Вселена

 
Јупитер е најголема планета во соларниот систем бидејќи проголтал помал ривал од себе пред тој да успее да стане поголем, тврдат научниците. Истражувањата покажаа дека Јупитер има многу мало јадро во споредба со својата вкупна големина.

Иако Јупитер 120 пати е поголем од Земјата, мерењата покажаа дека неговото јадро тежи само десет пати повеќе од нашата планета.

Научниците се сомневаат дека јадрото на Јупитер веројатно испарило по судирот со планета која од Земјата била десет пати поголема, објави Дејли Меил.

Истражувачите од Универзитетот во Пекинг, Кина, со моделирање покажаа што најверојатно се случило при судирот. Симулациите покажаа дека карпеста планета била смачкана кога влегла во атмосферата на Јупитер. Половина час по влегувањето во атмосферата погодила во јадрото.

Тешките елементи во јадрото, како што се металите, испариле и се помешале со водородот и хелиумот во атмосферата на планетата. Научниците веруваат дека со ова може да се објасни зошто јадрото на Јупитер е многу мало, додека атмосферата е екстремно густа.

Даглас Лин од Универзитетот во Калифорнија изјави дека во случај планетата да не се судрела со Јупитер, би прераснала во гигантска планета.

Неговиот тим оцени дека тешките елементи во атмосферата на Сатурн веројатно се резултат на слични судири со мали планети.

Планетите од Соларниот систем настанале по судири со мали, џуџести планети кои кружеле околу Сонцето. Во тие судири, малите планети се споиле заедно за да формираат големи планети.

Месечината и Земјата биле создадени како резултат на судир меѓу две планети со големина на Марс и Венера. Температурата на Земјата била голема, околу 7.000 Целзоусови степени, а карпите и металите се растопиле.