Јајца послужени со јогурт и лук е турски специјалитет достоен за султанот. Според некои извори, уште во 15-от век овој појадок секо утро бил послужуван на масата на отоманските владетели. Во овој појадок се додава чили Алепо кое е именувано по сирискиот град каде претежно се одгледува. Познат е и како халабинска паприка, халеб бибер и пул бибер.

Ако немате Алепо ќе ви послужи и лут, мелен пипер. Готвачите ширум светот се вљубуваат во овој турски појадок, така што можат да се забележат многу варијации од рецепт до рецепт. Некои готвачи го загреваат јогуртот пред да го послужат за да го направат кремаст, додека други го послужуваат ладен.

Најтешкиот дел е подготовката на јајцата, но со малку вежбање е лесно да се добијат добри резултати. За да ги направите јајцата како што треба изберете свежи јајца, бидејќи ако отстојат стануваат водени, па додека се готват нема да се обликуваат добро. Исто така, јајцата треба да бидат ладни, затоа што така остануваат подолго притиснати и нема да „танцуваат” во тавата. Така полесно и ќе знаете кога се готови, бидејќи жолчката ќе биде течна, а белката тврда.

Овој појадок е наречен „чилбир”, па внимавајте да не го смешате со „чимбур” што претставува јадење со мелено месо и јајца кое се подготвува низ целиот Балкан.

Потребни состојки:

• 200 г јогурт
• 1 чешне лук
• 1 лажичка сол
• 2 лажици путер
• 1 лажица маслиново масло
• 1 лажичка мелен пипер
• 2 јајца
• 1 лажица јаболков оцет
• копар

Начин на подготовка:

1. Земете сад со средна големина, наполнете го со вода околу 4 цм и загрејте го. Покријте со друг сад отпорен на температура кој нема да ја допира водата и во него ставете го јогуртот, солта и сечканиот лук. Промешајте.
2. Кога јогуртот ќе се загрее на телесна температура (проверете на кожата) исклучете ја топлината, но оставете го садот.
3. Загрејте го путерот, а кога ќе потемни, исклучете ја топлината и додадете го маслото и мелениот пипер. Промешајте ги.
4. Додадете го оцетот во водата и намалете ја топлината пред да зоврие. Скршете ги јајцата во одделни чинии. Направете кружно движење со лажица, а потоа ставете го јајцето внатре и гответе го на умерена топлина за 3 до 4 минути, а потоа извадете го со слотна лажица.
5. Поделете го топлиот јогурт во две чинии и ставете по едно јајце во секоја, а потоа истурете го маслото со мелениот пипер и по желба украсете со копар.

Можеби досега не сте слушнале за „менемен“, но неговиот вкус дефинитивно нема да го заборавите, токму поради неговиот чудесен состав. Станува збор за лесен турски специјалитет, а еве како да го приготвите.

 Испечати рецепт

Турска манџа на мрзелив начин

Можеби досега не сте слушнале за „менемен“, но неговиот вкус дефинитивно нема да го заборавите, токму поради неговиот чудесен состав. Станува збор за лесен турски специјалитет, а еве како да го приготвите.

Вкупно време30 мин

Кујна: Турска

Клучни зборови: манџа

Порции: 4

Состојки

• 2 зелени пиперки
• 2 црвени пиперки
• 1 или 1/2 глава кромид
• 4 јајца
• 4 домати
• 100 гр зејтин
• Неколку страка магдонос
• По вкус сол и мелен црн пипер

Начин на подготовка

• Најпрво, крупно исечете го кромидот и поставете го во тавата со зејтин да се пржи. Лесно посолете го и додадете прстофат мелен црн пипер. Крупно исечете ги и пиперките и додадете ги кон кромидот во тавата.
• Земете 2 од 4-те домати, исечете ги на коцки и исто така додадете ги кон кромидот и пиперките, а останатите 2 домати крупно исечете ги и оставете ги за крај, кога сето добро ќе се приготви и ќе омекне.
• Пред вторите домати да омекнат, одозгора додадете ги и јајцата, а потоа додадете и мелен црн пипер и сол. Тавата се покрива со капак и се остава така околу 5 минути на средна температура.
• На крај, врз готовото јадење се додава свеж и ситно исечкан магдонос.

Турска алва

Состојки
1кг шекер
500гр брашно
250гр маргарин
180мл зејтин
200мл млеко
100гр какао
200гр лешници
2кесички ванилин шеќер

Млекото, зејтинот, маргаринот и шеќерот се ставаат на оган да се стопат. Кон оваа смеса се додава какаото и убаво се меша да се изедначи. Брашното се меша со ванилата и се додава кон целата топла смеса и се пржи-вари околу 10 минути. На крај се додаваат пржените лешници, убаво се изедначува смесата и се истура во калап. Се остава да се олади, а потоа се сече по желба.
Алвата е убава и ако место лешници се додадат печени несолени кикирики или бадеми.

Турска пица-салата (лахмаџун)

Состојки
1кг брашно
1 квасец,сол,топла вода и малку шеќер
200-300гр мелено месо
200 мл доматен сос,домати,марула,кромид(по потреба)

Тестото го месиме за пица. Додека стаса го запржуваме месото зедно со доматниот сос. Кога тестото ќе биде готово правиме мали пици и ги пржиме (како пишии). Врз нив ставаме од меленото месо. Доматот го сецкаме ситно на коцки,марулата исто и кромидот.Ставаме од салатата врз месото.

