Има ли Бранко граници?!

НАЈДЕНА ЛОКАЦИЈА ЗА ИДНИОТ КАБИНЕТ НА ЦРВЕНКОВСКИ

Бранко се сели на Огњан Прица

Од две локации со исти услови и квадратура како на првиот претседател Киро Глигоров, бендисана е онаа на улицата Огњан Прица оти е во централното градско подрачје. Договорот за закуп со газдата на зградата ќе се потпише идната недела

Претседателот во заминување Бранко Црвенковски како поранешен шеф на државата најверојатно ќе работи во канцеларија на улицата Огњан Прица во Скопје, дознава "Вест". Локацијата на кабинетот за експретседателот е многу блиску до "Бихачка", улицата на која се наоѓа седиштето на СДСМ каде, пак, тој ќе се врати како лидер по конгресот на партијата.
Директорот на Службата за општи и заеднички работи Васе Доневски вчера не сакаше да каже детали, но потврди дека од две локации со исти услови и квадратура како на првиот претседател Киро Глигоров, бендисана е една, која ќе биде во централното градско подрачје. Договорот за закуп со газдата на зградата Службата ќе го потпише идната недела.
Според Законот за правата на бившиот претседател на Македонија, Службата за општи и заеднички работи на поранешниот претседател треба да му обезбеди и возило и возач.
Од МВР ќе има обезбедување, а советниците Црвенковски ќе си ги пла­ќа од буџетот за мини-кабинетот.
Без оглед на најавеното враќање во матичната партија СДСМ, нему, спо­ред Законот за поранешниот претседател, му следува правото на кабинет до крајот на животот. Со аргументи дека Македонија со два милиона жители ќе има дури три претседателски кабинети, лидерот на Демократски сојуз и пратеник Павле Трајанов подготви и предложи, како што пишувавме, измени на Законот, со кои, меѓу другото, Трајанов предлага слично како и во САД, по­ра­неш­ни­от да се смести во кабинетот на актуелниот претседател и да има само кан­це­ла­ри­ја. Предложените измени, вели Трајанов, чекаат на координација меѓу пратеничките групи во Собранието. (С.К.Д.)