ВЕРСКИ ВЕСТИ

СПЦ не сака дијалог со МПЦ - ПОА се распаѓа

Битола /05/04/ 15:23

Македонска православна црква (МПЦ) ја обвини денеска Српската црква (СПЦ) дека не сака дијалог и оцени дека „нејзината агентура во Македонија“, ПОА, се распаѓа.

„Нема доволно слух за надминување на проблемот со СПЦ, изјави Митрополитот на Преспанско-Пелагониската епархија г. Петар, на денешната пред Велигденска средба со новинарите во Битола.

Според него, од СПЦ нема сигнал за продолжување на преговорите, откако МПЦ од пред повеќе од еден месец испрати писмо за обновување на дијалогот.

„Очекуваме како посредници меѓу двете Цркви да се вклучат другите помесни православни цркви, Романската, Бугарската и Руската. Останува да видиме дали тие ќе соберат сила да и погледнат на вистината во очи и да помогнат во надминување на овој вештачки проблем“.

Владиката Петар, како што јави дописникот на Макфакс, оцени дека Православната Охридска Архиепископија (ПОА) е агентура на СПЦ инсталирана во Македонија, која е во фаза на распаѓање.

Тој потврди дека монасите и монахињите масовно ја напуштаат ПОА на Јован Вранишковски и дека тоа е очекувано.

„Оваа инсталирана агентура на СПЦ не е од Бога, туку злонамерно направена од луѓе со намера да и наштетат на нашата Црква и народ. Очекувам дека ќе се распадне, затоа што не е Божја работа“.

Што се однесува до новиот закон за верски заедници, г. Петар очекува повеќе разбирање од меѓународниот фактор и вели дека членот 8, кој не дозволува регистрација на групи кои произлегуваат од верските заедници, не смее да се брише од законот.

„Сметам дека ова треба да го почитува ЕУ, затоа што стабилноста на едно општество не зависи од некој закон што ќе ни биде наметнат однадвор, туку исклучиво од тоа како верските заедници делуваат меѓусебно, а по ова прашање постои консензус“, вели Петар./крај/де/б

Не само оваа компанија. Разни приватни лица носат сувенири и тие се продаваат, објаснува Секретарот на скопската епархија. Финансиските експерти, велат дека не е спорно приватни компании да продаваат сувенири во црквите на МПЦ, доколку на тој начин не се обидуваат да ги прикријат законските даночни давачки.

Златни крстови и приврзоци на Голдмак од Радовиш, за Велигденските празници ќе се продаваат во храмовите на Македонската православна црква. Радовишката компанија за златни сувенири и МПЦ склучиле договор, а од неодамна и почнале со кампања во дел од печатените медиуми. Ова е прв пат една приватна компанија, преку храмовите на МПЦ да ги продава своите производи. Што содржи договорот и кои се обврските засега официјално никој не сака да соопшти.

Директорите на Голдмак од Радовиш, вчера не беа во можност да ја образложат оваа бизнис зделка со Македонската православна црква. Од компанијата, за Вечер изјавија дека и финансовиот директор и генералниот директор биле на службено патување, а одговор на нашето прашање можеме да добиеме од понеделник.

И во Македонската православна црква не соопштуваат за каков договор станува збор. Секретарот на Скопската епархија, Коста Станоевски само потврди дека крстовите оваа година за прв пат ќе се продаваат во сите епархии, но вели дека во тоа нема ништо спорно.

-Не само оваа компанија. Разни приватни лица носат сувенири и тие се продаваат. Како е тоа регулирано не знам, но мислам дека во тоа нема ништо лошо затоа што тоа е јасно соопштено, објаснува секретарот на Скопската епархија.

Финансиските ескперти, пак, велат дека не е спорно приватни компании да продаваат сувенири во црквите на МПЦ, доколку на тој начин не се обидуваат да ги прикријат законските даночни давачки.
-МПЦ е непрофитно здружение на граѓани, која нели не подлежи на дополнителни фискални оданочувања. Но од друга страна Голдмак од Радовиш е профитна компанија, која за продажбата на своите сувенири е должна да издава фискални сметки. Како тоа го регулирале таа компанија и МПЦ треба да соопштат, велат финансиските експерти.

