Македонија треба да добие датум за преговори за време на кипарското претседателство

Мешовитиот парламентарен комитет ЕУ-Македонија уште еднаш го повтори повикот до Советот на Европската Унија за почеток на преговорите со Македонија. Овојпат има и рок, а тоа е периодот на кипарското претседателство.

Ова, заедно со враќањето на употребата на терминот „македонски“ за идентитетот, културата и јазикот (испуштени во извештајот за напредокот на Македонија за 2011 година) се заклучоци на нацрт-резолуцијата што денеска беше усвоена во Брисел со огромно мнозинство гласови од претставниците на Европскиот парламент и на Собранието на Македонија.

Расправата, се разбира, не помина без активна улога на германскиот европратеник Јоргос Шацимаркакис, но европратениците и македонските парламентарци усвоија неколку амандмански измени на предложените препораки од 10-от Мешовит комитет ЕУ – Република Македонија за забрзување на евроинтегративните процеси на земјава.

Европратениците, претежно тие од Словенија и Германија, ги поддржаа трите амандмани на препораките, кои за македонската делегација беа многу значајни.

Ова е првпат еден официјален орган на Европскиот парламент, иако е од мешан тип, да побара конкретен датум за преговори.

Помина и амандманот на македонскиот пратеник Антонио Милошоски, со кој се поздравува пресудата на Меѓународниот суд за правдата од Хаг, во однос на Привремената спогодба, при што се вели дека оваа пресуда претставува обврска за Грција да не го попречува членството во НАТО и почетокот на преговорите во ЕУ.

http://www.time.mk/read/fc2069c927/2779864ab2/index.html