Најмалку седум луѓе загинаа во серија бомбашки напади во Ирак

Багдад, 25 јуни (МИА) - Најмалку седум лица меѓу кои пет полицајци и двајца цивили загинаа во денешните бомбашки напади во Ирак, еден ден откако 72 лица настрадаа во експлозија на бомба на пазарот во шиитскиот кварт Садр Сити, во североисточниот дел на Багдад, соопшти полицијата.

Ирачкиот потпретседател Тарек ал Хашим ги обвини бунтовниците дека со овие напади „сакаат да го одложат или да го спречат планираното повлекување на американските сили од ирачките урбани центри“.

Полицијата соопшти дека пет полицајци загинаа во Фалуџа, град западно од Ирак, кога возило во кое се наоѓале налетало на експлозивна направа.

Неколку часови подоцна, две лица загинале, а 30 се ранети во експлозија на бомба оставена на автобуска станица во јужниот дел на Багдад.

Истовремено, Армијата на САД соопшти дека во источниот дел на Багдад, девет американски војници се повредени во експлозија на две бомби.

Најнови бомбашки напади се случиле само неколку дена пред планираното повлекување на американски борбени сили од ирачките градови, врз основа на безбедносниот договор кој Багдат и Вашингтон потпишале минатата година.

Насилството во Ирак бележи пад во изминатата година, но екстремистите и понатаму организираат напади чија мета се американските сили, ирачката полиција и цивилите со цел  ги обноват верските судири и да го поткопаат авторитетот на Владата на премиерот Нуриј ал-Малики.

Аналитичарите оценуваат дека нападите ќе ги зголемат пред парламентарните избори, што треба да се одржат во јануари 2010 година.

Американската војска од Ирак би требало во целост да се повлече до 2012 година, во согласност со безбедносниот договор со ирачките власти.