КОШАРКА - новости

НА ДЕНЕШНАТА СЕДНИЦА (13 ЧАСОТ) ПРВОЛИГАШИТЕ ЌЕ ГО БРАНАТ СВОЈОТ СТАВ

Лигата може да ја "шири" само Управниот одбор

Здружението ќе инсистира, доколку УО на КФМ веќе инсистира, двете нови екипи во Првата лига да платат по 30.000 евра за "влез".

Нема напредок во "преговорите" на релација Здружение на Прва лига- КФМ. Едните сакаат, другите се чини немаат намера да го променат цврстиот став, да нема нови промени на прволигашката мапа, односно проширување на Првата лига за уште две заинтересирани екипи - клубови.

И на ден пред одржувањето на итната седница на Здружението нема промени на ставовите на поголем број од прволигашките екипи, лигата да брои 10 екипи.

"Нашиот став е јасен, Првата лига во наредната натпреварувачка сезона генерално да брои 10 екипи, пред с$ од аспект на задржување на квалитетот на лигата и натпреварите"- велат поголем дел од претставниците на клубовите кои ја потпишаа своевидната петиција за задржување на овој статус на лигата.

Свесни се во Здружението дека пред себе го имаат ставот на УО на КФМ, кој вели дека треба да им се дозволи влез на двата апликанти, во овој случај екипите на Овче Поле и на Ултимејт Баскет од Прилеп.

Затоа и излегоа со свое размислување за актуелната ситуација.

"Ако веќе УО на КФМ реши да прошири лигата, и тоа од 10 на 12 екипи, во тој случај ние како Здружение имаме право на една ваква реакција. Па ние веќе дадовме една дозвола, токму на седницата во Кавадарци кога дозволивме лигата од осум да брои десет екипи во натпреварувачката сезона 2008/2009 година. И сметаме дека тоа е веќе голема отстапка.

Друга работа, како на тоа ќе реагираат клубовите кои по регуларен пат дојдоа до својот прволигашки статус? Сигурно е дека и Торус и Поп Спорт како нови членои на Првата лига потрошиле многу повеќе од оние 10.000 евра кои сега стануваат 'гаранција' за влез во Првата лига. Лошо е ако сето ова стане практика, а сето ова води кон тоа" - дополнуваат од Здружението на прволигашите.

Како и да е, денешната седница на Здружението, закажана за 13 часот (во просториите на КФМ) би требало да даде каква-така завршница на оваа нималку очекувана ситуација.

Секој со свои предлози, идеи, желби. Затоа ќе биде тешко да се дојде до некој концензус на кој инсистираше претставникот-апликантот од Прилеп.

Дали "слогата" ќе ги сочува клубовите или, пак, ќе преовладее мислењето кошарката да се шири и во други градови во Македонија, останува отворено прашање, можеби и се надеваме дека ќе биде затворено уште денеска.

Б. Радуловиќ

Денеска, "дедлајн" за котизацијата

Согласно со претходно договореното, денешниот ден е означен како последен кога клубовите членови на Здружението на Првата лига треба да ја уплатат првата рата од задолжителната Котизација за следната натпреварувачка сезона.

Според пресметките на канцеларијата на Првата лига, доколку лигата остане на 10 екипи, секоја од нив ќе треба да уплати по 262.730 денари.

Доколку, пак, дојде до проширување, таа сума би била поголема, поточно би изнесувала 284.440 денари.

ЈУНИОРКИТЕ ПОЧНАА СО ПОДГОТОВКИТЕ ЗА ЕП "Б" ДИВИЗИЈА ЧИЈ ДОМАЌИН ЌЕ БИДЕ СКОПЈЕ

Почетна база, "Јане Сандански"

Од вчера и официјално нашата јуниорска женска селекција почна со подготовките за ЕП "Б" Дивизија кое од 6 до 15 август ќе се одржи во Скопје.

Селекторот на "црвено-жолтите", Светислав Костовски, на располагање има 15 кошаркарки, поголем дел од нив н$ претставуваа на Балканијадата во Романија која се одржа минатата година. А

добра вест за Костовски е тоа што во составот ќе биде и Јелена Антиќ, која во моментов се наоѓа во Скопје.

"Планот е овој месец да бидеме во Скопје, поточно во салата 'Јане Сандански' каде ќе тренираме двапати на ден. За разлика од минатата година сега нема да имаме селективни тренинзи, списокот е речиси оној истиот со кој заминавме на Балканијадата во Романија. Се радувам што во составот ќе биде Јелена Антиќ бидејќи нејзиното искуство ќе ни биде од голема помош" - вели селекторот на младинките, Светислав Костовски.

