Вести

ПОРАНЕШНИОТ НАПАЃАЧ НА ВАРДАР ОСТАНУВА ВО ПОРТУГАЛИЈА, НО ВО ВТОРАТА ЛИГА

Вандаир една година во Варзим

Поранешниот напаѓач на Вардар, Бразилецот со македонски пасош Дос Сантош Вандаир го раскина договорот со португалскиот прволигаш Навал, меѓутоа и следната година останува во Португалија, сега во второлигашот ФЦ Варзим.

Вандаир, кој изминатата сезона воопшто не доби никаква шанса во Навал, а пролетниот дел го мина на позајмица во романскиот прволигаш Пандурии, сега се најавува како големо засилување за нападот на Варзим.

"Реализиравме навистина голем трансфер со доаѓањето на Вандаир со кого потпишавме едногодишен договор. Добивме засилување во нападот со кое ќе атакуваме на пласман во Првата лига", изјави при промоцијата на македонскиот Бразилец директорот на Варзим, Лопез Де Кастро.

Во досегашната своја кариера Дос Сантош Вандаир кој има запишано и репрезентативни настапи за нашата селекција, бил дел и од Цементарница 55 и Вардар во македонското првенство. Од 2006 до 2007 беше член и на германскиот Кикерс Офенбах, а минатата година од Вардар мина во редовите на Навал.

БИТОЛСКИОТ ТИМ ВО ПОСЛЕДЕН МОМЕНТ СО ЗАСИЛУВАЊЕ ЗА НОВАТА СЕЗОНА

Деловски се врати во Пелистер

*"Со задоволство ја прифатив понудата на раководството и мило ми е што во нареднава сезона ќе го носам зелениот дрес", вели фудбалерот од средниот ред

Во последен момент раководството на Пелистер ангажираше нов фудбалер за новата сезона. Златко Деловски по неколку години се враќа во Битола, онаму каде што го помина поголемиот дел од својата кариера. Ова е прво и единствено засилување за Пелистер, не сметајќи го Томи Јованов, кој по неполна година се врати од Германија.

Деловски потпиша на една година, со можност соработката да биде продолжена, се разбира доколку двете страни бидат задоволни.

"Сакам да му се заблагодарам на раководството на Пелистер на укажаната доверба. Бев навистина пријатно изненаден кога контактирав со нив и со задоволство ќе го носам зелениот дрес. Мојот договор е на една година, но престојот во Битола може да биде подолг доколку двете страни бидат задоволни од мојот ефект", вели офанзивецот.

Деловски практично се враќа во Пелистер. Токму од битолскиот прволигаш на почетокот на годинава направи трансфер во Ровињ, а по кусиот престој во хрватскиот тим се врати во домашното првенство, но во тетовска Шкендија.

Во неделата деловски го имаше и првиот тренинг со неговите соиграчи од Пелистер.

"Среќен сум што повторно сум во Пелистер. Токму тука го поминав поголемиот дел од мојата кариера каде што ме врзуваат одлични спомени. Би сакал во наредната сезона со битолчани во најмала рака да го повториме успехот од изминатава сезона, а зошто да не и повеќе", изјави Златко Деловски.

Деловски и Јовановски се единствените новаци кои се практично и повратници во Пелистер. На тренингот во неделата, кој беше прв по враќањето од Кипар, присуствуваа сите фудбалери. Она што треба да се потенцира дека тренерот Неџат Хусеин нема проблеми со повредени играчи, а единствено Блажевски се жали на мали болки на коленото, но, сепак, беше присутен на тренингот.



