Зголемување на платите во држ.сектор за 10%

Со укинувањето на одредени членови од Законот за спроведување на буџетот од страна на Уставниот суд, Владата треба на вработените во јавниот сектор да почне да им исплатува хранарина и превоз во износ од 3.900, односно 1.400 денари. Како што сметаат од Сојузот на синдикатите на Македонија (ССМ), Владата и покрај таквата одлука на Уставниот суд што била донесена на втори април годинава, истата до денес не ја спроведува и на вработените и натаму им исплаќа по 2.300 денари за храна и 900 за превоз.

- На тој начин на најголемиот број од вработените во јавниот сектор им се скусуваат по околу 30 евра месечно. Законот за работни односи е дециден - надоместокот за хранарина изнесува 25 проценти од просечната плата во Републиката и во тој износ (околу 3.960 денари) го примаат само здравствените работници. Јавните претпријатија, фондовите и други јавни установи кои иако имаат потпишано колективни договори, примаат хранарина од 2.300 денари - вели Драге Јовановски од ССМ.

Со Колективниот договор за јавниот сектор што Владата го потпиша со Конфедерацијата на слободни синдикати, е предвидено вакви намалени надоместоци да се исплатуваат до крајот на годинава, а потоа да се преговара за други суми. Од ССМ упатија барање до Владата веднаш да седнат и да почнат преговори за овој актуелен проблем со оглед дека од Нова година ќе се започне со исплата на бруто плата, во кој износ ќе се внесат и надоместоците за храна и превоз.