Бошковски ослободен, Тарчуловски виновен!

Ослободителната пресуда за Бошкоски, а 12-годишната казна затвор за Тарчуловски, за правните експерти укажува на контрадикторност и нелогичност во пресудите на Хашкиот трибунал.

Прво, затоа што се работи за еден ист случај и второ, што во случајот со Тарчуловски вина се докажува за четири, а не за сите седум лица.

Факт кој говори дека обвинението од самиот почеток било на климави нозе, велат експертите. Тие во првичната реакција во одлуката на Судот во Хаг препознаваат и политика, нешто што нескриено го соопшти и Карла дел Понте во својата книга.

„Политиката на Хашкиот трибунал е во секоја од републиките, кои беа инволвирани во некој конфликт од поранешна Југославија, да мора да падне по една пресуда. Можеби тука ќе бараме некоја логика, дека Хашкиот трибунал сакаше да го оправда четиригодишниот притвор на двајцата македонски граѓани“, рече Душко Стојановски, универзитетски професор.

Олеснителна околност за Бошкоски да биде ослободен од вината за командна одговорност, е и веројатно и фактот што тој како министер, вели Стојановски, случајот го расчисти со Комисија која ја формираше веднаш по акцијата во Љуботен. 

Ако ослободителната пресуда за Бошкоски беше очекувана, тогаш дополнително збунува речиси максималната казна за Тарчуловски, вели професорот Тупанчевски, кој исто така препознава доза на политика на одлуките на Трибуналот.

„Треба да се почека образложението, да видиме што беше решавачко за судиите да донесат таква пресуда. Во секој случај, практично станува збор за одредена контрадикција и изненадување од правен аспект. Додека не ги добиеме аргументите, коишто ги донеле судиите за ваква пресуда, ќе почекаме. Во оваа висока инстанца, јас мислам дека сепак оваа одлука треба да биде корегирана во полза на Тарчуловски“, изјави Никола Тупаневски, универзитетски професор.

Она што сега треба да следува, тоа е експресна реакција на одбраната на Тарчуловски, велат експертите, до повисокиот Совет на судот во Хаг.