Се очекува финансиска "инјекција"

Не "цветаат рози" во таборот на Пелистер. Веќе подолг период финансиската ситуација во таборот на битолскиот прволигаш не е баш најдобра. Поради тоа клубот им должи извесна сума на фудбалерите. Според нашите неофицијални информации, се работи за две плати, неколку рати, како и премии за фатениот циклус победи, се разбира остварени минатата сезона. На првиот тренинг по враќањето од Кипар, никој од раководството на Пелистер не се појави на тренингот. Ветувањето стои дека по одигрувањето на реванш натпреварот против Апоел на Кипар и по враќањето финансиските обврски во Пелистер кон фудбалерите ќе бидат подмирени. Играчите с$ уште чекаат ветеното да биде исполнето.

Димов: На Кипар не се посрамотивме

По елиминацијата од Купот на УЕФА од Апоел, тимот на Пелистер целосно е свртен кон натпреварите во домашното првенство. Битолчани загубија на гостувањето на Кипар, но се претставија во одлично светло.

"Тоа е, немавме среќа, здравје па наредниот пат. Одигравме добро, но ете мечот го загубивме во последните неколку минути. За вакви дуели недостасува искуство, но овие два меча ќе бидат добродојдени за натпреварите од домашното првенство", вели капитенот Миле Димов.

Степановски и Блажевски остануваат, барем засега

Пред дуелот со Апоел во Кипар имаше најави дека некои фудбалери ќе си заминат од Пелистер, пред с$ мислејќи се на Степановски и Блажевски, кои требаше својата кариера да ја продолжат во странство. Информациите велат дека двајцата се во Битола и дека барем засега тие остануваат во Пелистер.

ТРАДИЦИЈАТА СЕ ПОВТОРУВА, И ВО ОВАА СЕЗОНА "СИНО-БЕЛИТЕ" СО ЛОШ ПОЧЕТОК

Ренова никогаш не победила на стартот

Ренова загуби два планирани бода во дуелот со Силекс. Тетовските "сино-бели" очекуваа сигурни три бода, но кратовци уште еднаш се покажаа како незгоден противник обезбедувајќи голем бод од ова гостување. Лошата традиција за Ренова продолжува и оваа сезона. Тетовските "сино-бели" никогаш не победиле на стартот на едно првенство. Од нивниот пласман во Првата лига па до сега Ренова играла нерешено, или губела во воведните неколку кола. Во сезоната 2005/06 првата победа ја забележаа дури во четвртото коло, а ист случај беше и во сезоната 2006/07. Минатата година по двата пораза по ред "гипсарите" се радуваа во третото коло. Еве и во новата сезона "кикс" на самиот старт од сезоната, овој пат против Силекс.

Од ова најмнигу стравуваа тетовци, кои имаат квалитетен тим со кој најавуваат борба за пласман на едно од водечките места на табелата.

Фудбалерите на Ренова одиграа одлично на дуелот со Силекс, но, сепак, не успеаја да ги реализираат шансите. Одбраната и средниот ред функционираше одлично, додека нападот не беше на висина на задачата. На овој меч "гипсарите" создадоа "куп" шанси и доколку сакаат да ја исполнат целта и да бидат при врвот, ќе мора во иднина истите да бидат искористени.



Се повтори сезоната 2005/06

Ренова и Силекс по вторпат се судрија во првото коло во една сезона. Како годинава, така и во сезоната 2005/06 овие две екипи одиграа меѓусебен дуел, но во Кратово. Исто како во неделата, така и тогаш немаше победник, мечот заврши со резултат 1:1.

Ефектот на "гипсарите" во воведните кола во изминативе сезони

Сезона 2005/06

Силекс - Ренова 1:1

Ренова - Шкендија 79 0:2

Влазрими - Ренова 4:3

Ренова - Цементарница 55 2:1

Сезона 2006/07

Напредок - Ренова 1:1

Шкендија 79 - Ренова 2:1

Силекс - Ренова 3:0

Ренова - Пелистер 1:0

Сезона 2007/08

Ренова - Милано 1:2

Работнички К - Ренова 3:0

Ренова - Македонија ЃП 2:1

Сезона 2008/09

Ренова - Силекс 0:0

ПРИЛЕПЧАНИ СО УШТЕ ЕДЕН НОВ ИГРАЧ ЗА СЕЗОНАВА

И Јусуфоски дојде во Победа

Во Победа с$ уште се доведуваат засилувања и по стартот на новиот шампионат.

