Кучиња

Тренинг кај кученцата

Постои верување дека кученцата помлади од шеснаесет недели не треба да се вклучуваат во каква било програма за обука и во овој период би требало да се запознаат со околината и со членовите на семејството. Ставот се оправдува со верувањето дека каков било тренинг во овој период ќе има штетно влијание врз процесот на социјализација, особено кога дисциплината се користи за да се наметне кое однесување е прифатливо, а кое не. Меѓутоа, доколку тренингот на кучињата од оваа старосна група се спроведува адекватно, нема да има никакво влијание на социјализацијата. Менувањето на некои природни начини на однесување е неопходно поради потребата од приспособување на условите на живот во домот. Воспитувањето или обуката на кучето треба да започне веднаш по неговото пристигнување дома. Ова подразбира тренинг за создавање добри навики. Многу е полесно да се воспитува куче веднаш по пристигнувањето дома отколку да се остави да создаде лоши навики, па потоа да се менуваат. Кучето со старост од седум недели многу полесно и побрзо ќе се здобие со домашни навики отколку, да речеме, кучето кое има дванаесет недели и е донесено од одгледувачница, каде што веќе формирало навики да уринира и дефецира секаде. Создавањето добри навики кај кученцето со седум недели има голема предност поради фактот дека во овој период е многу лесно влијанието над него и учењето. Местото каде што ќе живее е негов нов дом, а домашните се негово ново семејство. Тоа на својот кучешки начин сака да допре до новиот сопственик барајќи љубов и сигурност. Под претпоставка дека кучето имало нормален процес на социјализација кај претходниот домаќин, потребни се само два-три дена за да побара заштита од новиот сопственик кога се плаши или кога ќе се соочи со нешто ново. Довербата и сигурноста од новиот сопственик се одлична основа за воспитување.

Кушингова болест кај кучињата

Кушингова болест кај кучињата претставува состојба на прекумерно лачење на глукокортикоиди во телото. Во нормална состојба питуитарната жлезда лачи хормон кој ги стимулира надбубрежните жлезди да произведуваат глукокортикоиди кои се неопходни за одржување на функциите на многу системи. При пореметена работа на питуитарната или надбубрежната жлезда може да се случи прекумерно лачење на глукокортикоиди при што се развива Кушингова болест. Ова сложено ендокринолошко заболување може да има повеќе причини и да прикаже разни симптоми. Кушинговата болест се јавува кај миленици од средна возраст и постари без особени карактеристики по полот и расата. Болеста прогресира бавно како резултат на хроничното зголемено ниво на глукокортикоиди. Симптомите се манифестираат со зголемена жед и уринирање. Кучињата пијат од два до пет пати повеќе вода од вообичаеното а како резултат на тоа и често мократ. Овој симптом се јавува кај осумдесет и пет проценти од заболените. Покрај тоа и зголемувањето на апетитот е честа појава. Кај голем процент се јавува зголемување на стомакот како резултат на поместувањето на мастите во абдоминалната регија и слабоста на мускулната маса на абдоменот. Алопецијата или губењето на влакна на одредени регии е исто така симптом карактеристичен за оваа болест. Во поекстремните случаи влакна остануваат само на главата и опашот. Кожата е тенка лесно се оштетува и раните споро зараснуваат. Честа задишеност, инфекции на уринарниот тракт и губење на репродуктивната способност се исто така резултат на ова пореметување. Третманот зависи од причината и локацијата на пореметувањето. Доколку се идентификува тумор на надбубрежната жлезда тогаш се одредува дали терапијата ќе биде оперативна или цитостатска, но нехируршкиот третман е најчест избор за лекување на Кушинговата болест