Коза ностра ексклузивно ви ја пренесува потресната сторија која доаѓа од Прилеп, и која ги распара срцата на вработените во Македонски шуми, посебно на тие новите 1.600 кои беа извлечени во владината лотарија.

Имено, според нашите информации, приказната зад фотографијата која кружи на социјалните мрежи, а на која една палма во Прилеп се наоѓа во контејнер, не е воопшто наивна и комична, туку потресна и трагична.

Од извори блиски до контејнерот, дознаваме дека палмата била посадена во близина на истиот пред неколку денови, и веќе почнала да се привикнува на околината и среќно да си живее, кога вчера случајно слушнала муабет на двајца граѓани кои поминувале покрај неа, и кои зборувале дека за проектот со 1.100 палми низ цела држава се дадени вкупно 522.000 евра односно околу 500 евра по стебло.

– Палмата остана шокирана и не можеше да поверува во тоа што го слушна. Не можеше да сфати каква неодговорна власт има во Македонија, која троши толку многу пари на палми, додека огромен дел од населението живее во сиромаштија а многу луѓе буричкаат по контејнерите. Не можејќи да живее со таква грижа на совест, палмата изврши самоубиство фрлајќи се во контејнер – вели нашиот извор, кој бил очевидец на несреќата.

Фото – Твитер

Боровите крај Владата ги сечеме затоа што многу пораснаа, прават голема сенка, а ние не би сакале некој да помисли дека полека стануваме влада во сенка, ја објасни портпаролот Александар Ѓеоргиев сечата на дрвја во дворот на Владата. Тој додава дека кај дел од министрите се појавил и сомнеж за квалитетот на дрвата зашто не се садени со акцијата „Ден на дрвото“. Сепак, дознаваме дека на последната владина седница, министерската за внатрешни работи Гордана Јанкуловска реферирала и за безбедносни импликации од постоење на дрвја и грмушки во близина на зградата на Владата.

– Од пријателска служба ја добивме следнава порака. „Иза сваког грма непријатељ вреба…“. Тоа е јасен сигнал да се исече од корен секоја појава на непријател, односно опозиција. Особено сега, ко шо си збориме со Зоки, кога царот е гол, глупо е да не е голо се околу царот – рекла Горде.

Премиерот Никола Груевски од министрите побарал да му направат список на сите парцели кои се џабалк, а се обраснати со дрва и наредил да се исече се. На забелешката од министерот за животна средина дека така ќе останеме без шуми, тој остро пресекол дека Македонија има шуми, и тоа „Македонски шуми“ каде што се вработени илјадници дрва.