Металург останува на исто растојание од лидерот Шкендија

 

Победи остварија водеќките четири клуба во петте натпревари кои попладнево се одиграа од 27 коло од Првата фудбалска лига на Македонија. Нема промени на врвот на табелата, Шкендија ја задржа бодовната предност од пет бода пред второпласираниот Металург.

Најубедливата победа ја оствари токму Металург на стадинот во Автокоманда во Скопје против последнопласираниот Пелистер со 5:0. Работнички на стадионот во Чаир беше подобар од Хоризонт Турново со 3:1, а во Тетово Ренова славеше триумф против Напредок со 4:1.

Единствената гостинска победа во ова коло ја постигна Силекс во Тетово против Тетекс со 2:0. Без победник заврши натпреварот во Штип меѓу Брегалница и Скопје. Во вчерашниот натпревар лидерот Шкендија го совлада Вардар со 2:0.

Табела: Шкендија 58 бодови, Металург 53, Ренова 50, Работнички 47, Силекс 37, Хоризонт Турново 37, Напредок 36, Тетекс 34, Брегалница 33, Скопје 29, Вардар 21, Пелистер 15

Отпишаниот Пелистер изненади во Скопје

 

Победата на Пелистер од 2-1 на гостувањето кај Работнички е најголемото изненадување во 25. коло, но и во досегашниот дел од фудбалската сезона во Првата лига. Битолчани немаа освоено ниту бод на гостувањата во првенството. По победата во градското дерби против Вардар минатото коло, се чинеше дека Работнички конечно се најде на посакуваниот колосек, но така не мислеше убедливо последнопласираниот противник, кој пред овој дуел имаше четири порази во низа и само три победи во целата сезона. На Работнички не им помогна ниту брзото водство со голот на најдобриот стрелец во лигата, Борче Маневски, во 9 минута. Бујчевски во 23 минута погоди за 1-1, а пресвртот го приреди Симоновски во 80. минута.

- Противникот беше потценет, но и нам не ни досудија пенал за 2-0 што може добро да се види и на видеото што кружи на интернет. При 1-1 игравме со четири напаѓачи, но ни се случи една контра од страна на противникот, а потоа беше тешко да се израмни - вели стрелецот Маневски.

Раководството на поразената екипа за денеска најави состанок на кој ќе се расправа за евентуалните казни, но и за други одлуки во врска со последниот резултат на трикратниот првак.

Ова му е втор пораз условно како домаќин на тимот од Дебар маало оваа сезона, покрај оној првиот од Тетекс во август на почетокот од 2010/2011.

Металург брзо го заборави минатонеделниот пораз од Силекс и со 2-1 беше поуспешен од Скопје во дербито на двата тима од Автокоманда. Миле Крстев во свој стил во 2 минута погоди од слободен удар за водство на Металург, додека Скопје, кој грчевито се бори за опстанок, возврати преку својот најдобар стрелец Христијан Кировски во 35. минута. Музафер Ејупи му ја донесе победата на второпласираната екипа со вистински еврогол, откако неговиот силен удар се одби од пречката и заврши во мрежата во 69. минута.

Како мало изненадување може да се смета победата на Брегалница од 2-0 кај Тетекс, кој досега на домашен терен обезбеди седум победи и имаше само еден пораз. Илиев и Мандак беа творци на победата со прецизните удари во 6 и 62 минута.

Мрежите мируваа на мечот Хоризонт Турново - Напредок. Вчера се играше мечот Шкендија - Силекс, а за денеска е закажана средбата Ренова - Вардар.

Костов го напушти кормилото на Работнички

По серијата слаби резултати и неполни четири месеци на функцијата, Влатко Костов повеќе не е шеф на стручниот штаб на Работнички. Тој поднесе оставка по нерешениот резултат со екипата на Скопје.
- По најновиот неуспех и нерешениот резултат со Скопје, ја понудив својата одговорност пред управата на клубот, со цел да покажам, пред се, на играчите дека никој не е незаменлив. Овој клуб заслужува многу повеќе од тоа четврто место на табелата - изјави Влатко Костов.
Довчерашниот прв помошник на Костов, Горан Петревски, е именуван за нов тренер на Работнички и своето деби ќе го има на денешното дерби со Вардар

Ловат „местенки“ во Македонија!?

"Секое коло има по 2 сомнителни средби во вашата земја. Имаме многу информации...", вели наш избор од Германија


Македонското првенство го има во обложувалниците. Го има во земјава, но и во обложувалниците надвор од нашите граници. Тоа е причина за добра заработувачка за одредени лица кои се во "бизнисот" со "местење" на натпревар. Но каде има "валкани" пари таму има и полиција, тајни служби...

Деновиве сме сведоци како за две средби во Италија се зборува дека има голема уплата на пари. За некој да не сфати погрешно ние како редакција "Македонски спорт" го делиме мислењето на многумина дека "местенки" има во сите земји а не само во Македонија.

"Македонија е земја во која според нашите информации постојат групи кои работат за поголеми структури. Клубовите најчесто не знаат дека некој има замешано прсти во нивната екипа", се дел од зборовите на функционер од Германија кој ги следи пријавите од обложувалниците за обрт на пари на одредени натпревари.