Инаку, репрезентацијата под "18" години на почетокот на идниот месец ќе одигра турнир на кој домаќин ќе бидеме токму ние. Практично овој турнир засега е единствената контрола за нашите младинки.

"На почетокот на јули планираме да заминеме во Виница каде би требало да останеме десетина дена. По завршувањето на подготовките ќе организираме турнир на кој ќе учествуваат Турција, Хрватска, Србија и Бугарија. Бидејќи засега ова се единствените контролни средби ќе се обидеме максимално да ги искористиме за што подобро да се подготвиме за ЕП" - додава искусниот стратег, кој заедно со своите избранички ќе имаат доста тешка задача, да ја одбранат честа како домаќини.

За потсетување Македонија е во групата "А" на Евробаскетот заедно со Австрија, Швајцарија, Германија, Луксембуг и Грција.

БОСТОН СЕЛТИКС ИМА ДВЕ МЕЧ ТОПКИ ЗА 17. ТИТУЛА, ПОЛ ПИРС УБЕДЕН ДЕКА ЌЕ ИСКОРИСТАТ БАРЕМ ЕДНА

Подобри сме, ќе земеме една

Селтикс се дома, но не се чувствуваат така удобно, особено не по последната игра од која можеа да извлечат голема победа.

Но, останаа со празни раце, па ја вратија серијата во својот град.

Сепак, Бостон има две топки за титула и тоа пред своите гледачи за да дојде до првата титула по далечната 1986 година и ерата на Лери Бирд, Кевин Мек Хејл и Роберт Периш.

Но, повредите уште еден голем дефицит во првото полувреме и топло-ладните претстави на Кевин Гарнет, "келтите" ги чинеа уште еден пораз и испуштена голема шанса за титулата да биде прославена уште во Холивуд.

"Не е тоа што го баравме. Ние сакавме уште две победи таму. Не го направивме тоа, се вративме дома, и реално е да се верува дека можеме да земеме една од овие две кои се пред нас" - вели Док Риверс.

Ќе има проблеми шефот на стручниот штаб на Бостон да ја формира екипата за титула. Пред натпреварот број 6 има проблеми со повредата на рамото на Кендрик Перкинс, нестабилноста на Рејџон Рондо предизвикана со повредата на скочниот зглоб на левата нога.

На тоа се надоврзаа и семејните проблеми за Реј Ален (болест на синот поради која мораше веднаш да го напушти ЛА).

Не смее да се заборави ниту фактот што Пол Пирс игра со повредено колено.

Традицијата е на страната на Селтикс, таа вели дека ниту една екипа во финалето не се вратила по 1-3. А шансите на Бостон се мерат во однос 1-17, за да ја освојат својата 17. титула.

"На една победа сме до титулата, а имаме два натпревари дома" - вели Пирс, кој даде рекордни во ова финале 38 поени на средбата број 5."С$ уште чувствуваме дека сме во предност, но и тоа дека сме подобар тим од нив".

Дали ова ќе бидат последните 48 минути од обновеното ривалство меѓу двата најголеми тима во историјата на НБА, ќе зависи и од многу други фактори.

Но факт е дека меч-топката е во рацете на тимот од Масачусетс.

ДОК РИВЕРС СВЕСЕН ЗА ДОПОЛНИТЕЛНИТЕ ТЕШКОТИИ КОИ ГИ НОСИ ФИНАЛЕТО

Преселбата ја уништува играта

Следејќи ги настаните од финалето, неминовен впечаток е дека форматот 2-3-2 можеби и не е среќно решение кога се играат вакви одлучувачки натпревари, особено кога еден против друг се Бостон Селтикс и ЛА Лејкерс.

Токму преселбата од истоток на Запад по само два натпревари им направи големи проблеми и на двете екипи. Фактор на кој не може никој да влијае како што треба и може.

Согласен со тоа е и Док Риверс. Тренерот на Бостон смета дека тоа делува уништувачки и дека не очекува којзнае каков квалитет во натпреварот број 6.

"Тоа се неверојатни турбуленции. Тешко е да се издржи, и тоа за секого во екипата. Мислам дека одењето од Запад кон Исток е уште потешко од она првото. Спиеш додека патуваш, а тоа не е добро, без оглед на тоа што и двете екипи се ставени во една иста позиција кога се зборува за тоа. Треба да влезеш во мечот максимално подготвен, а овие работи не го даваат тоа"- вели тренерот на Селтикс.

