Одбојка

МАКЕДОНИЈА СЛЕДНАТА НЕДЕЛА ЌЕ ОДГОВОРИ НА БАРАЊЕТО НА ЧЕШКАТА ФЕДЕРАЦИЈА ЗА ПРОМЕНА НА ТЕРМИНОТ

ОФМ во потрага по компромис

Одбојкарската федерација на Македонија во текот на следната недела официјално ќе одговори на барањето на Чешката федерација, дали првиот бараж натпревар за ЕП 2009 кој двете машки репрезентации треба да го одиграат во Чешка викендот 5-6 септември ќе биде одигран три дена подоцна на 9 септември. Чесите барањето за промена на терминот го поставија поради поклопување со завршницата на Европското младинско првенство, каде Чешка се јавува како организатор, како и со немањето можност за ТВ пренос на бараж дуелот. Промената за Македонија е прифатлива само доколку домаќинот на првиот меч се согласи да не прими еден ден повеќе или, пак, натпреварот да се одигра на 10 септември. Поради лошата комуникација со чешките официјални лица, како и одбивањето на рецепроцитет со екстра денот, ОФМ ќе се потруди да донесе најдобро решение и по пат на компромис да го реши настанатиот проблем. Во спротивно ќе се придржуваме кон датумите пропишани од ЦЕВ и ќе бараме баражот да се одигра во дадениот термин.

"Промена на терминот е возможна, но зависи од соработката со Чешката федерација. Поради лошата авионска конекција, побаравме ден повеќе да бидеме гости на Чесите, а потоа и во реваншот тие да престојуваат екстра ден во Македонија, но таквиот предлог за реципроцитет не беше прифатен. На Конгресот во Дубаи и покрај настојувањето на нашиот претседател Јованов да се воспостави комуникација и договор, наидовме на ладен однос од страна на потпретседателот на Чешката федерација. Разгледувајќи ги можностите ни одговара мечот да се одигра на 10 септември, но тоа повторно зависи и од домаќинот. Доколку не успееме да дојдеме до компромис, реално е да бараме да се задржи првичниот термин поставен од ЦЕВ, бидејќи ние немаме никаков проблем со тоа, туку Чешка", н$ информираше селекторот на машката репрезентација, Александар Тасевски.

Канцеларијата на ОФМ во моментов ги разгледува сите опции и се надева дека во текот на деновиве ќе биде донесено најдоброто решение, со кое ќе одговорат на барањето на Чешка.

"Ќе направиме неколку работни состаноци на кои покрај мене ќе учествуваат и генералниот секретар, спортскиот директор и селекторот и во заедничка консултација ќе донесеме решение кое ќе сметаме дека е најдобро за нашата репрезентација, по што ќе одговориме и на барањето на Чесите", вели претседателот на Федерацијата, Марјан Јованов.

Бараж натпреварите според ЦЕВ треба да се одиграат првите два викенда од септември, но доколку дојде до промена на терминот дуелите меѓу Македонија и Чешка ќе се одиграат со разлика од само пет дена.



Тасевски ја подготвува програмата

Селекторот Тасевски во полна пареа работи на програмата за подготвителниот период и бараж фазата од квалификациите за ЕП.

"Работам на програмата за бараж фазата од квалификациите. Треба да се консултирам дали да се соберат репрезентативците порано или да се остане на првичниот датум, 5 август. Би сакал првата фаза и дел од втората да одработиме надвор од Скопје, за потоа во нашата "база" да преминеме на техничко- тактички план. Во зависност од можностите на ОФМ да ни обезбеди спаринг- противник добро би било да одиграме неколку контролни натпревари пред баражот", изјави Тасевски.

Словенија прв спаринг- партнер

Федерацијата уште од сега активно работи на обезбедување противници со кои сениорите ќе одиграат пријателски средби пред баражот со Чешка. Прв конк*рент е Словенија, која би сакала со нас да одигра контроли кои би биле од заемна корист и за двете селекции. Федерациите начелно ја договорија соработката, но останува истата да се потврди и реализира во текот на подготвителниот период.

ШАМПИОНОТ ЈА ПРОДОЛЖУВА СОРАБОТКАТА СО ДВАЈЦА СТАНДАРДНИ ПРВОТИМЦИ

Модев и Трајчевски остануваат во Работнички Фершпед

Интернационалецот Христо Модев и Влатко Трајчевски се двајцата одбојкари кои најверојатно и следната сезона ќе ја продолжат соработката со досегашниот клуб Работнички Фершпед. Двајцата стандардни првотимци на "шпедитерите" веќе преговараа со раководството на клубот и според информациите и од двете страни останува само договореното да биде пренесено на хартија.