Вчера 24-годишниот Џокан Јусуфоски, кој доаѓа од турскиот третолигаш Черкезке Беледијеспор, стана најнов член на прилепскиот фудбалски прволигаш. Комплетната документација, вклучувајќи го и сертификатот, навреме се комплетирани, така што тој ќе стекне право на настап од наредното коло со Ренова во Прилеп. Конк*рира за позицијата лев страничен фудбалер,

"Мило ми е што се вратив во матичниот клуб по пет години печалба во странство. Мислам дека ќе ги оправдам довербата и очекувањата", вели Јусуфоски.

Победа сега има девет нови фудбалери, покрај Јусуфоски, тука се голманите Угреновиќ и Кузмиќ, стоперите Крстески и Петров, играчите за врска Деилсон и к*ртушиќ, како и напаѓачите Гунев и Тиаго. Од нив на првиот првенствен меч во новата сезона со Вардар настапија дури шестмина: Угреновиќ, Крстески, Петров, Деилсон, Тиаго и резервистот к*ртушиќ.

"Веќе почнав да тренирам во Прилеп. Наидов на одличен прием и добра атмосфера. Сметам дека првиот пораз од Вардар не е ништо страшно. Новиот тим допрва ќе го каже својот збор. Оптимист сум дека амбициите за висок пласман се достижни", ни изјави Џокан Јусуфоски.

Летово, од младинскиот во сениорскиот тим на Победа премина братучедот на Џокан, пет години помладиот Бекташ Јусуфоски, кој игра на позицијата последен за врска.



Капинковски и Настоски со повреди

Димитар Капинковски и Климент Настоски не беа во комбинација за дербито со Вардар. Според информациите се работи за повреди добиени на последните тренинзи. Сепак, тие не се толку сериозни, така што се очекува двајцата да се појават на денешниот попладневен тренинг, прв по премиерното гостување во Скопје.

Нема премногу разочарување

Иако од дербито со Вардар се очекуваше најмалку бод, а е претрпен висок пораз од 0-3, сепак во таборот на Победа нема премногу место за разочарување. Сите како да се свесни за состојбата во која се наоѓа екипата. Многу млади играчи, половина новодојдени, па оценка е дека потребно е време за да се дојде до саканото ниво на игра, а со тоа ќе дојдат и резултатите. Оттука со нетрпение се чека првенствената пауза за да се надополни пропуштеното на подготовките. Има шанси тој период да биде одработен во Охрид.

ДЕФАНЗИВЕЦОТ ОТКАКО СИ ЗАМИНА ОД РУСКИОТ ТЕРЕК ОД ГРОЗНИ НАЈБЛИСКУ Е ДО ПОТПИС СО РАБОТНИЧКИ

Димовски пред вратите на шампионот

*Веројатното заминување на Лукмон во Швајцарија шампионот ќе го пополни со Горан Димовски - Гец, кој по три години најверојатно се враќа во Работнички

Горан Димовски - Гец е веројатно последното засилување за шампионот. Искусниот десен бек кој минатата сезона ја мина во рускиот прволигаш Терек од Грозни моментално тренира со останатите фудбалери на Работнички и е во очекување на завршните преговори со раководството на актуелниот шампион.

За потсетување, Димовски беше член на Работнички до 2005 година со кој ја освои првата титула. Потоа се пресели во таборот на Македонија ЃП со кој тим ја го освои и Купот на Македонија во 2006 година. Минатиот септември од редовите на "лавовите" направи трансфер во Русија, во Терек од Грозни а во текот на следните неколку дена се очекува неговото враќање во Работнички.