Сепак, Бостон ја има комфорноста во оваа серија, барем досега. А оние 12-1 во доигрувањето кои ги имаат на домашен терен треба да се гаранција дека титулата е многу блиску. Тоа и оние 16 банери кои се сведоци на 16 титули колку што досега собраа "келтите" се мотив кој треба да го совлада уморот при оваа последна преселба од Западот кон истокот.

"Тоа и не е така лошо место за да се биде таму" - констатира Риверс, мислејќи при тоа на ставањето и на 17. шампионски банер на врвот на "Банкнорт Гарден" во Бостон.

ПРВОЛИГАШИТЕ НЕРАСПОЛОЖЕНИ ДА СЕ "ПРОШИРАТ"

(Не) возможна мисија...

Се поголемо е оддалечувањето од намерите на УО на КФМ и желбата на Здружението да се "шири" кон Велес и особено кон Прилеп.

Ниту получасовното образложение на претседателот на КФМ, воедно и на Управниот одбор, Даниел Димевски, кој важи за најголем иницијатор во следната сезона лигата да брои 12 место предвидените 10 клуба, не беше доволно за да ги разубеди прволигашите во обид да се донесе една вистинска одлука.

Одлука од која македонската кошарка би имала многу поголема корист отколку штета.

Мисијата во која тргнал првиот човек на КФМ, со која сака да ја "прошири" лигата за уште два центри, во овој случај Велес и Прилеп , не наиде баш на некој добар "прием" кај десетте клуба кои во моментов уживаат во статусот на прволигашки.

За нив е поразително, дури и потценувачки барањето на двата клуба, Овче Поле и Ултимејт Баскет, да бида упатено директно до УО на КФМ, а не на адресата на Здружението на прволигашите.

Целта, како што истакна Димевски, за една ваква идеја е интерес за подигнување на кошарката на едно ниво погоре. Да се направи уште еден чекор напред.

""Вајлд-картата е моја измислица преку која со несекојдневни мерки и средства, методи стигнавме до онаму каде што сме сега. Со два центри како Кавадарци и како Охрид, кои се и тоа како битни. И моја е вината за она што се случи со Маврово. Клуб кој и вие се обидовте максимално да го поддржите, или толерирате до последен момент. И пак ќе бидам за тоа затоа што во тој западен дел беа единствените кои ја имаат кошарката. Да, тоа беше неуспешна епизода, но тоа не значи дека не треба да продолжиме по истиот пат, да развиваме други центри"- се обиде да објасни Димевски.

Уште побитен момент според првиот човек на КФМ за една ваква идеја е што во кошарката би влегле два "некошаркарски " спонзори какви што досега беа "Витаминка", односно "Џумајлија", кои стојат зад двата апликанти.

"Едниот беше фудбалски, другиот многу повеќе загреан за ракометот, и затоа не смееме да го испуштиме овој момент"- дообјасни Димевски.

И иако првичното барање на Здружението беше доколку лигата се прошири на 12 клуба, двата клуба апликанти да уплатат по 30.000 евра, сега некако во втор план паднаа финансиските средства.

Димевски се обиде да појасни дека нема ниту недостиг на играчи во Македонија.

"Финансискиот аспект сигурно не е во прв план, а не е дека нема играчи, напротив, има, и тоа доста, што е сосема различно од некои претходни изјави. Мора да знаете дека ние како федерација немаме намера да наметнуваме решенија, туку дека сакаме да зборуваме со силата на аргументите. одлуката треба да биде заедничка, а не само да се сведува на тесноклупски интереси"- го затвори својот "елаборат" Димевски.

А клубовите не би биле тоа што се ако уште еднаш не го покажаа и своето второ лице.

Останаа во најмала рака недокажани. Иако потпишани, и тоа сите 10 на петицијата за "непроширување' на лигата, побараа нов собир, и тоа на 20 јуни (петок), во 11 часот, на кој очекуваа(т) да се појават и претставниците на двата клуба-апликанти.

Па откако ќе послушаат уште две "образложенија", можеби ќе се донесе и конечната одлука, Прва лига со 10 или со 12 клуба.

А дотогаш времето поминува, полека се ближи, истекнува, она од преодниот рок....како што забележа некој од присутните.

И затоа, како што го нарекоа гестот на добра волја, ќе се соберат уште еднаш, пред с$ да видат дали работите сме смениле на подобро или останале исти.



ПРЕТСЕДАТЕЛОТ НА СВИССЛИОН ПЕЛИСТЕР, МАРИО ТРИФУНОВСКИ, СО СВОЕ ВИДУВАЊЕ

Во Прилеп нема ништо...

