Македонија интересна за Аугенталер, Блажевиќ, Жирес

Тренери од светски калибар во трка за клупата на македонската фудбалска репрезентација

Сашко Ѓ. Димовски

Германецот Клаус Аугенталер, Французинот Алан Жирес и Хрватот Мирослав Ќиро Блажевиќ изразија подготвеност за преземање на селекторската работа во македонската фудбалска репрезентација. Тоа се новите имиња, според Фудбалската федерација на Македонија (ФФМ), што лицитираат за пополнување на испразнетото место по предвременото разрешување од функцијата на Мирсад Јонуз.

Аугенталер пројавил интерес за македонското фудбалско кормило преку македонскиот интернационалец, Саша Ќириќ, кој долги години живее и работи во Германија. Прославениот првотимец на минхенски Баерн и германски репрезентативец, во чија биографија стои дека бил асистент на Џовани Трапатони во стручниот штаб на Баварците, а потоа и нивни тренер, е најнов во низата тренерски имиња за водење на нашиот национален тим. Покрај Баерн (М) тој беше тренер и во уште неколку други бундеслигашки екипи како Нирнберг, Баер Леверкузен, Волфсбург, Унтерахинг. Но, во последната група за можен наследник на Јонуз не е единствен.

Конк*ренција ќе има во Мирослав Ќиро Блажевиќ. Хрватскиот тренерски стручњак направи бум со селекцијата на БиХ во квалификаците за СП 2010. Во моментот е на чело на олимписката репрезентација на Кина меѓутоа Блажевиќ, според ФФМ, повторно пројавува интерес за работа во Македонија како што беше случај и по заминувањето на Среќко Катанец, а пред изборот на Мирсад Јонуз.

Трето и последно тренерско име, најзвучно досега во актуелната потрага за нов македонски селектор, е Французинот Алан Жирес. Контактирано е преку неговиот менаџер кој порачал дека клиентот што го застапува е подготвен да застане на чело на репрезентацијата на Македонија по завршување на циклусот на квалификации за пласман на ЕП2012 во Полска и Украина. Жирес моментно е на кормилото на Мали, а покрај бројните клубови во кои работеше досега, ги предводеше уште и националните состави на Грузија и Габон.

Првиот човек на ФФМ, Харалампие Хаџи-Ристески, веќе оствари средби со потенцијалниот домашен тренерски кадар. Прв во низата кандидати со кого се разговараше беше Ѓоко Хаџиевски, по него и со Ѓоре Јовановски, Илчо Ѓоргиоски, Артим Шаќири, со менаџерот на Чедомир Јаневски и со многу други. Новиот македонски селектор треба да биде познат до 15 јули. До крајот на оваа недела можно е да се одржи и седница на Управниот одбор на ФФМ по која ќе бидат отстранети многу дилеми. Наредниот натпревар (пријателски) на нашата репрезентација е закажан на 10 август во Баку против селекцијата на Азербејџан.

Претседателот на ФФМ, Хари Хаџи-Ристески од денеска ги започна разговорите со потенцијалните кандидати за селектор на најдобрата македонската фудбалска репрезентација.

Во просториите на федерацијата, првиот човек на ФФМ разговараше со поранешните селектори на националниот тим Ѓоко Хаџиевски и Ѓорѓи Јовановски. Хаџи-Ристески одржа состанок и со претседателот на Тренерската организација во ФФМ, Вујадин Станојковиќ со што и тренерскиот еснаф е вклучен во изборот на наследник на Мирсад Јонуз.

"Извршени се телефонски разговори и со тренери од странство кои изразија заинтересираност за функцијата како Зоран Филиповиќ, Љупко Петровиќ, Пламен Марков и Зија Доган кој во текот на утрешниот ден ќе пристигне на разговори во Скопје." - изјави Хаџи-Ристески за официјалниот веб сајт на ФФМ, додавајќи:

"Исто така остварени се контакти и со менаџерот на нашиот интернационалец Чеде Јаневски".

"Покрај овие имиња има уште неколку менаџерски понуди за квалитетни тренерски имиња кои сигурно се интересни за нас, но далеку од нашите финансиски можности. Во секој случај ќе ги разгледаме сите опции, ќе го почитуваме мислењето на тренерската организација и најдоцна до 15. јули ќе го соопштиме новиот селектор на македонската фудбалска репрезентација" категоричен е Хаџи-Ристески.

Отказ за Мирсад Јонуз!

Македониjа загуби уште едни квалификации. Станавме селекција која служи за ,,билдање“ на бодови и селекција која го загуби респектот кој го имаше од европските репрезентации.

