ЗАПОЧНА „САЕМОТ ЗА ВРАБОТУВАЊЕ И КАРИЕРА“ ВО ПРИЛЕП

Денеска во Прилеп пред Центарот за култура „Марко Цепенков“ свечено беше отворен  „Саемот  за вработување и кариера“ кој е во организација на УСАИД  Мрежа ЈЕС,  Општина Прилеп и Центарот за вработување - Прилеп.

На свеченото отварање присутен беше и Министерот за труд и социјална политика Диме Спасов кој истакна дека ваквите манифестации се од особено значење како би се премостил јазот помеѓу вештините кои ги поседуваат работниците и оние кои што се потребни на пазарот на трудот.

Градоначалникот на општина Прилеп Марјан Ристески истакна дека негова постојана заложба е да им се помогне на младите при вработувањето и бидејќи вработувањето е негов приоритет, смета  дека со отворањето на неколкуте индустриски зони знатно ќе се намали наевработеноста во неговата општина.

За потребата од ваква манифестација позитивно се изјасни и раководителот на Агенцијата за вработување на Република Македонија  Влатко Поповски  кој ја поздрави интерактивната соработка на сите чинители на пазарот на трудот  со која може во иднина да се дојде до  многу подобри резултати.

На отворањето присутен беше и директорот на канцеларијата за демократија и образование при УСАИД  Мајкл Стивејтер кој нагласи дека соработката која се случува денес и утре не смее да заврши со саемот, туку напротив тоа треба да биде почеток за континуираното  заедничко работење  на локално ниво.

Саемот ќе трае два дена и ќе им овозможи на младите кои бараат работа, непосредна средба со локалните бизниси, како и можност  за доставување на  своите апликации за работно место  и  закажување на  средби со своите потенцијални работодавачи.