Сепак, дали ќе потпише за овој тим во многу зависи од тоа што раководството на Работнички ќе направи со Нигериецот Адекунле Дабатунде Лукмон. Тој има понуда од швајцарскиот Луцерн и деновиве би требало да се официјализира овој трансфер на Нигериецот на кого со Работнички му истекува договорот во декември. Значи ако сега првиот човек на шампионот, Драган Поповски, не го пушти Лукмон тогаш постои опасност Нигериецот на зима да си замине без денар отштета.

Според зборовите на Поповски, тој с$ уште се двоуми, но не ја исклучи можноста на Лукмон да му се дозволи да направи трансфер во швајцарскиот клуб, се разбира само со соодветна отштета. Исто така не ја исклучи можноста во текот на оваа недела да се почнат преговори со Димовски, кој би бил идеална замена за Лукмон.

Со евентуалното доаѓање на Димовски (кој како што кажавме веќе неколку дена тренира со останатите фудбалери на Работнички) ќе се зголеми колонијата на фудбалери некогашни играчи на Македонија ЃП. Да потсетиме дека точно на 31 јули потпиша за шампионот некогашниот капитен на "лавовите" Мирослав Милошевиќ, потоа тука е Христијан Кировски, кој некогаш беше член на ѓорчепетровци како и Владимир Туневски и Благоја Љамчевски. С$ се тоа фудбалери кои во минатите 2-3 сезони беа членови на Македонија ЃП.

З. Ѓоршоски

Небојша Марковски е новиот спортски директор

Проф. д-р Небојша Марковски, директорот на Едукативниот центар на ФФМ и професор на Факултетот за физичка култура (отсек фудбал), е новиот спортски директор на Работнички. Ништо сензационално ако се знае дека во тој едукативен центар каде што Марковски е директор членови се и Бобан Бабунски и Вујица Живковиќ. За Марковски ова е прва ваква функција во неговата кариера. Останува да му посакаме среќа и успех во својата работа како спортски директор на нашиот шампион.

Академијата ќе биде на теренот на Алумина

Според зборовите на претседателот Драган Поповски, договорено е Академијата за млади фудбалерчиња да биде на теренот на Алумина (некогашен второлигаш кој се фузираше со Брегалница) во скопската населба Карпош 3. Тука Работнички ќе инвестира во фудбалска инфрастуктура која ќе биде една од најдобите во нашата земја.

Аксентиев ќе може со "лавовите"

Повредата на зглобот на Ефтим Аксентиев не е била така опасна како што изгледаше во прв момент по мечот со кичевски Напредок (токму тој беше стрелец на израмнувачкиот). Како што ни изјави помошникот на Бабунски, Љупчо Марковски, врз Аксентиев е извршен детален лекарски преглед и заклучено е дека нема скршеница. Аксентиев добро се чувствувал и според Марковски би можел да биде во комбинација за неделното дерби со Македонија ЃП.

Само опомени за Лукмон и Османи

Адекунле Лукмон и Минас Османи "минаа" само со опомени по несаканиот инцидент минатата недела.

"Сите инволвирани лица во тој инцидент предадени беа на дисциплинска во рамките на клубот. Решивме Минас Османи и Адекунле Лумон да добијат само опомени. Не сакам лично да навлегувам во тоа кој бил главниот виновник. Ова нека биде поука не само за нив туку и за сите останати. Ние како клуб нема во иднина да толерираме вакви испади и инциденти", ни изјави првиот човек на шампионот, Драган Поповски.

МАНЧЕСТЕР Ј. СОГЛАСЕН ДА ГО ПУШТИ ПОРТУГАЛЕЦОТ

К. Роналдо во Реал (М), ама наредното лето

Во тимот од Олд Трафорд посакуваат напаѓачот да остане уште една сезона, а потоа ќе му дозволат да замине во "кралскиот клуб" за сума од 75 милиони евра

Соочени со суровата реалност и со желбата на Кристијано Роналдо, кој сака по секоја цена да ја смени клупската средина, челниците на Манчестер Јунајтед се подготвени на својата најголема ѕвезда да и дозволат трансфер во Реал (М), ако Португалецот биде во составот на сер Алекс Фергусон, најмалку уште една сезона.

