Вегетаријанска храна

Дефинитивно, ова е омиленото овошје на многумина. Црвено, зелено, кисело, благо, Златен делишес или Granny Smith… Освен што е ИСКЛУЧИТЕЛНО здраво овошје, јаболкото е „најдобар пријател“ со циметот, медот, целерот и морковот. Бенефитите од конзумирањето ја јаболкото се чувствуваат низ целото тело.

Јаболкото ја навестува есента која полека но сигурно доаѓа. Па затоа, подолу Ви претставувам еден многу лесен, брз и одличен десерт кој можете да го подготвите за Вашите најблиски и за Вашите пријатели.

Потребно:

• 2 јајца, добро изматени
• 1/2 шоља млеко или јогурт
• 2 шољи сенаменско брашно
• 1 лажиче пециво
• 1/2 лажиче сол
• 1/4 шоља шеќер
• 3 јаболка со средна големина, излупени и изрендани на подебелата страна од рендето
• цимет, по желба
• масло за пржење
• шеќер во прав

Подготовка: Во длабок сад измешајте ги млекото и јајцата. Во помал сад, измешајте ги брашното, пецивото, солта и шеќерот. Измешајте ги течната и сувата смеса заедно. Ставете ги ренданите јаболка. Зачинете со цимет, по желба. Во тавче за пржење ставете  масло да се загрее. Со лажица земете од смесата и обликувајте мали палачинки. Пуштете ги во тавчето и оставете да се пржат две до три минути на секоја страна, додека не бидат румени. Готовите палачинки од јаболка попрскајте ги со прав шеќер или загрејте на рингла неколку лажици џем по Ваш вкус и така растопен, полијте го низ палачинките. Служете ги топли.

Интересни информации за рецептот: Arancini или аранчини се пржени топчиња од ориз, извалкани во презла. Оригинално, потекнуваат од Италија уште во десеттиот век. Вообичаено, се сервираат со доматен сос или рагу сос. Првата порција аранчини е продадена во сицилија со рагу сос и топчиња од моцарела, месо, ориз и грашок. Многу ресторани, овој Италијански рецепт го прават со печурки, путер или со модар патлиџан. Овој рецепт го добил името аранчини по изггледот на топчињата, кои кога ќе се испржат личат на мали портокал, што на сицилијански  е … погодувате-arancini.

Супер се за забави, родендени, одлични се за пред тв … Овој рецепт ќе Ве воодушеви со неговата едноставност во подготвување и брзина на конзумирање. Еве една супер вегетаријанска варијанта на тема: аранчини.

Потребно за 4 лица:

• 1 јајце
• 1 шоља сварен ориз
• 1 главица кромид
• 1 чешне лук
• 200 грама моцарела, сецкана на коцки
• пола чаша бело, суво, вино
• презла
• 200 грама сварен грашок
• 200 грама рендан кашкавал
• маслиново масло
• сол, бибер

Подготовка: На маслиново масло пржете ги лукот и кромидот, претходно многу ситно исецкани. Кога ќе се испржат, ставете го сварениот ориз и додадете пола чаша бело, суво вино. Додадете го грашокот. Зачинете со бибер и сол, по вкус. На крај, додадете го кашкавалот.  Изматете го јајцето со вилушка. Додадете го јајцето во изладеното рижото. Измешајте ја смесата. Со мала лажичка, земете две лажички од смесата и ставете ја на рака. Во средина, ставете една коцка моцарела и формирајте топче. Извалкајте го во презла и пржете во врело масло. Така испржени, ставете ги на кујнска хартија да го впијат остатокот од маслото.

сос: 1/2 кг. домати излупете ги и исечете ги на мали коцки. На маслиново масло, пржете ги доматите додека не го пуштат целиот сок. Додајте малку вода и една лажица брашно за да се згусне сосот.

Да нурнеме во морскиот свет со овој медитерански рецепт кој ќе го засакате “од прва„. Ако се прашувате како да ја изненадите саканата личност, вашите блиски, па и да си дозволите Вие малку одмор и уживање, нема да погрешите ако го изберете овој рецепт.

Потребно за 4 лица:

• 1кг. исчистени, свежи лигњи (совет: прво, побарајте во рибаница, па ако немаат таму свежи купете од маркет)
• 100 гр. моцарела
• 2-3 млади лукчиња
• 3 лажици лебни трошки
• 3 лажици рендан кашкавал, по желба
• магдонос
• една чаша бело, суво вино
• масло за јадење
• маслиново масло
• сол, бибер

За сос:

• една конзерва пелати
• 5-6 млади кромидчиња
• босилек
• една мала лажичка кафеав шеќер
• пола чаша бело, суво вино

Подготовка:

Лигњите исчистете ги. Краците, завршните делови од лигљите ставете ги длабок сад и во садот ставете ги лебните трошки, маслиновото масло, виното, ситно сецканиот магдонос, сецканата моцарела на коцки и ситно исецканиот млад лук. Зачинете со сол и бибер, по вкус. Лигњите претходно бланширајте ги во врела вода за да не бидат тврди и тешки за џвакање. Бланшираните лигњи полнете ги со претходната смеса и затворет ги со поголеми чепкалки за дане излезе смесата при пржење. Така приготвените лигњи пржете ги на врело масло. Во тава, на оган, ставете малку маслиново масло и на него пржете го младиот кромид. Додадете ги пелатите. Зачинете со сол и повеќе бибер. Ставете ги пржените лигњи во сосот, додадете го виното и оставете да испари. Сосема на крајот, додадете ситно сецкан босилек.

Ем брзо, ем вкусно, ем здраво. Додајте мексикански шмек во Вашата кујна.

