Изворни христијани, нивно основање и учење

   Житие на св.апостол и евангелист Јован Богослов

ДЕЛ 8

На острвот Патмос имало некој маѓесник по име Кинопс; тој живееше на пусто место и многу години се познаваше со нечистите духови. Заради измамите кои тој ги изведувал, сите жители на острвот го сметаа за бог. А жреците Аполонови, бесни на апостол Јован затоа што им ги сруши идолопоклоничкиот храм на Аполон и затоа што сите луѓе ги обрати во својата христијанска вера, отидоа кај Кинопс и му се пожалиле поради апостолот Христов, молејќи го да се одмазди за посрамувањето на нивните богови. Но Кинопс не сакаше сам да оди в град, затоа што многу години живееше на тоа место не одејќи никаде. Меѓутоа граѓаните се повеќе доаѓаа кај него со истата молба. Тогаш тој им вети дека во Мироновиот дом ќе прати зол дух да ја земе Јовановата душа и да ја предаде на вечен суд. И утредента тој кај Јована прати еден од кнезовите на злите духови, заповедајќи му да му ја донесе душата на Јован. Доаѓајќи во домот Миронов, демонот застана на местото каде што беше Јован. Гледајќи го демонот, Јован му рече: „Ти наредувам во името на Исус Христос да не се поместиш од тоа место додека не ми кажеш зошто си дошол ваму кај мене. – Врзан со Јовановите зборови, демонот остана неподвижен и му рече на Јована: „Аплоновите жреци дојдоа кај Кинопс и го замолија да дојде во град и тебе да те наведам на смрт, но тој не сакаше, велејќи: „Многу години живеам на ова место без да одам никаде: зарем сега да се мачам себеси заради еден беден и безвреден човек? Вие одите по вашиот пат, а јас утре ќе го пратам својот дух и тој ќе ја земе неговата душа и ќе ми ја донесе, а  јас ќе ја предадам на вечен суд“. – И Јован го прашал духот: „Дали тој некогаш те пратил да земеш некоја човечка душа и да му ја однесеш? – Демонот одговори: „Сета сатанска сила е во него, и тој има договор со нашите кнезови, и ние сме со него, така што Кинопс не слуша нас, а и ние него. – Тогаш св. Јован рече: „Јас, апостолот на Исуса Христа, ти наредувам тебе, зол духу, веќе да не влегуваш во човечки обиталишта, ниту да се враќаш кај Кинопс, туку да заминеш од овој остров и да се мачиш. – И демонот веднаш се оддалечи од островот.

Но, Кинопс гледајќи дека духот не се врати, пратил друг, но и овој така пострада. И уште други два кнезови на темнината пратил тој, на едниот му наредил да влезе кај Јована, а другиот да стои надвор и да му донесе одговор. Влегувајќи кај Јован, демонот пострадал како и другите пред него, а другиот демон кој стоеше надвор, гледајќи ја неволјата на својот другар, избега кај Кинопс и му раскажал што се случило. Тоа го разјарило Кинопса, и тој земајќи големо мноштво на демони, отиде во градот. И сиот народ се израдува гледајќи го Кинопс и сите доаѓаа и му се клањаа. Наоѓајќи каде Јован ги поучува луѓето, Кинопс страшно се налутил и му рекол на народот: „Луѓе слепци, залутавте од правиот пат, чујте ме! Ако е Јован праведен, и се што тој го зборува, вистина, нека тој поразговара со мене и нека направи чуда какви што правам јас, па ќе видите кој е поголем, Јован или јас. Ако тој се покаже како поголем од мене, тогаш и јас ќе поверувам во неговите зборови и дела.