"Имав состанок со раководството на Работнички Ф. и преговаравме за условите и за продолжување на договорот за уште една година. Сакам да останам во клубот уште една сезона, но засега постигнат е само устен договор, а за да се официјализира работата, мора се да се стави на хартија", изјави еден од носителите на играта на шампионот минатата сезона, Влатко Трајчевски.

Христо Модев веќе неколку сезони наназад настапува за Работнички Фершпед, а соработката ќе ја продолжи и оваа година.

"Доколку останат условите за кои преговарав со управата во изминативе денови, тогаш нема двоумење, останувам во Работнички Ф. и следната сезона. Единствено што преостанува е и официјално да се потпише договорот", вели интернационалецот Христо Модев.

Покрај разговорите со овие двајца играчи, раководството на Работнички Фершпед преговара и со другите одбојкари кои беа дел од минатогодишниот состав бидејќи тоа е приоритет за "шпедитерите", да се задржи костурот на ланскиот тим.

"Приоритетно за клубот е да се задржи основата на тимот од минатата година, па затоа во моментов се почнати преговорите со одбојкарите. Имавме конструктивни разговори со Модев и Трајчевски и с$ води кон тоа дека ќе останат во екипата, додека со другите с$ уште се разговара. Со едно до две квалитетни засилувања, а и во зависност од ждрепката во ЦЕВ купот, мора посериозно да се размислува за евро- амбициите на екипата догодина", н$ информираше поранешниот тренер на Работнички Ф., Јошко Миленковски.

Одбојкарите на Работнички Ф. до крајот на месецот ќе тренираат по што следува пауза од еден месец, за на 4 август да ги стартуваат подготовките за новата сезона.

НАЈТРОФЕЈНИОТ МАКЕДОНСКИ СТРАТЕГ ЈА ПРЕКИНА СОРАБОТКАТА СО ЦРНОГОРСКИОТ ПРВОЛИГАШ

Миленковски ја напушти Будванска Ривиера

* "Поради "замрзнувањето" на функцијата на досегашниот спортски директор на клубот, Раденко Маровиќ, со кого и ја почнав мојата соработка, сметав дека најкоректно е со меѓусебен раскин на договорот да се повлечам од позицијата тренер на Будванска Ривиера", вели Миленковски.

Нашиот најтрофеен тренер и поранешен селектор на машката репрезентација, Јошко Миленковски ја прекина соработката со црногорскиот прволигаш Будванска Ривиера со кој минатата сезона се најде на третото место во европскиот ЦЕВ куп. Причини за напуштањето на Миленковски на оваа позиција има повеќе, но приоритетна е "замрзнувањето" на функцијата на досегашниот спортски директор на Будвани, Раденко Маровиќ со кого нашиот стратег и ја почна соработката во црногорскиот клуб. Разделбата е направена во меѓусебен пријателски договор, со можности во иднина квалитетната соработка да биде обновена.

"Поради 'замрзнувањето' на функцијата на досегашниот спортски директор на клубот, Раденко Маровиќ, со кого и ја почнав мојата соработка во клубот, сметав дека најкоректно е со меѓусебен раскин на договорот да се повлечам од позицијата тренер на Будванска Ривиера. Маровиќ комплетно ја поддржуваше мојата работа изминатава сезона, па оваа постапка може да се каже дека е од лојалност кон него и од големото заемно почитување. Секако оставен е простор во иднина да ја обновиме соработката. Пресудно беше и тоа што морам да се вратам на обврските кои ги имам како професор на Факултетот за физичка култура, како и кон екипата Работнички Фершпед", изјави Јошко Миленковски.

Нашиот најдобар стратег во моментов на прво место ги става работните обврски кои ги има кон факултетот, но воедно посветува големо внимание и на клубот Работнички Фершпед. Миленковски со успехот кој го постигна изминатава година го привлече вниманието на реномирани европски клубови, но засега тој само ги разгледува понудите.

"Во моментов сум посветен на обврски кон факултетот, а работам и во конструирањето на екипата на Работнички Фершпед за следната сезона. Градењето на кариерата како одбојкарски тренер во иднина многу зависи од договорот со ФФК. Имам неколку конкретни понуди од екипи кои настапуваат во Лигата на шампионите, што за мене претставува голем предизвик, но засега само ги разгледувам понудите. Доколку не успеам да се договорам со нив, како опција секогаш останува Работнички Фершпед, што воедно одлично се усогласува и со моите работни обврски како професор", додава Миленковски.

