10 практични кујнски трикови

10 кујнски трикови што мора да ги знаете

1. Како да изберете сочен лимон и да го исцедите максимално?

Кога ќе го земете лимонот во раката, тој треба да е цврст и тежок за својата големина. Кората треба да му е светложолта, без зелени дамки.

Најсочни се лимоните кои имаат тенка кора. Како по правило, лимоните со дебела кора имаат помалку сок. Лимоните со мазна површина обично имаат тенка кора и се сочни. Прескокнете ги лимоните со изразито релјефна површина.

Лимоните со мазна површина имаат потенка кора и се посочни

За максимално да го исцедите сокот од еден лимон, најпрво поставете го лимонот на рамна површина, ставете ја дланката над него и создавајќи мал притисок, потркалајте го напред-назад неколку пати. Потоа ставете го лимонот во микробранова печка 15-20 секунди. На крајот, исцедете го.

2. Како да не ви потонат парчињата овошје на дното на тортата или кексот?

Кога ќе направите сè како што треба според рецептот, воопшто не е забавно на крајот да добиете торта или колач во којшто сите вишни, цреши или јагоди се на дното.

За да не потонат парчињата овошни плодови, пред да ги ставите во тестото, испрпелкајте ги во малку брашно. Кога нивната површина ќе биде прекриена со тенок слој брашно, ставете ги во тестото.

3. Како полесно да го исчистите загореното тавче или тенџере?

Загореното тавче или тенџере предизвикува нервоза кај секоја домаќинка. Но, постои трик кој може значително да ви го олесни досадното напорно триење.

Посипете сода бикарбона по целото дно на садот и налејте малку вода, колку да се покрие дното. Оставете го да стои така неколку часа. Чистењето ќе ви биде многу полесно.

4. Како поточно да го измерите медот?

Многу е тешко да се измери точното количество мед кое го бара одреден рецепт, затоа што медот се лепи на површината на лажицата или шолјата.

За да го решите овој проблем, премачкајте ја лажицата или шолјата со малку маслиново масло. Така, медот ќе се лизга и ќе можете да го употребите целото количество што ќе го измерите.

Исто така, можете прво да ја потопите лажицата во жешка вода, а потоа да нацрпите мед.

5. Како полесно да напишете порака на тортата?

Декорирањето на тортата може да биде многу напорно, особено ако треба да напишете порака како „Среќен роденден“ со интересни букви или пак ако сакате да нацртате некоја форма.

Не се затрчувајте веднаш да испишувате со шприцот. Земете чепкалка за заби и напишете ги зборовите без многу да притискате. На тој начин лесно ќе можете да ги распределите буквите така што да има исто растојание меѓу нив, а потоа и да коригирате таму каде што е потребно. На крајот многу полесно е со шприцот само да ги пратите линиите.

6. Кој е најдобриот начин да скршите јајце?

Кога кршат јајце, најголем дел од луѓето го потчукнуваат на работ на чинијата. Но, во таков случај лушпата се раздробува на ситни парчиња и често некое парче завршува во јајцето (а не е баш лесно да се улови малата лушпа во белката).

За да го избегнете тоа, кога кршите јајце, внимателно потчукнете го на рамна површина.

7. Како да го спречите потемнувањето на излупените и исечените компири?

Ако спремате голем ручек или вечера и немате време да ги лупите и сечкате компирите непосредно пред да ги готвите, може да го направите тоа многу порано, а сепак тие да ја зачуваат својата светложолта боја.

За да не потемнат компирите, потопете ги во сад со ладна вода и ставете го садот во фрижидер. Доколку компирите се целосно потопени, нема потреба да се грижите дека ќе потемнат.

8. Како полесно да излупите чешне лук?

Со помош на нож отсечете го долниот крај на чешнето. Поставете го рамниот дел од голем нож врз чешнето и притиснете одгоре. Лушпите веднаш ќе се одделат и ќе можете без проблем да го излупите.

9. Како штицата за сечкање да не ви мириса на лук?

Не, не треба да ја фрлите штицата за сечкање ако се замириса од лук. Посолете ја со ситна сол, пресечете еден лимон на 4 полумесечини и со парчињата започнете да ја триете солта по површината на кујнската штица. Од време на време исцедувајте по малку сок од лимонот.