Недамна верските заедници и Управата за јавни приходи, постигнаа согласност дека нема основа за фискализирање на верските институции, бидејќи тие не остварувале приходи од утврдени ценовници за нивните услуги, туку од даренијата на верниците.

Поглаварите на МПЦ, ИВЗ, Католичката црква, Евангелско-методистичката и на Еврејската заедница, побараа и амандмански измени на законот за готовинско плаќање, во кој очекуваат тие и законски да бидат изземени од фискализацијата. (М.Н.)

ИСЛАМСКАТА ЗАЕДНИЦА ПРЕДУПРЕДУВА

Вехабити тропаат на џамиските порти во земјава

Вехабитското учење не е доминантно меѓу исламските верници во земјава, но не треба да се потценува, вели функционер на ИВЗ

Во Македонија се присутни вехабитите, кои настојуваат да го прошират своето учење, но тоа не е од такви размери да може да го потисне традиционалниот ислам, кој се векови се проповеда тука, тврдат во Исламска верска заедница (ИВЗ) во Македонија.

Функционер на ИВЗ вели дека ја следат ситуацијата во земјава и во регионот, особено по откривањето бункер со оружје во близина на Нови Пазар, Србија, кој се поврзува со петчлена група вехабисти.

- Вехабистичкото учење во Македонија најмногу доаѓа преку студенти или луѓе што или заради школување или од други причини биле во некоја од блискоисточните земји. Имаме сознанија за одредени проблеми во одделни џемати, но тоа не е од таков карактер да може да ги смени убедувањата на нашите верници, од кои мнозинството се определени за сунитско учење во исламот. Сепак, не треба да се потценува ниту една појава, па ни оваа - вели нашиот соговорник.

Вехабизам е вид традиционално учење во исламот, кое потекнува од Саудиска Арабија. Тоа се разликува од другите исламски учења по тоа што настојува да ги врати муслиманите кон изворната интерпретација на исламот. Вехабитите не ги признаваат државните граници, а Коранот го сметаат за единствен устав на универзална исламска држава. Одделни експерти сметаат дека вехабизмот стои зад терористичките акции во некои земји.

Во македонското МВР велат дека имаат сознанија за присуство на вехабити во земјава. Полициските извори истакнуваат дека во одделни акции било пронајдено оружје кај луѓе што се поврзуваат со припадниците на ова учење.

- Тоа се поединечни случаи, кои не смеат да се потценуваат - велат во МВР.

Поранешниот министер за образование Азиз Положани оценува дека е неопходно да се разговара за ова.

- Тоа што некој се облекува како вехабит не значи дека е носител на одредени активности. Сигурен сум дека традиционалниот ислам ќе може да ги надвладее негативните последици на таквото учење - вели тој.

Исламската заедница во Македонија лани повеќепати беше цел на нападите од радикални структури во периодот кога се водеше внатрешната битка за избор на нов поглавар. Новоизбраниот реис-ул-улема Сулејман Реџепи по изборот за поглавар изјави дека целта му е да се надминат несогласувањата во редовите на заедницата. Експертот за тероризам од Брисел Клод Монике тогаш предупреди дека во Македонија дејствуваат фундаменталистички исламски елементи. Дури и Светската муслиманска лига, невладина организација со седиште во Саудиска Арабија, во посебно соопштение истакнува дека во Македонија има „многу фанатизирани луѓе, кои дејствуваат во различни региони во земјата“.

ИВЗ поканета во Нови Пазар

Поглаварот на ИВЗ Сулејман Реџепи е поканет да присуствува како гостин на денешното основање на Исламската заедница на Србија, кое е закажано во Нови Пазар, каде што неодамна беше откриен камп за воена обука на вехабисти. Засега е неизвесно дали Реџепи ќе одговори на поканата. Причината за дилемите е и фактот што ова ќе биде втора исламска заедница во Србија, бидејќи веќе постои Собор на ИВЗ во Белград. Заговорниците на Собранието во Нови Пазар најавуваат дека тие ќе ги обединуваат исламските верници од Санџак, Прешевската Долина, Војводина и од централна Србија, а за врховен поглавар ќе го признаваат реисот Мустафа Цериќ од Сараево. Тие истакнуваат дека Заедницата ќе претставува и брана за ширење на вехабизмот во регионот.

(Б.Ѓ.)