Само Љубовта е вистина, се друго е...

   Осмиот член од Символот на верата:

„И во Светиот Дух, Господ, Кој живот твори, Кој исходи од Отецот; Кому Му се поклонуваме и Го славиме заедно со Отецот и Синот, и Кој говорел преку пророците;“

Духот Свет, е едно од Трите Лица од Светата Троица, со еднаква чест и слава со Отецот и Синот, со Кои сопостои од вечност. Затоа Го нарекуваме „Господ“, зашто кога ќе речеме Света Троица, тогаш мислиме за Три различни Лица: Отец, Син и Свет Дух, Кои се еднакви по суштина. Од друга страна, тоа единство на кое мислиме кога велиме Еден Бог се огледа во Личноста на Бога Отецот, чија Личност е извор на единството во Светата Троица, па според тоа, ние веруваме во Еден Бог, а не во три. 

Поинаку речено: Бог е една Заедница, единство на Три Лица, па Го нарекуваме Еден, зашто Божјата Заедница не можеме да ја споредиме со никаква друга заедница. Ние за Бога знаеме толку, колку што Он им се открил на луѓето, а Бог не им ја откривал својата суштина на луѓето, затоа што не им е (неопходно) потребно за спасение. 

За нас, доволно е да знаеме дека Светиот Дух произлегува од Отецот, како што и Синот се раѓа од Отецот, вечно и неизменливо. 

Овде не станува збор за произлегување или раѓање во човечка смисла на зборот, како што човекот се раѓа или произлегува од својот родител (татко), во еден временски момент, а дотогаш не постоел.  

Кога е во прашање Божјата суштина, тогаш секој збор или поим добива поинаква смисла, зашто човечкиот ум, а со тоа и јазик, не е во состројба да ја сфати или да ја искаже или опише Божјата суштина.  Тоа што ние го знаеме е дека Бог Отецот е изворот на единството во Светата Троица. 

Во толкувањето на ова прашање има разлика помеѓу Православната и Римо-католичката Црква.  Римо-католиците и протестантите во 8. член од Символот на верата вметнале: и од Синот..., што би значело дека Светиот Дух произлегува и од Отецот и од Синот. Овој богословски проблем се нарекува - filioque. 

Не влегувајќи, засега, подлабоко во овој проблем, можеме да кажеме дека Православната Црква цврсто се држи до Христовите зборови, кога на Своите ученици им дава ветување дека ќе им го „испрати Духот на Вистината, Кој излегува од Отецот...“ (Јн. 25, 26.) 

Светиот Дух се нарекува и Животворен, затоа што Он му дава дух на живот на целото создание. Тоа го забележуваме кај Христовото зачнување, како што Архангелот Гавриил Ѝ објавува на Пресвета Богородица: „Светиот Дух ќе слезе над тебе и силата на Севишниот ќе те осени...“ и на крштението Христово, кога Он (Светиот Дух) во облик на гулаб, слегува над Христа и (преку Неговото присуство и гласот на Отецот) бидува објавен на светот дека Христос е Помазаник, Месија и Спасител. 

Светиот Дух говорел преку пророците, вдахновувајќи ги да објавуваат и да ја исполнуваат Божјата волја. 

Црквата е основана со слегувањето на Светиот Дух на Апостолите. Затоа Црквата Христова, празникот Духови – Педесетница (денот на слегувањето на Светиот Дух врз апостолите во вид на огнени јазици) го нарекува „Роденден на Црквата Христова“. Од овој момент, сè она што Христос го говорел и го правел се оживотворило, т.е., започнало да живее во Црквата. 

Секој што ќе се крсти, постанува член на Црквата, т.е., ги прима благодатните и животворни дарови на Светиот Дух -  добива нов живот во Црквата Христова.  Всушност, во крштението, умира стариот човек, а се раѓа нов, во Светиот Дух. 

Светиот Дух Го подига Христа од мртвите, објавувајќи му повторно на светот дека Светата Троица сè прави заедно. 

И ние веруваме дека Светиот Дух ќе нè подигне (воскресне) од мртвите во денот на Судот, како што се вели во Светото Писмо: „Но ако Духот на Оној, Кој Го воскресна од мртвите Исуса, живее во вас, тогаш Оној, Кој Го воскресна Христа од мртвите, ќе ги оживотвори и  вашите смртни тела преку Својот Дух, Кој живее во вас“ (До Римјаните, 8, 11.). 

Изменето од Miki_P - 30.Јануари.2009 во 19:30

Внеси реплика	страница <1 234 5 14 >
Tweet