика што љубителите на фудбалот во Германија очекуваат да ги сменат местата на табелата. Вердер летово остана без Боровски кој го засили Баерн, а на негово место не донесе соодветно засилување, па Томас Шаф повторно ќе се потпре на Диего. Лани Вердер имаше неколку фантастични победи од 8:1 против Арминија, 6:1 против Хановер и 5:1 со Шалке, но затоа и загуби неколку натпревари каде беше изразит фаворит како Бохум, Дуисбург и Волфсбург. Од тие причини се очекува и сезонава да биде уште понестабилен тим. Од друга страна, Шалке стартува со нов тренер, Фред Рутен кој лани со Твенте направи големо изненадување во холандското првенство, па сега сите очекуваат да го повтори истото со Шалке. Младите таленти од лани како Ракитиќ, Нојер, Пандер и Рафиња веќе пораснаа, клубот го донесе Фарфан, па сега на Шалке не му недостасува ниту желба за големи достигнувања.

Интересно, но познавачите на фудбалот во Германија сметаат дека најголемо разочарување ќе биде Хамбургер. Лани четвртопласираниот тим летово остана без најдобриот фудбалер Рафаел ван дер Варт, но не донесе фудбалер кој барем малку ќе може да го замени. Уште повеќе, од Хамбургер кој сега ќе биде предводен од мартин Јол, се очекува да заглави во средината од табелата, зад Волфсбург и Баер Леверкузен.

НАЈСКАПИТЕ 10 ТРАНСФЕРИ ВО БУНДЕС-ЛИГАТА ЛЕТОВО:

Играч од во сума

1. Андреа Барѕаљи Палермо Волфсбург 14 мил. евра

2. Џеферсон Фарфан ПСВ Шалке 10 мил.

3. Ренато Аугусто Фламенго Баер 10 мил.

4. Кристијан Ѕакардо Палермо Волфсбург 10 мил.

5. Орландо Енгелар Твенте Шалке 7 мил.

МАКЕДОНСКАТА РЕПРЕЗЕНТАЦИЈА ВЕЧЕРВА (ТВ Сител 20.15 ч.) ПРОТИВ ЛУКСЕМБУРГ ГО ИМААТ ПОСЛЕДНИОТ ТЕСТ ПРЕД СТАРТОТ НА КВАЛИФИКАЦИИТЕ ЗА СП 2010

Пандев: Секогаш на победа!!!

*"Да се одигра добро и да се стигне до триумф за што подобра атмосфера пред пресудните средби со Шкотска и Холандија", е најавата на нашиот најодбар фудбалер

Македонија е фаворит за победата вечерва во Луксембург против просечната домашна селекција. Квалитетот, рејтингот, но и формата се на наша страна и затоа треба да очекуваме полн погодок од ова гостување по серијата од три нерешени на последните тест средби со Србија (1:1), Б и Х (2:2) и Полска (1:1). Овој дуел е посебно важен со оглед на тоа дека селекторот Среќко Катанец ќе ја има последната проверка на силите пред "пеколниот септември" и квалификациските дуели со Шкотска и Холандија на "Градски". Таму во Луксебург вечерва најмногу се очекува од најдобриот. Горан Пандев е во фокусот и тој треба да биде главниот играч во нашиот напад:

"На ваквите натпревари како овој вечерва со Луксембург приоритет е добрата игра, но секако и резултатот. За нас главниот фронт е во септември. Тие дуели со Шкотска и Холандија се нашата главна цел и средби од кои ќе зависат сите наши амбиции во циклусот за пласман на СП", коментира Пандев од хотелот "Новотел" во Луксембург.

За фудбалерот на Лацио денешниот противник е непознат. Очекува добар дуел, голови и победа:

"Не само против Луксембург туку на секој меч ние играме на победа. Со максимален респект и со максимално залагање на теренот може да стигнеме до посакуваната цел. Нашата игра е таква - напаѓачка. Луксембург не е селекција која има висок рејтинг па затоа се надевам дека ќе стигнеме до триумф со кој ќе се избориме за добра атмосфера во репрезентацијата пред она што н$ очекува во септември".

