Студентски Марш

Откако повеќе од 23 факултети и институти и универзитети преку допис до Министерството за образование го одбија или му најдоа маани на државниот испит и откако тоа нивно мислење беше игнорирано од властите, денеска преку дневниот печат, група професори јавно се обраќа до власта и ѝ порачува да го повлече државниот испит. Околу 110 професори со име и презиме се потпишуваат под обраќањето во кое ја информираат Владата дека доколку не отстапи од почнатата постапка повторно да го измени Законот за високо образование, тогаш таа ќе се соочи со жесток отпор во сите негови академски и граѓански облици.

Професорите ѝ укажуваат на Владата дека со последните измени, односно со државниот испит, го укинала Универзитетот и дека ја заковала последната шајка во мртовечкиот ковчег на автономијата на Универзитетот.

И покрај официјалните ставови на академската заедница, која заеднички ѝ се спротистави на мерката со која власта цапнува нога и на универзитетите, во неделата, со директен пренос на телевизија, владата го усвои предлог-законот и го испрати во Собранието на гласање, во редовна постапка.

Студентскиот пленум како реакција на ова за в петок во 14 часот го закажа третиот протест за кој организаторите рекоа дека очекуваат да биде најмасовен досега.