Македонската репрезентација

   Рафал на Пандев и дружината

*Нашиот најдобар фудбалер даде два гола, а во листата на стрелци и имињата на Гроздановски и Наумоски.

ЛУКСЕМБУРГ - МАКЕДОНИЈА 1:4 (0:3)

Стадион: "Жози Бартел" во Луксембург. Гледачи: 2.000. Судија: Бругер (Австрија). Помошници: Едер и Хиршбергер (Австрија). Стрелци: Китенге 73' (ЛУК), Пандев 6', 44' Гроздановски 33', Наумоски 49' (МАК).

Играч на натпреварот: Горан Пандев

ЛУКСЕМБУРГ

Жуберт 1

Кинцингер 1.5

Грајсбуш 1

(/ Саграмола 89')

Хофман 1

Рајтер 1

Петерс 1

Страсер 1.5

(46' Паја 1)

Бетмер 1.5

(46' Китенге 2)

Левек 1.5

(72' Дамота /)

Јоаким 1.5

(46' Жерсон 1.5)

Муч 2

МАКЕДОНИЈА

2.5 Милошевски

( 2 Пачовски 46')

2.5 Новески

( 2 Вајс 64')

2.5 Митрески

2.5 Седлоски

2.5 Попов

( 2 Петров 46')

2 Лазаревски

(2 Положани 64')

2.5 Шумуликоски

2.5 Гроздановски

3 Пандев

2.5 Наумоски

2.5 Мазнов

( 2 Тасевски 46')

Победнички ритам за нашиот најдобар состав пред стартот на квалификациите за СП 2010. Македонија синоќа со убедливи 4:1 славеше над Луксембург како гостин на тест средбата во која бевме далеку подобар тим од слабите домаќини. Пандев и дружината имаа еден добар тренинг за давање голови, а застанаа на четири погодоци во мрежата на Луксембург. Победата ја осигуравме уште по првите 45 минути, кои ги завршивме со предност од 3:0. Само 6 минути домаќините ја имаа резултатската рамнотежа. Горан Пандев уште на самиот почеток од средбата казни една голема грешка на домашната одбрана кога со својата "левица" ја "спука" топката над главата на домашниот голман Жубер.

Тргнавме офанзивно со тројца напаѓачи (Пандев-Мазнов-Наумоски) и не му дозволивме на домаќинот да излезе од својата половина. Речиси сите шанси ги претворивме во гол. Во 33. минута Гроздановски од втор план по одличниот пас со Наумоски изби сам и ја пласираше топката меѓу нозете на домашниот голман, а Пандев во самиот финиш на првиот дел со удар од 18 метри и со помош на одбраната на Луксембург ја "торпедираше" мрежата на Жубер. Убедливи 4:0 имавме во 49. минута кога својата добра игра со гол ја круниса и Илчо Наумоски, кој од 5 метри со глава ја смести топката во мрежата. И тоа беше с$ од нашите голови. Тасевски го замени Мазнов и тоа беше причината поради која немавме играч повеќе во офанзивата, а со тоа изостанаа и шансите, но и можноста да се стигне до поубедлива победа. Следеше опуштање во нашата игра и штедење на силите, а таквата игра ја искористија фудбалерите на Луксембург, кои во 73. минута преку Китанге го ублажија поразот.

Овој триумф е добредојден за составот на Катанец. Треба да ја врати самодовербата и да создаде одлична атмосфера во тимот пред натпреварите кои се бројат. Дуелите со Шкотска и Холандија на почетокот на септември каде ќе се бркаат квалификациски бодови. За Македонија со Катанец останува серијата одлични резултати на пријателските средби. Победата од 4:1 над Луксембург за неколку дена ќе даде одговор на прашањето дали ние бевме многу силни или Луксембург беше многу слаб. Тоа што н$ радува е добрат форма на поедини играчи, а посебно на Пандев, кој вчера докажа дека игра во голем стил кога на моменти си поигруваше со противничките фудбалери како со мали деца.

Пандев сe поблиску до Христов

Со двата гола против Луксембург Горан Пандев стигна до бројката од 14 погодоци во дресот со државниот грб. Сега тој е многу блиску до оние рекордни 17 голови на Ѓорѓи Христов со што се очекува струмичанецот многу брзо да избие на чело на таа листа од наши најдобри стрелци на сите времиња. Пандев останува трет на листата затоа што Шаќири е втор со 15 голови.

Рекордна победа на гости

Овие 4:1 синоќа во Луксембург се рекордни за нашиот најдобар состав. Рекордна победа на пријателските средби кога сме во улогата на гости. Никогаш досега не сме славеле толку убедливо, а третпат даваме 4 голови по оние 4:4 со Б и Х пред 5 години во Сараево и победата од 4:2 над Естонија во Талин.

Македонија синоќа го одигра 64. пријателски меч по кој имаме нерешен скор од 23 победи, 18 дуели кои завршиле без победник и 23 порази.

Се повреди Илчо Наумоски

Последните 10 минути нашиот национален тим ги одигра со 10 фудбалери. Поради повреда натпреварот не можеше да го продолжи Илчо Наумоски, кој разаботи истегнување на мускулот од десната нога. Првичните најави се дека повредата не е сериозна и дека за неколку дена голгетерот пак ќе биде во игра.

Останавме со 10 фудбалери затоа што на клупата немавме резерви фудбалери. Ова сигурно треба да биде добра лекција за Катанец околу тоа колку играчи треба да повика па макар и на тест меч.

Внеси реплика	страница <1 31 323334 35 >
Tweet