"Уште не можеме да појасниме некои работи. На пример, како може екипа која играла во Трета лига, каде била третопласирана, да добие прволигашки статус. Ние во Свисслион Пелистер многу добро ја познаваме ситуацијата во Прилеп. И можам слободно да кажам дека таму нема ништо. Лани играа со четири играчи од Битола, од Пелистер, во првата петорка. Петтиот беше токму Влатко, кој сега сака да играат во Прва лига. Немаа ниту младински екипи, да не зборувам за школа, тренери. Едноставно кажано, вештачка работа. Таму има пари ама нема ништо.

И затоа би испаднале максимално несериозни доколку прифатиме една ваква ситуација"- се обиде да ја "отслика" реалноста во Прилеп, првиот човек на битолскиот прволигаш.

10.000 евра - потценување

Сосема потценувачки за прволигашите е "желбата" на двата клуба директно да му се обратат на УО на КФМ, а не токму на нив.

"Тоа се гледа и во барањето кое е насловено само до УО на КФМ" - забележаа претставниците на клубовите. "Со тоа тие н$ потцениле во старт. Факт е дека има грешка во чекори затоа што тие барања требало прво да одат до Здружението, па дури потоа да ги разгледува УО на КФМ".

Освен тоа, цифрата од 10.000 евра е потценувачка и за оние два клуба кои по регуларен пат се изборија за место во Првата лига.

"Ние потрошивме многу повеќе од таа сума. И со еден збор, тоа е потценување" - констатираше претставникот на Торус, првполасираната екипа во Првата "Б" лига.

БОСТОН СЕЛТИКС ЈА ВРАТИ СЛАВАТА, ВО "ГАРДЕН" ЗАКАЧЕН И 17. ШАМПИОНСКИ БАНЕР

Бостонски "масакр" за Лејкерс

Деновите на слава се вратија во Бостон, дефинитивно. И тоа по пауза долга, предолга, која трае(ше) цели 22 години.

И тоа како, со една неверојатна победа над најголемиот ривал во историјата на НБА лигата. Против еден ЛА Лејкерс стигнаа до неверојатни, но вистинити 131:92, и тоа во последниот натпревар од сезоната, во кој с$ беше подготвено за прослава.

И бидна прослава, и тоа каква, обоена во зелено, во боите на најтрофејниот клуб во историјата на НБА, за 17. шампионски банер кој ќе оди "горе" над "Банкнорт гарден".

Новиот паркет на новата сала во Бостон ги дочека шампионските почести чекани повеќе од две децении.

Толку и требаше да се обнови големото ривалство, Бостон-ЛА, толку беше чекан трофејот на Лери О'Браен кај "келтите".

Бостон Селтикс повторно е првак на НБА. На најдобар можен начин, со спектакуларна претстава ставија круна на извонредната сезона од соништата.

Во шестата средба од големото финале на НБА го "добија", го уништија, го масакрираа ЛА Лејкерс со плус 39 (131:92) за конечни 4-2 во финалето.

Имаа што да чекаат, на крајот и го дочекаа шампионскиот прстен.

Долго време Пол Пирс беше премногу осамен, но само до оваа сезона, кога му ги придодадоа Кевин Гарнет и Реј ален, сето останато сега & припаѓа на историјата.

"Сега имам своја титула. Се надевам дека си горд на тоа "- кажа КГ обраќајќи му се на веројатно најголемиот "келт" во историјата, Бил Расел.

"Секако дека сум"- му одговори најтрофејниот играч на Бостон во историјата. Тој помина низ сите овие работи не еднаш, туку точно 11 пати, рекорд кој веројатно и никогаш нема да биде достигнат.

Овој пат "езерџиите" беа сосема во втор план, можеби и во трет, кој знае. Како одиграа по онаа добра прва четвртина до крајот на натпреварот, кажуваат последните бројки.

Во Бостон с$ беше во знакот на зелената боја. Им помогна и Коби Брајант, кој не беше на МВП нивото, постигна "само" 22 поени (со слаба реализација, 7/22), иако на "отворањето" на средбата имаше 4/5.

"Тие одиграа најдобра одбрана во доигрувањето за титулата. Целта беше да се освои титулата, не МВП наградата, туку титулата"- рече Брајант по тешкиот пораз, и најкорисниот играч во НБА за оваа сега веќе завршена сезона.

Последната пресметка во сезоната не даде неизвесност достојна на едно финале. Иако Кевин Грнет и Реј Ален постигнаа по 26 поени, посебен белег на натпреварот му даде Рајџон Рондо, кому ни повредата не го спречи да постигне 21 поен, да има седум скокови, осум асистенции и шест освоени топки.