Катанец денеска на располагање ќе има само 16 фудбалери, а меѓу нив повторно е Величе Шимуликоски, кој не настапи на дуелот со Полска поради повреда. Речиси и нема ништо ново во стартниот тим со оглед на тоа дека во првите 11 се очекува и кам-бек на Илчо Наумоски. Одбраната е онаа стандардната, а таму и еден од столбовите - Николче Новески.

"За мене Луксембург е непознат тим. Ние сме поквалитетни, но тоа треба да го докажеме на теренот. Во денешно време нема слаби селекции. Посебно не во Европа...", коментира дефанзивецот на Мајнц.

Само за потсетување дека Македонија нема пораз на тест средбите откако Среќко Катанец е на чело на нашата најодбра селекција (не се смета стартниот пораз со Бугарија).

И. Д. Ивановски

МЕЃУНАРОДЕН ПРИЈАТЕЛСКИ НАТПРЕВАР
Луксембург - Македонија
Стадион: "Јоси Бартел" во Луксембург. Капацитет: 8.350 гледачи. Почеток: 20.15 часот.
Главен судија: Бант Бругер - Австрија

ЛУКСЕМБУРГ (4-5-1): Жубер, Гајпус, Хофман, Кинцигер, Мартино, Бедмер, Жексон, Пајал, Муч, Левек; Китанге.

Селектор: Гај Хелес
ФИФА рејтинг: 152

МАКЕДОНИЈА (3-4-1-2): Милошевски, Митрески, Седлоски, Новески, Попов, Лазаревски, Шумуликоски, Тасевски, Пандев, Наумоски, Мазнов.

Селектор: Среќко Катанец
ФИФА рејтинг: 54

Горан Мазнов оди на рекорд

Мајсторот за голови на пријателски средби вечерва ќе ја напаѓа и мрежата на Луксембург. Горан Мазнов брка рекорд и ќе се обиде да биде првиот фудбалер на Македонија, кој на трет меч во серија се запишува во листата на стрелците. Тој со двата гола н$ спаси од дебакл, во Зеница ја тресеше и Полска, а еве сега на ред е и Луксембург. Згора на тоа фудбалерот на рускиот тим Томск со 10 голови е на 4 место на листата на најдобрите стрелци на сите времиња и се наоѓа зад Христов (17), Шаќири (15) и Пандев (12).

Секогаш со насмевки од Луксембург

Македонската репрезентација денеска го игра првиот меч со соодведната селекција на Луксембург. Земја која нема позабележителни резултати и држава од која македонскиот фудбал многупати се враќал со насмевки.

Пелистер и Работнички славеа на гостувањата во оваа земја во евро-куповите. Вардар одигра 1:1, но го елиминираше Дуделанж, а нашата селекција до 21 година победи со 3:0 на квалификациски меч. Вечерва нашиот најдобар состав ќе мора да ја продолжи добрата серија.

ФАКТИ ЗА НАШИОТ ДЕНЕШЕН ПРОТИВНИК

Марио Муч од Арау прва ѕвезда

Низ медиумите во Луксембург има мал интерес за денешниот дуел со Македонија. За нашиот национален тим речиси и ништо не се пишува, а низ некои спортски страници може да се прочитаат анализи околу тоа како Луксембург ќе игра во иднина без Себастијан Реми, кој се повлече од националниот тим пред еден месец. Ова е прв меч без фудбалерот на Дуделанж, а има и најави дека со неговото откажување е причината поради која Луксембург ја менува формацијата од 4-4-2 во 4-5-1.

Сепак, во моментов најпознат фудбалер на Луксембург е Марио Муч. Фудбалерот од средината на теренот за кого се напоменува дека е новиот Реми. Муч настапува во швајцарскиот тим Арау и тој заедно со Страсер (Мец), Жексон (Конгсвингер) и Китанге (Фрајбург 2) се единствените интернационалци.

Луксембург денеска ја има последната проверка пред квалификацискиот меч со Грција на 6 септември.