Свински грип

Среда, 18 ноември (Макфакс
) - Министерот за здравство Бујар Османи вечерва потврди дека во Македонија починала првата жртва, маж на 32 години, како последица од новиот грип А Х1Н1.

Министерот прецизираше дека пациентот починал попладнево и оти имал тешка тешка клиничка слика

Пациентот со висока температура и отежнато дишење во понеделникот бил примен во болница во Скопје, по што поради потешка форма на пневмонија тој бил ставен на вештачка вентилација.

Потешка форма на пневмонија има и една жена родена 1954 година, која исто така е ставена на вештачка вентилација. Жената боледувала од хронична срцева слабост.

На Клиниката за инфективни болести и фебрилни состојби во изминатите 24 часа се хоспитализирани 9 пациенти, а вкупно се хоспитализирани 28 пациенти.

Бројот на заразени од свински грип во Македонија се искачи на 334 лица, од кои половината се веќе излекувани.


Во текот на изминатата ноќ регистрирани се шест нови заразени, информираа во понеделник надлежните лица кои, меѓу другото, појаснија дека сè уште не е познато кога ќе пристигне првата доза на вакцините, но извесно е дека тоа нема да се случи неделава.

Поради фактот што бројот на заразени надмина 300 лица, од понеделник повеќе нема да се бројат новозаразените, а сите нови случаи со симптоми на грип ќе бидат третирани како да се заразени од свинскиот грип.

Согласно новите мерки од Институтот за јавно здравје, кои стартуваат од денеска, анализи за потврда дека се работи за новиот грип ќе се вршат само кај пациентите со потешка клиничка слика и оние од ризичните групи, во кои спаѓаат бремените жени, хронично болните и децата до 36 месеци.

Матичните лекари, според новите мерки, треба да бидат достапни за пациентите 24 часа секој ден во неделата.

Тие имаат препорака полесните случаи да ги упатат на домашно лекување, а оние со потешка клиничка слика на Инфективното одделение во своето подрачје.

Пациентите кои ќе бидат упатени на домашно лекување, се препорачува да лежат дома седум дена и да примаат терапија препорачана од доктор.

Надлежните информираа и за симптомите за грипот. Лесна клиничка слика се смета дека имаат пациентите со покачена телесна температура, која организмот може да ја толерира, кашлање, затнат нос, гребење на грло и послабо изразено чувство на малаксаност.

Тешка клиничка слика имаат пациентите со висока температура која трае барем три дена, брзо влошување на здравствената состојба, што настанува во период од неколку часа, вознемиреност, поспаност, гушење при дишење, краток здив и болки во градите.

Во моментов на Клиниката за инфективни болести се хоспитализирани 32 пациенти, при што најмладите се едногодишно бебе и три годишно дете, кои не посетувале градинка и се во подобра здравствена состојба.

Најстариот пациент, пак, е роден 1924 година.

Надлежните информираа дека здравствените домови се добро снабдени со лекот Тамифлу, а резерви од овој лек има во доволни количини и на клиниката.

Лекови ќе бидат дополнително набавувани и во текот на наредниот период, кога кон крајот на декември или почетокот на јануари, се очекува грипот да земе најголем замав.

Извор: Макфакс