Храната како лек!

Познато е дека пиперките се вистински рудник на витамините А и Ц, без оглед дали станува збор за оние црвените, жолтите, големите или малите. Лутината помага при настинка, зашто го стимулира исфрлувањето на секретот со кивањето и кашлањето. А сега е докажано дека содржи и супстанција која ги намалува болките.
Станува збор за капсаицин, хемикалија која ги парализира нервните завршетоци и така спречува болните сигнали да стигнат до мозокот. Испитувањата покажаа дека кремовите изработени врз база на оваа супстанција ја ублажуваат мигрената на неколку дена, па дури и недели

Моркови и сливи за совршен тен

Луѓето кои јадат овошје и зеленчук со јаки бои, како што се морковите и сливите, се попривлечни, укажува истражувањето на британските и на белгиските научници. Тие ја истражувале врската помеѓу бојата на тенот и привлечноста и откриле дека останатите ги доживуваат луѓето со жолтеникав тен како поздрави и, со самото тоа, попривлечни. За таа жолтеникава нијанса на кожата се виновни жолтите пигменти или каротеноидите кои се наоѓаат во одреден вид овошје и зеленчук. Доктор Иан Стефен, еден од научниците кои работеле на проектот, се надева дека резултатите од истражувањето би можеле да ги поттикнат младите да јадат повеќе овошје и зеленчук, особено кога се знае дека за видливите резултати се доволни два месеца јадење, на пример, моркови. Доктор Иан Стефен вели дека е доволно само да им кажеме на младите:
"Ќе изгледате многу попривлечно за само два месеца ако јадете повеќе овошје и зеленчук

Печената риба го чува срцето

Редовното земање на туна или на други печени риби може да биде едноставна, но значајна бариера за стеснувањето на крвните садови и на срцевиот мускул кај постарите лица. Рибата подготвена на скара или печена во рерна го намалува ризикот од смртоносната срцева аритмија. Меѓутоа, ова не важи ако рибата е пржена во масло.
Предноста на печената риба се крие во масната киселина омега-3, која на овој начин не се губи како што исчезнува ако се пржи во масло, сметаат истражувачите.
Киселините омега-3 се значајни, зашто го намалуваат широкиот спектар на срцеви проблеми, а исклучително се важни за развојот и функцијата на мозокот.

Пашканатот добар за срце и за диета

Пашканатот е диуретик, го регулира и крвниот притисок, но и ја забрзува борбата против целулитот. Според своите прехранбени и лековити својства, тој спаѓа во редот на највредните зеленчукови култури. Но, за жал, во многу наши краишта тој е речиси непознат, а и таму каде што е познат, се користи, главно само како додаток во супите. Енергетската вредност во 100 грама пашканат одговара речиси на енергетската вредност на 100 мл млеко - 75 калории.
Од другите видови коренест зеленчук, пашканатот се разликува по високата содржина на минерални состојки. Речиси половина од нив отпаѓа на калиумот што е од посебно физиолошко значење. Калциум и фосфор има подеднакво, а покрај тоа е богат и со магнезиум, сулфур, железо и бакар. Натриум има релативно малку, што го вбројува во редот на важните диетални продукти. Од витамините најмногу има витамин Ц и бета каротин.
Коренот и семето од пашканатот се извонреден диуретик, го поттикнуваат излачувањето на мочта, во елиминирањето на гасовите од желудникот и цревата, го регулираат крвниот притисок, а се користи и за поттикнување на апетитот. Ако густа супа од пашканат и праз се јаде подолго време, нејзиното диуретично дејство значително ќе влијае врз намалувањето на телесната тежина и ќе ја забрза борбата против целулитот.

Во периодот на пост, рибата е главна на менито на многу православни верници.

Освен што е вкусна, здрава и може да се подготви на многу различни начини, рибата лесно се вари. Богата е со витамини, минерали и аминокиселини.

Туна:

Богата е со минералот селен и витаминот А, кои играат важна улога во борбата против слободните радикали.

Ослиќ:

Има мала енергетска вредност и спаѓа во диететските намирници. 100 грама ослиќ содржи 80 % вода, 0,85 грама масти и 17,2 грама белковини. Богат е со витамините Б1 и Б2, калиум, калциу и фосфор. Позитивно влијае на коските и работата на мозокот.

Сардина:

Содржи магнезиум и триптофан, кој благотворно влијае на нервниот систем и го подобрува расположението. Богата е со протеини, омега 3 киселини и калиум.

Пастрмка:

Се препорачува за дијабетичарите и лицата со висок крвен притисок. Таа е нискокалорична и содржи малку натриум (40 мг во 100 грама) и штити од кардиоваскуларни тегоби.

Крап:

Спаѓа во помрсните риби. Богат е со белковини, омега 3 киселини, витамини А, Д и Е. Го чува мускулот на срцето и ги ублажува тегобите од болестите на крвните садови и псоријазата.