ВЕРСКИ ВЕСТИ

Организацијата од Кувајт Islamic Society Heritage која соработува со скопската издавачка куќа НУН не е на листата осомничени за тероризам

На црната листа на Обединетите Нации почнувајќи од 2002-ра година, па се досега се наоѓаат само канцелариите на Revival of Islamic Society Heritage во Авганистан и Пакистан. Податоците се објавени на официјалната интернет страница на Светската организација, и според нив на црната листа се само двете канцеларии и за нив се однесуваат санкциите наменети за организации кои соработуваат со Ал Каеда. МВР вчера соопшти дека полициската акција и претресот во издавачката куќа НУН, хуманитарната организација “Бамирсија“ и во неколку други објекти се извршени по предупредување од една домашна банка дека од канцелариите на организацијата Revival of Islamic Society Heritage во Кувајт на името на директорот на издавачката куќа НУН, Бекир Халими се префрлени пари со назнака – плата. Халими ги отфрли сомнежите.

„Сомнително во целата трансакција е тоа што таа меѓународна организација се наоѓа на црната листа на Обединетите нации која што е составена од организации поврзани со Ал Каеда. Откако е проверена таа информација МВР отвори истрага и проверуваше повеќе сознанија и трансфери на пари во кои е вклучено лицето. Инаку станува збор за лице кое фигурира како потписник односно сопственик на издавачка куќа, а исто така постојат сомневања дека лицето стои и се наоѓа во раководството на едно хуманитарно здружение регистрирано тука во Македонија„ изјави вчера Иво Котевски, портпарол на полицијата

„Овие обвинувања се само обвинувања се додека не се докажат пред суд. Сето ова е клевета, поради што ќе поднесам и кривична пријава за тој што ја изнесе. Кувајтското здружение е официјално регистрирано во оваа земја и легитимно дејствува, а станува збор за држава која е близок сојузник на САД во борбата против тероризмот. Така што да се обвинува оваа соработка со финасирање на тероризам е деликатна и нејасна работа бидејќи претходно оваа организација би требало да биде затворена во земјата каде е основана, а потоа и во останатите земји„ рече вчера Беќир Халими.
Од МВР велат дека продолжуваат истрагите и дека запленетиот материјал во акцијата во четвртокот му е предаден на истражен судија кој ќе потврди дали имало злоупотреба на пари за криминални цели и дали постојат елементи на финансиска злоупотреба или перење на пари. Не е покренато ниту една кривично пријава и станува збор само за сомнежи, велат во МВР. Двете канцеларии на Revival of Islamic Society Heritage (Заживувањето на наследството на исламското општество) во Авганистан и Пакистан се наоѓаат и на црната листа на САД. Според американската администрација овие канцеларии злоупотребиле донирани средства за хуманитарни цели од централната канцеларија во Кувајт, но немало докази дека Централната канцеларија во Кувајт на Revival of Islamic Society Heritage знаела за злоупотребата на парите од канцелариите во Авганистан и Пакистан за терористички цели.

Првиот човек на организацијата „Revival of Islamic Society Heritage“, ги отфрли сите обвинувања дека централата во Кувајт е вмешана во било какви незаконски дејствија и во тероризам