Црвено - црни новости

ДОСЕГАШНИОТ СПОНЗОР НА ВАРДАР СЕ СЕЛИ ВО ПРИЛЕП

УФА Медија од денеска во Победа!?

*"Големи се шансите Слободан Вујчиќ да дојде во нашиот клуб", коментира Маријан Стојкоски, директорот на прилепчани

Многу мистерии преовладуваа околу судбината на Победа. Клубот зад себе ја имаше најлошата сезона, многу фудбалери поради финансиите си заминаа од екипата, а низ чаршијата со споменуваа еден куп комбинации околу тоа на кој начин ќе се спаси клубот од градот под Марковите кули. Сепак, добрата вест доаѓа во "пет до дванаесет". Денеска е стартот на подготовките во Победа, а од денеска во клубот се очекува и новиот спонзор. Нема дилеми дека тоа е УФА Медија и Слободан Брацо Вујчиќ. Тоа е спонзорот кој со години беше на чело на Вардар.

"Големи се шансите Слободан Брацо Вујчиќ да дојде во нашиот клуб. Со неговото спонзорство клубот ќе застане на здрави нозе и ќе ги има сите предуслови во новата сезона да атакува на највисоките позиции", кусо прокоментира Маријан Стојкоски, спортскиот дирекотор на прилепчани.

УФА Медија и Брацо се гледаат како спасители на Победа кои би му помогнале на Ацуле Забрчанец да излезе од кризата која го тресе клубот веќе подолго време. Веќе од поодамна пропаднаа сите најави дека Витаминка заедно со уште неколку други фирми од Прилеп ќе успеат да направат превласт.

Најавите велат дека Брацо со себе во Победа ќе ги донесе сите "бунтовници" од Вардар. Сите оние "негови" фудбалери од типот на Перендија, Бојовиќ, Секулоски...

Сепак, има и многу нејасни работи од типот како Брацо ќе функционира со Ацуле. Двајцата сакаат да газдуваат со клубот во кој речиси не остана ништо. Најдобрите фудбалери си заминаа па така летово ќе мора да се тргне речиси од "нула".

Меѓудругото со најавите за влез на познатиот германски ТВ концерн во Победа се потврдија најавите дека популарниот Брацо нема намера да го заборави македонскиот клупски фудбал. Го загуби Вардар па така сега мора да бара нова база, а Прилеп и Победа го имаат потребниот рејтинг иако главниот проблем е тоа што клубот не е од Скопје.



Брацо: Уште сум во трилема

Во текот на вчерашниот ден во телефонски разговор Слободан Брацо Вујичиќ ни изјави дека с$ уште не е 100% сугурно дека тој влегува со спонзорство во Победа.

"Точно е дека сакам да преземам еден клуб од Македонија. Но засега с$ уште нема одлука кој ќе биде тој клуб. Три клуба се во игра. Може да ви потврдам само дека еден од нив е Победа", ни изјави вчера Брацо Вујчиќ.

Не е тајна, и покрај тоа што Вујчиќ не сакаше да потенцира, дека останатите два клуба се второлигашот Локомотива, кој од поодамна живее и со извесна негова помош, но и Македонија ЃП.

Здравески е "бетониран"

Без разлика на тоа што доаѓа нов спонзор тренерот Николче Здравески е "бетонира" на својата функција. Тој денеска ќе ја врши прозивката и тој ќе бара од управата на клубот засилувања со кое екипата ќе може да се надева на подобри успеси во новата сезона. Мотив повеќе за сите во Победа е тоа што сезоната почнува со вечниот ривал Вардар.

Според најавите, и Ацуле и Брацо немале ништо против Здравески да остане на тренерската функција.

РЕПРЕЗЕНТАТИВЦИ НА ГАНА И НИГЕРИЈА ЌЕ ГИ ОСВЕЖУВААТ РЕДОВИТЕ НА НАЈТРОФЕЈНИОТ МАКЕДОНСКИ КЛУБ

Иди Баба од Гана во нападот на Вардар!

* Покрај ангажманот на 26-годишниот Ганец поранешен член на Ахен и Макаби Тел Авив, и младинскиот репрезентативец на Нигерија, Метју Ифеани ќе биде на проба меѓу "црвено-црните"

Поранешниот младински репрезентативец на Гана, Иди Баба треба да биде новото освежување во напаѓачките редови на најтрофејниот македонски клуб на патот кон остварувањето на новите шампионски амбиции. Покрај Иди Баба "вардарците", кои од вчера се наоѓаат на подготовки на Златибор, наредниве денови треба да добијат уште еден фудбалер од африканскиот континент, младинскиот репрезентативец на Нигерија, Метју Ифеани.

"И двајцата фудбалери од Гана, односно Нигерија до крајот на месецов очекуваме да се приклучат на подготовките на тимот на Златибор. Се работи за фудбалери кои играат во нападот, односно средниот ред", ни ја потврди вчера информацијата за новите ангажмани и Дејан Чекаров од раководството на Вардар.

Според најавите, 26-годишниот напаѓач Иди Баба сосема извесно, согласно препораките и сопственото фудбалско минато, треба веднаш да биде ангажиран во редовите на "црвено-црните". Се работи за офанзивец кој бил член на младинската репрезентација на Гана, а во својата кариера претходно на европскиот континент настапувал и за германскиот второлигаш Алеманија Ахен, но и за еден од најдобрите израелски клубови, Макаби Тел Авив.

Иди Баба во периодот од 2000 до 2003 година кога го носел дресот на Алеманија Ахен на вкупно 67 официјални натпревари постигнал 38 погодоци за својот тим. Од 2003 до 2005 година е член на Макаби Тел Авив, а потоа по малезискиот Перак се враќа во својата земја од каде, пак, сега се наоѓа пред трансфер во нашиот најтрофеен клуб.

