Размислувате за брачното патување, но сè уште не сте одлучиле на која страна од светот да тргнете. Како и во љубовта, следете го својот инстинкт и љубовта кон некој град или земја ќе се роди сама по себе. 

Замислете како безгрижно се шетате по градот како глумци во некој познат филм, можеби со карта в рака или со водич, кој низ историјата и интересните приказни ќе ве воведе во модерното време на Париз, Лондон или на Рим, кои секој на свој начин ќе ве воодушеват со архитектурата, историјата, богатата култура, одличните ресторани, барови и со клубовите за забава. Ако по венчавката сакате малку романтика, изберете ги Париз или Рим, а Лондон ќе ве воодушеви со космополитскиот шарм и со отвореноста. 

Прошетајте по авенијата Champs-Élysées, погледнете го Париз од Ајфеловата кула, уживајте во боемскиот Монмартер или седнете во Café de Flore во населбата Saint-Germain-des-Prés и почувствувајте ја вистинската француска изрека „joie de vivre“. Во Париз земете си катанец со својата љубовна порака и заклучете го на мостотPont des Arts во знак на вечна љубов. Можеби токму тоа некогаш ќе ве инспирира да се вратите и да го побарате на истото место. Патувањето надвор од Паризможете да го продолжите кон дворците на Лоара како еднодневен излет или уште подобро да одите со воз до Версај и таму да го посетите раскошниот дворец во кој во златните времиња на Париз живееле Кралот Сонце и Мари Антоанет.

Како што вели поговорката: Кога си во Рим, однесувај се како римјаните (When in Rome do as the Romans do) – кога првпат посетувате едно место, обидете се да се однесувате и да го почувствувате како домаќини. Ако се одлучите за Рим, иако првин ќе посакате да ги посетите сите најатрактивни знаменитости, како што се базиликата Свети Петар, Ватиканските музеи, Колосеумот, Пантеонот, плоштадот Навона и многу други познати места, сепак застанете за момент и седнете до некоја фонтана или на скали и гледајте ги минувачите и градот како живеат, и ќе видите дека токму тој момент најдолго ќе ви остане во сеќавање. Ако имате време и можност за малку подолго патување, посетете ги Наполи и Помпеја. 

Ако сакате да откриете нешто ново, но истовремено сакате забава и добро расположение, а лесно можете да се снајдете бидејќи одлично го зборувате англискиот – Лондон ве очекува! Жив и раздвижен во секој момент, преполн со млади луѓе, интересни знаменитости, модерни галерии и одлични претстави, сето тоа ќе ве исполни со позитивна енергија. Ако сакате да го продолжите престојот во Англија, можете да заминете во обиколка на познатите универзитетски градови Оксфорд и Кембриџ, или во родниот град на Шекспир, Страфорд-апон-Авон.