За бојкот на наставата денеска се решија илјадници средношколци од Скопје, Тетово, Куманово, Велес, a во Охрид обединетите ученици излегоа и на протести. Беа единствени во барањата и извикуваа „Стоп за лошите реформи“.

Вчера „пленумците“ регистрираа бројка од 12.700, но, како што информираат, сега се близу 18.000 средношколците од Македонија што одржуваат вонучилишни, алтернативни активности. Дел се излезени во училишните дворови, а дел во холовите и ходниците. Насекаде се извадени клупите. Се дружат, организираат дебати, друштвени игри...

„Не отстапуваме од барањата. Одржуваме различни активности, но постојано професорите и управата не ‘потсетуваат’ дека губиме вредни часови, лекции, дека ни се ‘множат’ неоправданите изостаноци, дека образованието е веќе на високо ниво... Тоа се ситни, но постојани притисоци. Сепак, наидувавме и на закани од типот ‘ ќе добиете исписница’, а некаде бараат да потпишеме дека се согласуваме да полагаме математика. Е, тоа е навистина срамно!“, вели скопски гимназијалец.

Негов другар тврди дека притисоците не се ништо ново, ниту очекуваат да запрат. Но, истовремено, како што вели, расте мотивот за нивна борба и сплотеност против лошите и краткорочни мерки во средното образование.

„Што ќе направиме ако се откажеме сега? Нема да се замолчат. Дури и нашите родители ги принудуваат да присуствуваат на вонредни средби, да плаќаат казни за нашето отсуство, со цел да нè ‘убедат’ да прекинеме со бојкотот“, вели ученик од „Георги Димитров“.

Денеска редовна настава не се држеше ниту во струмичките училиште „Јане Сандански“ и „Никола Карев“. Битолскиот Средношколски пленум, пак, дискутираше дали да се приклучи на бојкотот со останатите разграноци на пленумите низ земјава.

Од вчера „пленумците“ објавија и мапа со точните локации каде се бојкотира.