За разлика од Иди Баба, 20-годишниот Нигериец Метју Ифеани, кој игра во средниот ред, е без позначајно клупско искуство, меѓутоа сепак и податокот што е член на младинската репрезентација на Нигерија веројатно укажува на извесните фудбалски квалитети. Ифеани, сепак, по приклучувањето на подготовките на Вардар ќе мине извесен период со црвено-црниот состав пред да следи и официјалниот потпис за негов ангажман во претстојната сезона.

По преземањето на Вардар од страна на групацијата "Гофи", односно Трифун и Коста Костовски, двајцата африкански фудбалери Иди Баба и Метју Ифеани треба да бидат новите засилувања на тимот од "Градски" по веќе реализираните трансфери на Тони Мегленски и репрезентативецот Артим Положани.

В. Булатовиќ

И двајцата ќе се приклучат на Златибор

И двете новонајавени засилување на "црвено-црните", Ганецот Иди Баба и Нигериецот Метју Ифеани на подготовките на тимот на Златибор треба да се приклучат до крајот на оваа недела.

Од вчера Вардар предводен од шефот на стручниот штаб Ратко Достаниќ веќе ги реализира подготовките на Златибор каде е планирано одигрување на три пријателски натпревари, со ОФК Београд (28 јуни), Будуќност и Зета. На Златибор отпатуваа вкупно 24 фудбалери, од кои 17 од минатогодишниот состав на шампионот Работнички К, пет од досегашниот состав на Вардар и новите имиња Тони Мегленски и Артим Положани.

КЛУБОТ И НАТАМУ ЌЕ СМЕТА НА СВОИТЕ НАДЕЖИ КОИ ЌЕ БИДАТ ОТСТАПЕНИ ВО РАБОТНИЧКИ

Младите "вардарци" на "калење"

Од новото раководство на Вардар потенцираат дека и натаму ќе сметаат на своите млади фудбалери кои го понесоа комплетниот товар во последните три кола од минатогодишниот шампионат, откако првотимците се одлучија да ги бојкотираат официјалните натпревари, при што со единствена цел добивање што поголема минутажа ќе бидат понудени за отстапница во Работнички или во некој друг клуб од домашната Прва лига.

"Подготвен е список на сите млади фудбалери кои ќе имаат разговори за отстапување во Работнички. Доколку не се најде заеднички јазик со Работнички, околу финансии или било што друго, тогаш ќе следи позајмица во некој друг клуб, се со цел да имаат што поголема минутажа а ќе бидат под наше будно око", велат од раководството на Вардар.

Иван Ковачевски, Дарко Стојанов, Трајче Стојковски, Петар Стефановски, Марко Костенцовски, Мартин Јанушев, Ниметуља Ајдари заедно со Ангелковски, Крстиќ, Стојановски понесоа огромна тежина изминатите два месеци во одбрана на црвено-црниот дрес, оставајќи печат дека сепак се работи за фудбалери на кои мора да се смета во иднина. И минатогодишните првотимци Борче Ристовски, Филип Спасески, Пеце Коруновски, според најавите ќе бидат позајмени на Работнички.

Од 16 јули во Охрид

По враќањето од Златибор на 5 јули, фудбалерите на Вардар од 16. до 26 јули ќе реализираат уште едни подготовки надвор од Скопје, овој пат во нашиот најголем туристички центар Охрид.

Неопходноста од нови подготовки надвор од главниот град доаѓа откако во моментите на трансформација "црвено-црните" сепак малку порано го почнаа тренажниот процес за новата сезона.

ВЕТЕРАНОТ ИМА НОВ КЛУБ И ТОА НА БЛИСКИОТ ИСТОК

Шаќири во Азербејџан за 300.000 долари

*Карабах од Баку е новиот клуб на нашиот поранешен капитен

Артим Шаќири (35), потпиша двегодишен договор со азербејџанскиот клуб Карабах од Баку за годишна заработувачка од 300.000 долари. Тој вчера беше промовиран пред медиумите како најголеми засилување за оваа екипа во пресрет на новата сезона.

"Среќен сум што дојдов тука. Добив одлични вести за вашиот клуб од Ѓоко Хаџиевски кој е на клупата на ФК Баку. Доаѓам за успеси и мислам дека ќе се бориме за високи дострели", кажа Шаќири на прес конференцијата за време на неговата промоција како нов член на Карабах. Тој е најавен како човекот кој долги години бил капитен на Македонија и предводникот на националниот тим во успесите со Англија.

"Ветувам дека ќе дадам се од себе. Ми требаат добри натпревари за да се вратам во националниот тим на Македонија. Мислам дека нема да имам проблем со тоа што дојдов во Азербејџан", додава поранешниот капитен на нашиот национален тим кој по настапите во Халмштад, Тенис Борусија, Хит Горица, Коротан, Малатија, ЦСКА, Вест Бромвич, Интер Турку, Алборг, Вадуз и Беса се одлучи кариерата да ја продолжи во екипа од Азербејџан.



Сега Христов е на ред

Идната недела во Азербејџан кариерата треба да ја продолжи уште едно наше познато фудбалско име. Ѓорѓи Христов веќе го најавивме како засилување за ФК Баку на Ѓоко Хаџиевски. Доколку биде се како што треба новата сезона во Азербејџан ќе биде мноигу интересна затоа што Христов против Шаќири ќе се борат за водечките позиции во Азербејџан. Тоа се двајцата најдобри стрелци во нашиот национален тим.