Пол Пирс заврши со дабл-дабл ефект изразен преку 17 поени и 10 асистенции, што со претходните настапи беше доволно да биде прогласен за МВП на финалето.

Кај очајните "езерџии" вреден за спомен само уште Ламар Одом, кој даде 14 поени, но и 10 скока и 5 асистенции.

Ех да го видеше ова Оербах...

Од екипа која лани дојде до мизерни 24 победи, Слетикс станаа шампион на НБА. Тоа е еден неверојатен момент кој пред с$ дојде по заслуга на менаџментот на Бостон предводен од Дени Ејнџ.

Ејнџ го направи потегот на сезоната кога во Бостон ги донесе Кевин Гарнет и Реј Ален. Тие двајца ја иницираа лавината која не запре до големото финале во кое ги "избришаа" и своите големи ривали од ЛА.

Податокот кој вели дека оваа разлика од 39 поени е најголемата победа во историјата на финалето кажува с$.

Иронично, но исто така вистинито е дека вториот најдобар скор во ова го имаат токму против Лејкерс.

Во далечната 1965 година, во 5. натпревар од финалето, Селтикс го победи Лејкерс со плус од 37 поени (129:96)..

Што би рекле во Бостон, ех да беше жив Ред Оербах како со задоволство би испушил од своите надалеку познати пури...

Во неговата улога овој пат се најдоа Бил Расел и Џон Хавличек од кои дојдоа и првите честитки за враќањето на титулата во Бостон.

ДОК РИВЕРС ГО ПОСВЕТИ ТРОФЕЈОТ НА СВОЈОТ ТАТКО

Што чекаше толку долго...

Посебно емотивно "го преживеа" овој натпревар и Глен Док Риверс од клупата. На 4:01 минута пред крајот тој ја повлече "големата тројка", а по тоа тргна победничките прегратки, се знаеше и зошто, с$ беше готово и подготвено за шампионска прослава.

Уште еднаш Риверс му ја посвети оваа победа, овој трофеј на својот скоро починат татко, кој на ден по финалето требаше да слави роденден.

"Прва помисла ми беше што мојот татко ќе кажеше за сето ова, а тогаш се насмеав"- вели тренерот на Бостон."Да го знаете, тогаш и вие би сте се насмеале бидејќи многу е веројатно дека ќе речеше, па и беше време, што чекаше толку долго"...

ПОЛ ПИРС -ПРОГЛАСЕН ЗА МВП НА ФИНАЛНАТА СЕРИЈА

Сега сум дел од нив...

Долги години се мачеше да дојде до она што дојде во оваа серија.

Пол Пирс долго време чекаше "друштво" со кое ќе тргне во нов обид да му ја врати старата слава на Бостон Селтикс.

Кога дојдоа Кевин Гарнет и Реј Ален с$ беше полесно.

Сега Пол Пирс има шампионски прстен, и тоа со екипата која како дете ја мразеше најмногу на светот. До него стигна против екипата од своето "маало" во ЛА.

Освен тоа низ шесте средби против Лејкерс дојде и до најголемото индивидуално признание, стана МВП на финалето

"Ова ми значи многу повеќе бидејќи сите овие момци како Хавличек, како Бил Расел, Кузи, почнаа нешто за што сведочат сите овие банери во салата. Сега и јас станав дел од нив, а тоа ме прави посебно горд"- вели најкорисниот играч во серијата.

Пирс не би бил тоа што е ако по крајот на средбата не истури цело буре "Геторејд" врз тренерот Док Риверс и го обои во портокалово.

Бостон Селтикс - ЛА Лејкерс 131:92 (4-2)

(24-20; 34-15; 31-25; 42-32)

БОСТОН: Ален 26 (4ск,2ас), Гарнет 26 (14ск,4ас), Рондо 21 (8ск,1ас), Пирс 17 (3ск,10ас), Поуси 11 (3ск,1ас), Хаус 9 (2ск,5ас), Поу 8 (4ск), п.Џ. Браун 6 (3ск,2ас), Дејвис 3 (4ск), Т. Ален 2 (1ас), Перкинс 2 (4ск), Кесел;

ЛА ЛЕЈКЕРС: Брајант 22 (3ск,2ас), Одом 14 (10ск,5ас), Фармар 12 (1ск,1ас), Гасол 11 (8ск,2ас), Волтон 8 (2ас), Вујачиќ 7 (2ск,1ас), Фишер 7 (4ас), Ариза 3 (1ск), Радмановиќ 6 (3ск), Туриаф 2 (1ск), Мим, Њубл;

Скандалозно однесување кон директорот на кадетската репрезентација

Забранет влез за Ристовски во "Кале"!!!