Ако ништо друго порано знаевме да им ги замрсиме сметките на оние ,,големи“ фудбалски велесили, да ги ,,испотиме“на Арената „Филип Втори“ или порано на Градскиот стадион. Ретко која селекција можеше да се пофали дека тотално не надиграла на нашиот терен. Но, сега...сега сликата за жал е сосема поинаква...

Уште кога беше извршена ждрепката за квалификациите за Европското првенство во Полска и Украина, македонската спортска јавност се израдува. Добивме група и противници, со кои барем според имињата можеме да се носиме. Добивме надеж дека конечно, по примерот на сите екс југословенски републики и ние ќе се вмешаме во битката за едно од првите две места. Но, наместо тоа добивме големо разочарување.

Добивме и нов фудбалски храм, фудбалски дом каков што заслужуваат сите репрезернтации. На дуелот со Р. Ирска имаше најголема посетеност и максимална поддршка од трибините, но сепак се е тоа попусто кога едноставно нема кој да ги води оние момци кои го носат националниот дрес. По кој знае кој пат тие со наведнати глави го напуштаат теренот. По кој знае кој пат тие делуваа немоќно пред една репрезентација која објективно не е ништо подобра од нив. Но, зошто е тоа така? Дали нашата верба во овие момци е само наша илузија дека тие можат да не однесат до успехот, или тие навистина имаат сила, имаат знаење, имаат желба за успех...Да, нашата верба е вистинска, нивната желба е голема, нивната сила е доволна, но немаме победнички менталитет. Нема кој да ги предводи овие момци, нема кој да им помогне до патот кон успехот. Конечно, да ние немаме таков селектор...

Мирсад Јонуз, сам против сите, човекот кој требаше да ги поттурне нашите момци до победа, кој требаше да внесе победнички менталитет, беше убеден дека тој може да се носи со овој товар. Но се излажа самиот, не излажа и сите нас. Наместо радост ни донесе разочарување, наместо успех ни донесе дебакл, наместо напредок на ФИФА листата ни донесе голем пад, наместо продор кон врвот и кон привилегираните ,,шешири“ за ждрепките, ние се најдовме во оние аутсајдерски...И сето тоа поради човекот кој не го тангираат свирежите од публиката и мислењето на јавноста.

Можеби не можеме да очекуваме многу од човек кој во својата тренерска кариера немал причини за радост, човек кој со младата македонска селекција немаше ама баш никаков успех, но сепак очекувавме дека тој ќе има храброст самиот да каже, доста е си заминувам, јас немам сила и знаење за оваа функција. Но, не Мирсад Јонуз се уште се бори сам против сите. Се уште мисли дека тој е во право, а револтот на сите други е неоснован.

Овие квалификации се загубени, време е да се смени нешто и да се остави простор на некој друг селектор, до следните квалификации да го поправи сето она што Јонуз го расипа. Време е некој да се жртвува, време е да се каже ДОСТА Е.

Грозданоски преку Работнички до репрезентација

Враќање во репрезентативниот дрес преку успешни настапи за Работнички е главната цел на поранешниот фудбалски репрезентативец Влатко Грозданоски, кој по седум години повторно се враќа во македонскиот фудбал.
- Се одлучив за Работнички бидејќи располага со млад и квалитетен состав и поради тоа што има големи амбиции како во Лига Европа, така и во првенството. Добро се познавам со директорот Ангеловски и тренерот Петрески, со кои играв во Цементарница, па затоа за само десетина минути се договоривме за сите поединости. Во македонскиот фудбал се вратив со амбиции повторно да го облечам репрезентативниот дрес - рече Грозданоски на вчерашната промоција.
Според договорот, тој ќе остане една година во Работнички и ќе го носи дресот со број девет. Последен клуб на Грозданоски беше иранскиот второлигаш Дамаш.
На вчерашната прес-конференција, директорот Ангеловски информираше дека по заминувањето на Глигоров, нов капитен ќе биде Борче Маневски, а околу претстојната ждрепка за првото коло на Лига Европа, тој го посакува претставникот на Сан Марино.
Тренерот Горан Петрески ги презентираше планот на подготовките и засилувањата, кои и се потребни на екипата.
- Први од прволигашите ги почнавме подготовките, на кои на 22 и 24 јуни ќе се сретнеме со Рад и Партизан. Приоритет ми е да внесам победнички дух во екипата и препознатлив напаѓачки стил на игра. Што се однесува до засилувањата, покрај Грозданоски, до петок планираме да донесеме уште еден до двајца новаци, и тоа на страничните позиции и во средниот ред - рапортираше Петрески