И Кинопс се обратил на едно момче и му рекол: Момче, жив ли е твојот татко? – Момчето одговорило: - Умрен е. – Го праша Кинопс: Со каква смрт умре? – Овој одговори: -Беше морепловец, и кога се разби лаѓата, се удави во морето. – Му рече Кинопс на Јована: Сега, Јоване, покажи ја својата сила, за да поверуваме на твоите зборови – донеси го таткото жив пред својот син. – Јован одговори: Христос не ме прати да подигам мртви од морето, туку заблудените луѓе да ги поучувам. – И му рече Кинопс на присутниот народ: Барем сега поверувајте ми дека Јован е измамник и ве мами: земете го и држете го додека не го донесам таткото на момчето жив. – И тие го фатија Јован, а Кинопс ги рашири рацете и плесна со нив, и се чу плисок на морето и сите се уплашија, а Кинопс стана невидлив. Тогаш сите повикаа: Велик си, Кинопсе. И одеднаш тој излезе од морето, држејќи го, како што рече, таткото на момчето. И сите се восхитија. Кинопс го праша момчето: Овој ли е твојот татко? - Да, господине! – одговори момчето. Тогаш сите му се поклонија на Кинопс и сакаа да го убијат Јована. Но Кинопс им забрани, велејќи: Кога ќе видите поголеми чуда од ова, тогаш тој нека биде мачен.

После тоа, Кинопс повика друг човек и го праша: - Си имал ли син? Овој одговори: - Да, господине, имав, но некој од завист го уби. Тогаш Кинопс гласно ги призвал и убиениот и убиецот, и тие веднаш се појавиле и Кинопс го прашал човекот: - Овој ли е твојот син? – Да, господине – одговори тој. Тогаш Кинопс го прашал Јована: - Се восхитуваш ли, Јоване? Свето Јован одговори: Не, јас не се восхитувам на тоа. Тогаш Кинопс рече: Поголеми чуда од ова ќе видиш, и тогаш ќе се восхитуваш и нема да умреш се додека не те заплашам со чудеса. Свети Јован му одговорил: - Твоите чудеса брзо ќе се срушат. Слушајќи вакви зборови, народот се фрли на Јована и го тепаа се дотогаш додека не заклучија дека е мртов. Му рече Кинопс на народот: Оставете го непогребан, да го разнесат птиците небесни. И тие си заминаа од тоа место радувајќи се со Кинопс и славејќи го.

После тоа Кинопс слушајќи дека Јован е жив и го поучува народот на местото наречено Каменувалиште, го повика демонот со чија помош правеше маѓии, повикување мртви и кога отиде кај Јована, му рече: Сакајќи да ти приредам поголем срам и осуда, затоа те оставив до сега жив; ајде на морскиот брег и таму ќе ја видиш мојата сила и ќе се посрамиш. А него го следеа тројца демони, кои народот ги сметаше за луѓе воскреснати од мртвите од страна на Кинопс. Кинопс силно заплеска со рацете, нурна во морето и стана невидлив за сите присутни. И народот повика: Велик си, Кинопсе, нема друг како што си ти. А Јован им нареди на демоните кои беа во човечки облик да не се поместуваат од место. И се помоли на Господ Кинопс да не се појави веќе жив и така и стана, затоа што одеднаш морето се разбесни и разбранува и Кинопс не излезе веќе од морето, туку остана во неговите длабочини, како некогаш бедниот фараон. А на демоните кои народот ги сметаше за луѓе воскреснати од мртвите, Јован им рече: Во името на Исуса Христа распнатиот и во третиот ден воскреснатиот, напуштете го овој осстров. И тие во тој час исчезнаа. А народот седеше на брегот три дена и три ноќи чекајќи Кинопс да излезе од морето, така што од глад, жед и сончева топлина многумина од нив изнемогнаа и лежеа безгласни, а три деца умреа. Тогаш Јован сожалувајќи се на народот, се помоли за нивно спасение, многу им говореше за верата, ги воскресна трите умрени деца, ги исцели болните, и сите тие еднодушно се обратија кон Господа, се крстија, и се разотидоа по куќите свои славејќи го Христа Бога. А Јован се врати во Мироновиот дом и често одеше кај народот и ги учеше на верата во Господа Исуса Христа.

Внеси реплика	страница <1 7 8910 11 13 >
Tweet