ВЕРСКИ ВЕСТИ

ПЕТТООДДЕЛЕНЦИТЕ ЌЕ ИЗБИРААТ

Веронаука или историја на религии

Основците од петто одделение од учебната 2008/09 година за нов изборен предмет ќе можат да одбираат меѓу веронаука или историја на религии

Веронаука или историја на религии е новиот изборен предмет што ќе имаат можност да го одберат петтоодделенците од учебната 2008/09 година. Доколку нивниот избор биде веронаука, ќе се запознаваат само со православната и исламската вера, а доколку се одлучат за историја на религии, тогаш ќе ги изучуваат сите религии. Часовите што ќе бидат предвидени со наставната програма по веронаука ќе ги изведуваат дипломирани теолози, а оние од историја на религија - социолози или историчари. Воведувањето на верското образование во училиштата наметна потреба од измени на Законот за основно образование, што поминаа на Влада и веќе се влезени во собраниска процедура. Ова беше и пречката, што обидот за воведување веронаука уште во времето на поранешниот министер за образование Ненад Новковски пред четири години падна на Уставен суд.

- Со оваа измена ние разградуваме еден од последните делови на претходниот систем. Секуларизмот не треба да го сфатиме како државно промовиран и утврден атеизам или антитеизам. Секуларизмот претставува право за избор. Со воведувањето на верското учење настојуваме да ги воведеме младите луѓе за предизвиците во идното глобално опкружување, рече на вчерашниот прес владиниот портпарол Ивица Боцевски.

Според министерот за образование Сулејман Рушити, мнозинството од граѓаните се за изучување на верско образование.

- Живеејќи во време кое е оквалификувано како духовно сиромашно се наметна потребата од воведување на верско образование во основните училишта кое има за цел преку промовирање на универзалните вредности на кои се темелат сите религии да се изгради граѓанскиот дух на учениците. Верското образование ќе иницира процес во кој децата ќе го развијат својот религиозен идентитет и ќе придонесе да се почуствуваат како дел од општеството, вели Рушити.
Министерот за образование смета дека верското образование ќе овозможи продолжување на верското наследство, зачувување на верските заедници, зајакнување на меѓусебната толеранција и почитување на човековите права и слободи.

Основците верско образование ќе изучуваат само една година. Теолозите, социолозите или историчарите за да предаваат веронаука или историја на религии ќе треба да добијат сертификат од Министерството за образование.

Милена ГЕОРГИЕВСКА