Бетис успеа да ја зачува својата мрежа во првото полувреме но веќе на стартот на вториот дел Реал Мадрид дојде во водство.

Марсело упати длабочинска топка за Кристијано Роналдо кој несебично го проигра Игуиан а напаѓачот не можеше да погреши и само рутински ја смести топката во небранетата мрежа.

По еден час игра Реал веќе имаше предност од 2-0. Роналдо одново асистираше но овој пат сите заслуги одат на адреса на Кака кој прекрасно ја пласираше топката на подалечната статива.

Во 69та минута гостите ја намалија предноста на Реал преку Молина но по само една минута Гонзало Игуан со својот втор гол на средбата ја врати предноста од два погодоци за домакините.

Аргентинецот потоа во 73та минута со мајсторски лоб удар одново се запиша во листата на стрелците и ги постави конечни 4-1.

Ова беше втор хет-трик во низа на Гонзало Игуаин откако напаѓачот три погодоци му даде и на Еспањол во минатото коло.

По оваа победа Реал Мадрид само неколку часа се најде на врвот во Ла Лига бидејќи Барселона лесно стигна до триумф од 3-0 над Расинг.

Вообичано Каталонците имаат проблеми по паузата за репрезентативни средби но Меси уште во 10та минута најави дека трите бода остануваат на Камп Ноу.

Напаѓачот на Барса најпрво двојно проигра со Иниеста, се протна помеѓу дефанзивците на Расинг а потоа го помина и голманот на гостите за на крајот рутински да ја смести топката во мрежата.

Чави го зголеми водството во 27та минута откако постигна за него невообичаен погодок со глава по нафрлената топка на Педро.

Конечните 3-0 беа поставени во 69та минута кога ударот на Андрес Иниеста заврши во стативата а прв до одбиената топка стигна Лео Меси и без проблем одново ја затресе мрежата на гостите.

Валенсија пропушти добра можност да прокнижи нови три бода и одигра 1-1 на гостувањето кај Мајорка и покрај тоа што имаше предност се до самиот финиш.

Во 38та минуга Лос Че дојде во водство преку Адил Рами. Беше изведен корнер од левата страна а во мешаницата најдобро се снајде францускиот интернационалец кој немаше тешка задача од само еден метар да ја турне топката во мрежата на домакините.

’Островјаните’ се изборија за бод во екстра периодот од вториот дел кога судијата покажа на белата точка а реализатор на најстрогата казна беше Хемад.