Ѓозлеме - традиционален турски рецепт

Состојки
Тесто
1 чаша (200 мл) топла вода
1 пакетче сув квасец
1/2 лажиче шеќер
3 лажици масло
половина лажиче сол
околу 400 г брашно
Фил по желба
мешавина од спанаќ, сирење, кашкавал и малку кромид

Ѓозлеме е традиционален Турски специјалитет. Да одиш во Турција и да не пробаш ѓозлеме е грев. Пред да го пробам го мешав името со нашето ѓомлезе, потоа видов дека се работи за нешто сосема друго. Ѓозлемето е некој вид затворена тенка пита со зајре. Мене највкусно ми е со мелено месо или со спанаќ и сирење. Овој ми беше прв обид да си го направам дома откако пред 2 години последен пат го јадев во Турција и навистина беше превкусно и погодено таман, како што би рекле турците.

Прво се става квасецот во топла вода со малку шеќер и се чека да запени.
Потоа во него се додава постепено брашно по потреба, се додава и сол и масло и се замесува меко тесто. Тестото се остава да стаса 1 час.
Потоа се дели на 8 дела и секој дел на набрашнета површина се трансформира во топче.
Секое топче се развлекува во тенка правоаголнеста кора со помош на сукало, на едната страна се става од зајрето и се преклопува со другиот крај на кората.
Вака подготвеното ѓозлеме се става во намрсено тавче на рингла да се запечи неколку минути од едната страна, па потоа пред да се преврти од другата страна, се мачка со масло од горе и се превртува да се запечи и на другата страна.
Се оставаат на страна сите едно на друго, потоа се сечат на половина и се консумираат додека се топли.
На здравје

Турски чоколаден колач

Состојки
Состојки за чоколадниот бисквит
5 јајца
1 шоља шеќер
1 ванила
1 шоља масло
1 шоља топло млеко
2 шољи брашно
1 пециво
3 лажици убаво полни какао или јас ставив чоколадо во прав
Состојки за чоколадниот прелив
1 шоља шеќер
1/2 шоља масло
3,5 шољи млеко
6 лажици убаво полни чоколадно какао

Вкусен колач за кој рецептов го најдов на јутуб.

За бисквитот се матат пенасто јајцата со шеќерот и ванилата, се додава маслото, млекото, на крај брашното, пецивото и какаото заедно помешани и просеани.
Се истура во намрсено правоаголно плехче со димензии 20 на 30 см., кое претходно е намрсено и обложено со хартија за печење.
Се печи во загреана рерна на 180 степени 35 мин., до сува чепкалка.
Се вади од плехчето, се отстранува хартијата и пак се враќа во плехчето. Се остава да излади, да биди топло кон млако и се сечи на коцки со сакана големина.

Додека се печи колачот се подготвува преливот.
Во тенџере со дупло дно се соединува шеќерот, какаото (го просеав низ сито) и маслото, мешајќи со лажица и кога ќе се добие густа смеса се додава постепено млекото. Потоа се става на рингла и штом зоврие се готви на умерен оган со постојано мешање околу 10 мин.
Се остава да излади, да биди топло.

Пред да се залие колачот со преливот се боцка со вилушка по површината.

Нека убаво излади и сервирајте.

На здравје!

*Шољата е од 250 мл..

Слатко од тиква со кајмак – турски специјалитет

Состојки
1 тиква (долга, медена, мушкатна)
500 гр шеќер
1/2 лажичка цимет
200 гр кајмак (несолен)
За декорација
бадеми, лешници, фстаци, ореви...

Овој прекрасен турски специјалитет за прв пат го пробав во Истанбул и од тогаш (пред 8 години) никако да го извадам од глава, а пак и никако да се решам да го направам.
Еве сега му дојде редот, едноставен е, а многу вкусен. Значи страшно добра комбинација со кајмакот се создава, мора да го пробате.
Мене кога ми го предложија тогаш за десерт си помислив, а бе слатко од тиква, па и со кајмак, што ли ќе излезе од ова, ама навистина интересно, особено вкусно, да не можеш да престанеш да се сладиш.

Подготовка
1. Тиквата ја сечеме на кругови и ја лупиме.
2. Ја редиме во тенџере и ја посипуваме со шеќер и цимет. Го затвораме со капак.
3. Ја уклучуваме ринглата на тивко, ја вариме и внимаваме да не ни загори.
4. Доволни се околу 15-20 минути да се свари односно се вари додека да омекне.
5. Потоа малку оставете ја во шербетот, внимавајте да не ја преварите, затоа што таа се доварува и во шербетот, ама не е ништо страшно, пак е вкусна (од искуство).
6. Сервирајте ја со лажица кајмак и сечкано или дробено јаткасто овошје.

Пробајте можеби ќе посакате и две лажици кајмак, ама знам дека еднаш кога ќе пробате пак ќе сакате да се навратите на овој специјалитет. Лесна е за правење, тиквата ја има преку цела зима, може кога сакате да ја направите.

Забелешка
Самата тиква пушта сок, малку колку што е потребно за да не загори. Затоа не се додава ништо освен шеќерот во варењето. Ако ви остане од шербетот искористете го во колачи и торти.