Потребно за 4 лица:

• едно пакетче вафли (пакување со вафли има во Кам-маркет)
• 3 зрели домати
• 2 зелени пиперки
• еден кромид
• два млади моркови
• црвен пипер, бибер, сол
• магдонос
• масло за јадење

Подготовка: Во загреана тава, на масло пржете го ситно исецканиот кромид додека да омекне. Потоа додадете ги исецканите морков, домат и пиперка на поситни парчиња. Додадете една лажица брашно колку да ја спои целата смеса. Зачинете со сол и бибер, по вкус. Додајте црвен пипер. На крај, додајте го ситно исецканиот магдонос. Смесата истурете ја врз вафлите кои сте ги стоплиле во рерна или на тава.

Младите моркови сосем се разликуваат од т.н „стари моркови“ што ги јадеме во супа, како прилог и слично. Тие имаат сладок, мек вкус кој во комбинација со супер сос имаат прекрасен освежувачки вкус. Дефинитивно овој рецепт ќе ги скрши сите лоши јазици за морковот како зеленчук. Со големо задоволство Ви го претставувам овој рецепт. Лесен, здрав  и неверојатно вкусен.

Потребно:

• неколку млади моркови, со листови
• 250 гр. павлака со 20% масленост
• копар
• 50 гр. рендани ореви
• сол, бибер
• масло

Подготовка: Младите моркови намачкајте ги со масло. Ставете ги на скара или на грил тава да се запечат. Попрскајте ги со морска сол и бибер од горе. Во павлаката ставете една мала лажичка копар, ренданите ореви и зачинете со сол и бел бибер, по вкус.

Ете, толку лесно

Полна со железо и белковини, леќата е мешунка со која може многу да се експериментира во кујната. Ја има таа способност да прима разни зачини, а сепак да го задржи својот вкус кој ќе доминира. Инспирирана од нејзините бои во кои ја има, ќофтињата од леќа нека бидат дел од вашето денешно празнично мени, збогатено со ваши прилози од јадења.

Ќофтиња од леќа

Потребно за 4 лица:

• пола шоља леќа (црвена или кафена, по ваш избор)
• 2 главици кромид
• 2 чешниња лук
• 1 лажиче копар
• 1 големо јајце
• 2 полни лажички црвен пипер
• пола китка магдонос
• сол, бибер
• брашно и презла, по потреба

Подготовка: Леќата исчистете ја и варете ја додека не омекне. Кромидот и лукот, ситно исецкани, пропржете ги. Додајте црвен пипер. Така испржени, извадете ги од тавчето и одделете ги на старана во посебен длабок сад. Сварената леќа, измиксајте ја со рачен миксер или испасирајте ја. Смесата додајте ја во испржениот зеленчук и зачинете со копа, бибер и сол, по вкус. Додајте го јајцето. Додајте 5 големи лажици презла, за да се спои смесата. Додајте го магдоносот. Потоа, додајте 1-2 мали лажички брашно. Така измешаната смеса, ставете ја во фрижидер да отстои 30 минути. Потоа, формирајте ќофтиња. Извалкате ги ќофтињата во презла и пржете ги на врел зејтин додека не поруменат од двете страни. Послужете со свежа салата или до компир-салата.

Еве пет совети како да живеете подобро и да не го оптоварите домашниот буџет многу, а сепак да се храните здраво.

1. ОДГЛЕДУВАЈТЕ ГРАДИНА – Можеби звучи старомодно и кич, но одледувањето градина ќе ви заштеди многу пари. Органските производи не се евтини и лесно достапни во нашите супермаркети, но затоа се супер лесни  за одгледување. Ако не се подготвени за одгледување на цела градина, важно е да почнете од некаде. Па така, како за почеток, можете да засадите домати, пиперки, краставици, морков. Ако пак сакате да ја збогатите градината, засадете грав, грашок, боранија, марула и некои тревки.
2. КУПУВАЈТЕ ВО ПРОДАВНИЦИ ЗА ЗДРАВА ХРАНА – Во Македонија има неколку вакви продавници кои нудат изобилство од хранливи и здрави продукти. Такви се: Виталија , која има свои производи во големите супермаркети (Веро, Тинекс, Рамстор) и свои два дисконта во Скопје и Биона, која има две продавници во Скопје (ТЦ Беверли Хилс, приземје и бул.Кочо Рацин бр.14).
3. КУПУВАЈТЕ ВО ПОГОЛЕМИ КОЛИЧИНИ – Јасно е дека здравата а особено органската храна е недостапна да се купува во поголеми количини. Купувањето во поголеми количини се однесува на разни интегрални семиња, најразлични видови брашно, суплементи во исхраната, сушени овошја,  жита, природни засладувачи, флаширана вода и слично. Откако ќе обезбедите поголеми количини од овие производи, потоа вашето купување ќе се состои од набавка на свежи овошја и зеленчуци.
4. ЈАДЕТЕ ВО СЕНДВИЧАРИ И РЕСТОРАНИ СО ЗДРАВА ХРАНА - Тоа е вкусно и се повеќе достапно. Ресторанот Хармонија е единствениот во Скопје кој го негува здравјето на луѓето и нуди одлична храна за сите. Сендвичарата Нино, која се наоѓа во центарот на градот е позната по макробиотичките сендвичи, кои се исклучително вкусни, со достапни цени, здрави и лесно сварливи.
5. БИДЕТЕ РЕДОВНИ НА ПАЗАР – На сите скопски пазари, тие што се поредовни, знаат дека се издвојуваат оние тезги каде секогаш има свежа храна. Колку повеќе купувате кај нив, толку повеќе ќе ве запомнат и ќе ви ги даваат секогаш најсвежите продукти, по пониска цена од другите