Близок извор до таборот на актуелниот европски клупски шампион, за Сан, изјави дека постојат големи шанси Роналдо и сезонава да настапува на "Олд Трафорд", а веќе на стартот од следниот летен преоден рок, клупските челници на "црвените ѓаволи" да ја прифатат последната понуда на "кралскиот клуб" вредна 75 милиони евра.
- Нема промена во ставот на сер Алекс Фергусон. Нема шанси да прифати трансфер за време на овој преоден рок. Исто така е свесен дека не може да го задржи повеќе од една сезона. Би било глупаво да не се прифати ваквата мега понуда од Реал (М). Како и да е, Роналдо сигурно ќе го пропушти стартот на новата сезона. Најверојатно ќе остане уште една сезона на "Олд Трафорд" откако ќе добие гаранција дека следното лето ќе се пресели на "Сантијаго Бернабеу".

И покрај изјавата на анонимниот извор, поголемиот број од познатите спортски медиуми како во Англија, така и во Шпанија се убедени дека најдоцна за една недела крилниот напаѓач ќе биде презентиран како најнова и најверојатно последна аквизиција на Реал (М).



Кристијано не се појави во Манчестер

Португалскиот репрезентативец Кристијано Роналдо требаше вчера да пристигне во Манчестер на медицински преглед, но тоа не го направи. Играчот е пред трансфер во Реал (Мадрид) и е во многу лоши односи со тренерот на англискиот и европскиот клупски првак, сер Алекс Фергусон.

Во моментов Роналдо е во Херес (Шпанија) и нема намера да патува во Манчестер.
- Сега не можам да зборувам. Се што ќе ви кажам може да повлијае на мојот трансфер во Реал, изјави Португалецот.

Најдалеку во предвидувањата отиде "АС", кој е убеден дека официјалната презентација на Роналдо е веќе закажана за 15 август, а на истата, освен официјалните лица на Реал (М), ќе присуствува и големиот фан на "кралскиот клуб", светски познатиот пејач, Хулио Иглесијас.

Во случај да не биде прифатена понудата од 75 милиони евра, претседателот на Реал (М), Рамон Калдерон е подготвен веднаш да испрати нова, зголемена за нови 10 милиони евра.

Судбината на Ето ќе се знае до 12 август

Иако доби поддршка од речиси сите фудбалери и претседателот Лапорта, Самуел Ето, сепак, не е сигурен дека идната сезона ќе го носи дресот на Барселона. Спортскиот директор на клубот, Чики Бегиристаин, вчера го одреди 12 август како краен датум до кога треба да биде јасно дали Камерунецот ќе ја смени средината или ќе остане на Ноу Камп.

"Времето брзо лета и трансфер-пазарот наскоро се затвора. Одлуката мора да биде донесена пред натпреварите од третото претколо на Лигата на шампионите, што значи дека до 12 август с$ треба да биде јасно. Треба уште да разговарам со тренерот Гвардиола и тој да ми каже како го замислува тимот за идната сезона и дали смета на Ето", рече Бегиристаин.

Гвардиола неодамна ја демантираше својата претходна изјава дека не смета на Ето за претстојната сезона, но тоа беше предизвикано од одличните игри и залагањето на Камерунецот на подготовките на каталонскиот тим. И покрај тоа, за Ето с$ уште има интерес од неколку италијански и англиски клубови, а неговиот трансфер досега беше спречен поради високите барања од финансиски аспект што тој ги постави.

Во зависност од тоа дали Ето ќе остане на Ноу Камп или не, ќе се знае дали Барселона ќе тргне посериозно по Давид Силва од Валенсија.