Пробајте: Супер брзи чоколадни мафини

Рецепт за сите љубители на мафини и лава колаче кое никако не можат да го погодат дома.

Овие брзи мафини имаат мека средина, па голема е веројатноста дека ќе ве освојат на првото залче.

За нивна подготовка потребно ви е:

• 250g темно чоколадо
• 250g путер
• 300g шеќер
• 130g брашно
• 6 јајца
• 1 ванилин шеќер

1. Путерот оставете го да омекне на собна температура, а потоа изматете го со шеќерот.

2. Јајцата додавајте ги едно по едно, а потоа измешајте го и брашното.

3. Чоколадото стопете го на пареа и додадете го во смесата.

4. Ставете ја густата смеса во калапи за мафини и печете 10 минути на 200 степени.

Лесни чоколадни мафини без брашно

Незаборавно уживање кое се подготвува лесно, брзо и едноставно, а го обожаваат сите - од најстари до најмали.

Идеални за со кафе, чај или како десерт по ручекот, рецептот за овие лесни мафини ќе ви се најде во секој дел од денот.

Состојки:

• 150g чоколадо за готвење
• 125g путер и уште неколку лажички за премачкување доколку не користите хартиени корпи
• 3 јајца
• 90g шеќер + 2 лажици за шлагот
• 100g бадемово брашно

Подготовка:

1. Рерната загрејте ја на 170 степени. Калапите намачкајте ги со путер или обложете ги со хартиени корпи.

2. На пареа растопете го путерот и чоколадото. Додајте ги жолчките, шеќерот и бадемовото брашно. Добро промешајте.

3. Изматете цврст снег од белки и додадете ги двете лажици шеќер. Постепено додавајте го шлагот во смесата со чоколадо и внимателно мешајте.

4. Печете ги мафините околу 30-35 минути.

Чоколадно задоволство: Мафини полнети со Нутела

Потребен ви е само половина час за да можете да уживате во вашиот омилен чоколаден вкус.

Нутелата е најобожаваниот крем, а посебно ако го искомбинирате со чоколадни, сочни колачиња? Со денови ќе уживате во мирисот и вкусот на овој десерт.

Состојки:

• 220g брашно
• 1 прашок за печиво
• 200ml млеко
• 80g какао прав
• 100g шеќер
• 2 јајца
• 2 лажици ванилин шеќер
• 90g растопен путер
• Рум
• Нутела

Подготовка:

Во голема чинија помешајте го брашното, прашокот за печиво, ванилин шеќер, обичниот шеќер и какаото.

Во друг сад измешајте ги јајцата, растопениот путер и млекото. Исто така, ако сакате уникатна арома, додадете рум.

Промешајте ги смесите од двете чинии и подгответе ги калапите во кои ќе ги печете мафините. Постапката е многу едноставна.

Прво наполнете го калапот до половина, а потоа ставете лажица Нутела. Внимавајте калапите да не ги наполните повеќе од 2/3, доколку сакате да го избегнете преливањето.

Колачите печете ги 20 минути на 180 степени. Кога ќе се оладат може да ги послужите со брашно од кокос или шеќер во прав.