Не требаше да мине многу време пред да се огласи Перо Антиќ по повод неговиот историски избор за настап на олстар-викендот во НБА-лигата, кој од 14-16 февруари ќе се одржи во Њу Орлеанс.

Првиот Македонец во најсилната кошаркарска лига на светот изрази огромно задоволство што е избран да биде дел од натпреварот наречен „Ѕвездите во подем“, на кој учествуваат најдобрите дебитанти и играчи кои се втора сезона во НБА-лигата.

„Горд сум што ќе ги претставувам мојата татковина Македонија и градот Атланта во Њу Орлеанс. Би сакал да им се заблагодарам на моите соиграчи, стручниот штаб и на организацискиот тим на Хокс“, беше првата реакција на Антиќ на „Твитер“.

Повредата на Ал Хорфорд овозможи македонскиот кошаркар да добие поголема доверба од стручниот штаб на „јастребите’“, која тој максимално ја искористи, особено од почетокот на годинава. По осум меча како стартер месецов, Антиќ е најдобар помеѓу дебитантите во скокови и „тројки“ и е четврти најдобар стрелец.