"Во вашиот фудбал нема големи уплати. Истите средби не можат да се играат на големи пари. Најчесто средбите во Македонија се комбинираат со натпревари од две-три други земји. Секое коло има барем по 2 средби од вашата земја за кои добиваме сигнали. Неколкупати досега имаме пратено свои луѓе да снимаат и да ловат 'местенки' и во Македонија", вели нашиот извор кој е свесен дека УЕФА и ФИФА заедно со полициксите служби во сите земји мора да тргнат во голема офанзива против фудбалската мафија за да се спаси овој спорт.

Од истиот извор дознавме дека е утврдено како некои од фудбалерите во земјава сами се обложуваат на натпреварите кои тие ги играат. Дека во овој црн бизнис се вмешани не само фудбалери туку и судии, но и влијателни личности од средината од која доаѓаат одредени клубови. И покрај ваквите најави проценката е дека секое коло таквите групи од "местенките" во Македонија не заработуваат повеќе од 50.000 евра. Тоа е поради очајните финансии кои ги има во мак-фудбалот и лесниот начин да се стигне до посакуваниот резултат.

За жал, нашава земја е на црната листа во Европа и единствена земја од која беше фатен клуб кој мести меч на меѓународна сцена. Странците скенираат и бараат докази. Дали ќе ги најдат, останува да се види, а клубовите играчите треба да знаат дека некој е тука за да ги снима. Не е скриена камера... внимавајте што правите досега 6 средби и околу 20 личности се веќе на тапет!

Вардар подобар од Работнички

 

Во македонскиот фудбалски шампионат одиграни се натпреварите од 22-то коло. Во градското дерби Вардар го совлада Работнички со 1:0, а стрелец на победничкиот гол за домаќинот беше Иван Настевски во 84-тата минута. Во останатите натпревари постигнати се следниве резултати:
Скопје - Брегалница 0:3
Напредок - Тетекс 1:0
Пелистер - Шкендија 0:1
Ренова - Силекс 3:1
и со истиот резултат Металург како гостин го совлада Турново.
На табелата Шкендија ја задржа водечката позиција со 45 бода, четири повеќе од Металург, а на третото место изби Ренова со 38 бода.

Прва пролетна радост за Романтичарите

Фудбалерите на Работнички направија сефте пролетва. Новиот тренер Влатко Костов и неговите избраници, кои беа супериорни во зимските подготовки, дури во третиот обид забележаа победа, совладувајќи го на свој терен Хоризонт (2:1) во вонредното 21. коло. Со овие три бода "романтичарите" избија на третото место.

Во дербито на колото, во Железарница, Металург извојува сигурна победа против бранителот на титулата Ренова (2:0). "Зелено-црните" сега се втори на табелата и заостануваат само еден бод зад лидерот Шкендија, која денеска пред своите навивачи го пречекува Напредок во последниот натпревар од ова коло.

Со идентични победи од 2:1 завршија натпреварите во Кратово и Тетово. На стадионот под Шара фудбалерите на Скопје први го открија резултатот, меѓутоа домаќините се погрижија да нема изненадување.

И Силекс мораше да вложи големи напори за да ги освои трите бода против "фенерџијата" Пелистер. Победата на кратовци беше обезбедена дури во самиот финиш на натпреварот и тоа од пенал, што го реализира Темелков.

Единствен натпревар на кој беа поделени бодови и без голови беше пресметката во Штип. Ремито е резултат, што не им одговара многу ниту на Брегалница, ниту на Вардар, кој се уште е во зоната за испаѓање и заостанува шест бодови зад Скопје кое е над нив.

ПРВА ЛИГА
Резултати од 21. коло: Металург - Ренова 2:0 (Крстев 86', Начевски 90' 90'), Тетекс - Скопје 2:1 (Силјановски 53', Клечкароски 90' - Јовановски 38'), Работнички - Хоризонт 2:1 (Ќумбев 11', Андонов 59' - Лазаревски 90'), Силекс - Пелистер 2:1 (Нацев 42', Темелков 89' пе. - 58', Брегалница - Вардар 0:0. Денеска: Шкендија - Напредок.

ТАБЕЛА

1. Шкендија	20	11	6	3	37:14	39
2. Металург	21	11	5	5	26:14	38
3. Работнички	21	10	7	4	27:17	37
4. Ренова	21	10	5	6	27:19	35
5. Хоризонт	21	10	2	9	22:19	32
6. Тетекс	21	8	6	7	20:17	30
7. Силекс	21	7	7	7	22:24	28
8. Напредок	20	8	4	8	21:23	28
9. Брегалница	21	8	2	11	21:29	26
10. Скопје	21	6	5	10	20:24	23
11. Вардар (-3)	21	6	2	13	17:32	17
12. Пелистер	21	3	3	15	16:44	12

ИДНО КОЛО (19.03.): Пелистер- Шкендија, Напредок - Тетекс, Скопје - Брегалница, Вардар - Работнички, Хоризонт - Металург, Ренова - Силекс.

Заврши есенската сезона на домашното фудбалско првенство