ОМО ИЛИНДЕН - ПИРИН

Претседателството на „ОМО Илинден Пирин“ соопшти дека бугарскиот Врховен касациски суд ја одбил жалбата на решението на софискиот Градски суд со кое се одбива регистрацијата на оваа партија на Македонците во Бугарија.

Во соопштението се наведува дека Касацискиот суд ја вратил пресудата во Градскиот суд без промена на првичното решение и со тоа процедурата за регистрација на партијата во Бугарија е завршена, па затоа „ОМО Илинден Пирин“ ќе поднесе жалба во Судот за човекови права во Стразбур.

Претседателството на партијата оценува дека таквата пресуда е уште еден доказ оти судот во Бугарија е политичка, а не правна институција, потсетувајќи дека досега македонските партии и организации ги загубиле сите судски спорови во Бугарија, кои потоа биле добиени во Стразбур.

„Тоа само по себе доволно зборува за правичноста на бугарските судови во однос на организации што ги штитат правата на македонското малцинство во Бугарија“, се наведува во соопштението.

„ОМО Илинден Пирин“ воедно ја поздравува одлуката на Комитетот на министри на Советот на Европа и ја смета за позитивна и во прилог на партијата.

„Посочената одлука го потврди ставот на партијата дека плаќањето на одредената отштета во пресудите на Судот во Стразбур не може да се смета дека ги исцрпува обврските на државите, ниту дека само по себе значи исполнување на пресудата како што тврдеше бугарската Влада. Се надеваме дека на следната седница на 4 април годинава Комитетот ќе ја задолжи Бугарија да ги исполни своите обврски и да ја врати незаконски одземената регистрација на партијата“, се истакнува во соопштението на „ОМО Илинден Пирин“.