Јошко Миленковски во последните две сезони, прво како тренер на Работнички Фершпед стигна во фајнал-форот на Топ тимс купот, а лани како предводник на Будванска Ривиера го постигна најголемиот успех во историјата на црногорската одбојка, освојувајќи го третото место на завршницата во ЦЕВ купот.

В. Зарева

Вуковиќ на тренерското место

Селекторот на машката репрезентација на Црна Гора, Веселин Вуковиќ, ќе биде новиот тренер на Будванска Ривиера. Новото раководство на клубот има долгорочни цели и планови, меѓу кои будванската екипа догодина да биде составена само од црногорски одбојкари и да претставува расадник на сениорски репрезентативци.

Маровиќ: "Задоволство ми беше да работам со Јошко"

Досегашниот спортски директор на Будванска Ривиера, Раденко Маровиќ потврди дека станува збор за пријателска разделба, која се надева дека во иднина ќе има можност да се обнови.

"Заминувањето на Миленковски е поврзано со моето 'замрзнување' на функцијата спортски директор на клубот поради здравствени причини. Бидејќи Јошко и јас бевме еден тим кој квалитетно функционираше, тој реши да се повлече заедно со мене, што го ценам како особено пријателски гест, па токму поради тоа и нашата разделба беше таква, пријателска. Морам да напоменам дека Миленковски одлично ја одработи својата задача, му донесе на клубот еден голем, историски успех и ми беше задоволство да работам со еден таков човек и стратег како него", ни рече во телефонскиот разговор спортскиот директор на Будванска Ривиера, Раденко Маровиќ.

Максимално посветен на Работнички Ф.

Миленковски овој период максимално е посветен на формирањето на екипата на Работнички Фершпед и играчите со кои ќе настапува тимот следната сезона. Нашиот стратег се надева дека ќе успее да се зачува костурот на екипата од минатата година бидејќи тоа ќе биде добро не само за клубот туку и за машката репрезентација во која настапуваат поголем дел од одбојкарите на шампионот. Миленковски смета дека треба да се заборават личните несогласувања и да се работи за едно општо добро на одбојката, со што и најдобро ќе се искористи шансата до која се изборија репрезентативците, бараж натпреварот кој води на ЕП.

ИНТЕРНАЦИОНАЛЕЦОТ ЈОВИЦА СИМОВСКИ НАЈВЕРОЈАТНО И СЛЕДНАТА СЕЗОНА ЌЕ НАСТАПУВА ВО БЕЛГИСКАТА ЛИГА

"Засега останувам во Авербоде"

Нашиот интернационалец и еден од предводниците на репрезентацијата, Јовица Симовски, најверојатно и следната сезона ќе остане во својот досегашен клуб, белгискиот Авербоде. Симовски иако изминатава недела имаше понуда и сериозни преговори со третопласириот тим во белгискиот шампионат, Асе- Леник, не успеа да го оствари трансферот бидејќи сегашниот клуб за раскинување на договорот бараше висока отштета.

"Имав интересна понуда од третопласираната екипа во Белгија, Леник, да преминам во нивниот тим, а во текот на преговорите во целост беа прифатени моите барања. Но, Авербоде не сака да ме пушти да заминам од клубот и за раскинување на договорот бараат висока отштета. Во договорот кој го имам со нив стои дека доколу имам понуда од некоја екипа која настапува во Лигата на шампионите, нема да ми прават никакви проблеми и ќе ме пуштат да заминам, но бидејќи тоа не е случај со Леник, управата на Авербоде се труди да ме задржи. Засега останувам во клубот, но доколку во текот на летниот период се појават и други интересни понуди, тогаш можно е да ја сменам и средината", вели Јовица Симовски.

Популарниот "Гума" изминатава сезона беше најдобар поентер во белгиската лига и е еден од клучните играчи на Авербоде, па оттука сфатлива е и реакцијата на клубот кој се труди да го задржи својот најдобар играч. Симовски на 1 август почнува со подготовките со екипата, а во истиот период треба да стартува и подготвителниот циклус на машката репрезентација за баражот за ЕП. Интерналецот уште од сега најавува дека нема да може да биде дел од комплетните подготовки бидејќи Авербоде ќе му дозволи отсуство од само една недела.



Повредата санирана

Повредата на скочниот зглоб која Симовски ја доби во квалификациите за ЕП е санирана. Отокот е комплетно повлечен, а Јовица се надева дека нема да има никакви проблеми до стартот на новата сезона и бараж натпреварот кој ја очекува репрезентацијата.