Светот денес

Во Лондон денеска почнува нова, трета по ред, истрага за учеството на Велика Британија во ирачката војна.

Како што јави дописникот на МИА од Лондон, за разлика од претходните две, за оваа е најавено дека во најголемиот дел ќе биде јавна.

Истрагата ќе го опфати целиот период од 2001 година, по терористичките напади од 11 септември во САД, па се до 2009 година и повлекувањето на Британците од реонот на Басра во јужен Ирак.

На првиот ден од истрагата на сослушување се повикани поранешни високи државни функционери, како и еден од поранешните раководители на британското разузнавање, кои треба да зборуваат за британската политика кон Ирак во предвечерието на воената интервенција од март 2003 година.

Поранешниот британски премиер Тони Блер се очекува да се појави како сведок во оваа истрага на почетокот на следната година.

Раководител на истрагата е Џон Чилкот, поранешен функционер во владината администрација, кој сега е во пензија. Тој изјави дека според неговите планови, истрагата би требала да трае до крајот на 2010, а првите сознанија да бидат објавени во 2011 година.

Во изјава за Би-Би-Си Чилкот вели дека истрагата нема да се претвори во „миење на рацете“ или во забошотување на случувањата, но тој ги отфрла забелешките за тоа дека наместо „пензиониран чиновник“, истрагата да ја водат адвокати.

Ова не е судење, ниту правен процес и од него нема да има пресуди или осудени лица, одговара Чилкот на прашањето зошто не се определени адвокати како раководители на истрагата за ирачката војна.

Тој нагласи дека таа е насочена кон утврдување на опременоста на војската, нејзината соработка со политичарите, на односите меѓу политичарите и воените планери, како и на грижата кон ранетите и семејствата на загинатите војници.

Од истрагата не треба да се очекува да одговори на прашањата на политичките противници на војната за тоа дали Велика Британија требаше да им се приклучи на САД во нападот врз Ирак, како и за тоа дали интервенцијата е легална.

Повеќе би требало да се очекува одговор на тоа дали одлуката за одење во војна беше мудро решение и дали беше заснована врз темелни информации и анализи.

Претходните две истраги за Ирак беа на лорд Батлер, за работењето на британското разузнавање, и на лорд Хатон, за околностите под кои почина (се самоуби) владиниот советник за оружје за масовно уништување Дејвид Кели.

Турски патролни чамци вчера ги нарушија грчките територијални води меѓу островите Фармакониси и Агатониси во Егејско Море, пренесе грчката агенција АНА-МПА.

Истовремено и десетина турски воени авиони во низок лет минале кај островите Лезбос и Агатониси. Чамците следеле трговски брод, што пловел под руско знаме.

Се очекува грчкото Министерство за надворешни работи на турската страна да и врачи протестна нота за трите инциденти.

Турските нарушувачи на грчкиот воздушен простор биле пресретнати од грчки ловци.