Оставете ја штицата да стои неколку часа прекриена со сок од лимон и сол, а потоа избришете ја.

10. Како е најдобро да замрзнете свеж магдонос или нане?

Исечкајте го магдоносот (онака како што сакате да го употребувате) и распоредете го во пластичен додаток за правење коцки мраз. Потоа потурете го со малку течност со коцка за супа и ставете го во замрзнувачот. Кога ќе се замрзнат коцките, соберете ги во кеса која добро се затвора за да не примат миризба. Вака замрзнатите коцки ќе ви послужат за зачинување на супа, манџа или сосови.

Нането, наместо со течност со коцка за супа, потурете го со вода и замрзнете го. Замрзнатите коцки со нане можат да ви послужат за коктели или за ладен чај.

12 трикови и совети за здравјето кои треба да ги знаете

Консумирањето на топла вода со лимон помага при подуеност на стомакот и проблеми со варењето на храната

1. Вода со лимон при проблеми со варењето на храната. 20-30 минути пред вашиот оброк, во чаша топла вода додајте една кафена лажичка сок од лимон и испијте ја.
2. Мраз на раката против забоболка. Тријте коцка мраз 5-6 минути на задниот дел од раката, поточно на областа коjа наликува на „V“, а се наоѓа помеѓу палецот и показалецот. Таму се наоѓаат нерви кои пренесуваат информации до делот од мозокот одговорен за болка во рацете и лицето. Со стимулацијата на овие нерви, можете да ги блокирате сигналите на болка кои се испраќаат до овој дел од мозокот.
3. Арома на ванила против стрес. Чувствувате напнатост и стрес? Вдишете арома на ванила. Мирисот на ванила смирува, релаксира, го намалува чувството на депресија и го подобрува расположението.
4. Кафеав ориз наместо бел против мигрена. Кафеавиот ориз содржи многу повеќе магнезиум од белиот ориз и поради тоа ја редуцира појавата на симптоми на мигрена. Освен тоа, кафеавиот ориз го намалува ризикот од срцев и мозочен удар.
5. Мраз против модринка. По ударот, веднаш ставете мраз на засегнатото место. Мразот предизвикува стеснување на повредените крвни садови и со тоа ќе се намали отечувањето. Ниската температура ќе го „здрви“ местото и ќе ја намали и болката. Наредниот ден ставете топла облога за да ги раширите крвните садови и да ја подобрите циркулацијата.
6. Нежно растегнување на мускулот против грч. При појава на грч на мускул, внимателно растегнете го мускулот и масирајте го додека не почувствувате подобрување. Растегнувањето помага при грчеви без разлика дали тие се причинети од дехидратација, интензивно вежбање, повреда на мускулот или предолго седење во иста положба.
7. Бебешка пудра против миризливи нозе. За да ја спречите појавата на непријатна миризба во обувките, ставајте малку бебешка пудра во вашите чорапи пред да ги облечете. Бебешката пудра го намалува потењето.
8. Поретко чешлање против мрсна коса. Мрсната коса треба да се чешла колку што е можно поретко, бидејќи чешлањето предизвикува скалпот да произведува уште повеќе природни масла.
9. Читање книга за поголема концентрација. Додека читате потребно е да останете фокусирани подолго време. Тоа ве прави повнимателни, попрактични и пообјективни, а исто така и ви ја развива способноста за донесување одлуки.
10. Масло од еукалиптус против болка во грбот. Нанесете масло од еукалиптус на областа каде што чувствувате болка и нежно протријте.
11. Цигари со млеко за откажување од пушењето. Да, звучи чудно, но многумина тврдат дека токму тоа ги одвикнало од оваа штетна навика. Потопете ги вашите цигари во млеко и оставете ги да се исушат. Нема да можете да испушите ниту една цигара докрај, затоа што ќе ви остава непријатен вкус на јазикот.
12. Албум со стари фотографии против депресија. Тажни сте? Прелистајте албум со фотографии од детството. Старите фотографии носат многу спомени и емоции. Па, ставете си на дофат на рака мал албум со фотографии кои ви предизвикуваат убави позитивни чувства и во стресните или депресивните моменти користете го како лек.