Масакр кај с.Смилковци ,убиени пет Македонци

Како што вчера ве информиравме, Министерството за внатрешни работи отпочна со реализација на последната фаза од Операцијата „Монструм“, односно приведувањето на лица за кои постоеја индиции за поврзаност со грозоморното петкратно убиство извршено на 12.04.2012 година во Скопје во атарот на с.Смилковци на место викано Смилковско езеро, како и документирањето на кривичните дела.

Веќе соопштивме дека во 04.00 часот вчера беше успешно отпочната и реализирана акцијата во која што беа приведени 20 лица, а беа извршени претреси во уште 26 објекти.

Сите приведени беа спроведени во неколку полициски станици во кои што до раните утрински часови беа вршени службени разговори, кои завршија со поднесување на кривични пријави и посебни извештаи по што истите беа спроведени во Основниот суд Скопје 1 – Скопје.

Врз основа на спроведената истрага и обезбедените материјални докази, МВР денеска до ОЈО за гонење на организиран криминал и корупција и ОЈО Скопје поднесе вкупно пет кривични пријави и еден посебен извештај против 20 лица - членови на криминалната група поради постоење на основано сомнение дека сториле кривични дела „тероризам“, „помагање во врска со истото дело“ и „недозволено изработување, држење и тргување со оружје или распрскувачки материи“.

Имено во врска со грозоморниот чин, односно кривичното дело „Тероризам“, поднесена е кривична пријава против пет лица од Скопје на возраст од 24 до 54 години. Тројца од нив, од кои едно лице на возраст од 27 години и двајца браќа на возраст од 32 и 33 години, се директно осомничени како извршители на убиството на петте момчиња, додека останатите двајца се товарат дека им помагале при извршување на делото.

Според досега добиените сознанија тројцата пријавени на 12.04.2012 година, околу 20.00 часот, во атарот на село Смилковци, на место викано „Смилковски езера“, по претходен договор, со употреба на огнено оружје (2 автоматски пушки и еден пиштол) ги лишиле од живот петте момчиња, по што со Патничко возило „Опел Омега“, темно-црвена боја, го напуштиле местото на настанот и се упатиле кон ГП „Долно Блаце“, каде во близина на м.в. „Вражји Вир“, го оставиле возилото. По извршување на кривичното дело, пријавените помагачи им обезбедиле засолниште и им помогнале илегално да ја напуштат територијата на РМакедонија и да  заминат во Косово.

Поради постоење на основано сомнение дека поголема количина на оружје кое го користеле членови на криминалната група е складирано во домот на 60 годишно лице од село Отља – Куманово, извршен е претрес во дом и други простории, при што пронајдена е поголема количина на муниција и куршуми со кал. 12,7 мм и 14,5 мм, 7,62мм, тронблонски куршуми, рамки од автоматска и полуавтоматска пушка и реденици за пушкомитралез. Исто така пронајдени се радиостаници, маскирни панталони, кошули и ранци, амблеми и легитимации и албум со ознаки од УЧК, тактички елеци маскирна боја од кои еден со амблем на УЧК и др. Против истата поднесена е кривична пријава  поради постоење на основано сомнение за сторено кривично дело „Тероризам„ по член 394–б ст.6, од КЗ на Р.Македонија.

Исто така, на подрачјето на Скопје извршени се претреси на три локации во дом и други простории каде е пронајдено оружје и муниција и против 4 лица се поднесени три кривични пријави до ОЈО Скопје за сторено кривично дело „Недозволено изработување, држење и тргување со оружје или распрскувачки материи“ по чл.396 од КЗ на РМ.

Имено, при  извршен е претрес во домот кај пријавени татко и син од с.Арачиново пронајдени се пиштол марка „Валтер“калибар 9 мм, рамка со 14 парчиња муниција, пиштол марка „Валтер“, кал.7,65 мм со рамка со 8 парчиња муниција за истиот, рамка од пиштол со 5 парчиња, муниција калибар 9мм. При  извршен претрес во домот кај 33 годишно лице од Скопје пронајдени се еден пиштол кал.7.62мм и девет куршуми кал.7,62мм, а при  претрес во домот кај 28 годишно лице од Скопје пронајдени се една автоматска пушка АК-47 кал.7.62 мм со празна рамка за муниција, 5 празни рамки за муниции, еден сигнален пиштол марка „Екол“ и една рачна бомба - кашикара.

Исто така до ОЈО за гонење на организиран криминал и корупција поднесен е Посебен извештај против 10 лица на возраст од 22 до 45 години, сите од Скопје, за кои постојат основани сомненија дека учествувале во организирање, подготвување, извршување, помагање и прикривање на кривичното дело „Тероризам“ извршено во атарот на село Смилковци, а со цел докажување на нивната инволвираност во кривичното дело и утврдување на нивната поединечна одговорност.

Од извршените претреси кај наведените лица обезбедени се докази и други материјални траги, кои се доставени во Одделот за криминалистичка техника за вештачење. Со оглед на тоа дека потребно е подолго време за спроведување на постапката, во Посебниот извештај, побарано е ЈО на Истражниот судија да му предложи одредување на мерка краткотраен притвор над пријавените лица, со цел добивање на потребните наоди и вештачења со кои поединечно би се утврдила кривичната одговорност на истите.

Операцијата „Монструм“ продолжува се до нејзино целосно расчистување и обезбедување на уште две лица за кои постои сомнение дека биле директно инволвирани во убиството.

Член 123

(1) Тој којшто друг ке лиши од живот ќе се казни со затвор најмалку пет години.

(2) Со затвор најмалку десет години или со доживотен затвор ќе се казни тој којшто:

1) друг ќе лиши од живот на свиреп или подмолен начин,

Тероризам

Члсн 313

Тој којшто со намера да го загрози уставниот поредок или безбедноста на Република Македонија ќе предизвика или сериозно ќе се закани со предизвикување експлозија, пожар, поплава или друго општоопасно дејство или акт на насилство, создавајќи чувство на несигурност или страв кај граѓаните, ќе се казни со затвор најмалку три години.